Library·Mahābhārata (critical edition)·1·1.62
जनमेजय उवाच त्वत्तः श्रुतम् इदं ब्रह्मन् देवदानवरक्षसाम् अंशावतरणं सम्यग् गन्धर्वाप्सरसां तथा
janamejaya uvāca tvattaḥ śrutam idaṃ brahman devadānavarakṣasām aṃśāvataraṇaṃ samyag gandharvāpsarasāṃ tathā
Sanskrit only: no published translation is held for this verse.
इमं तु भूय इच्छामि कुरूणां वंशम् आदितः कथ्यमानं त्वया विप्र विप्रर्षिगणसंनिधौ
imaṃ tu bhūya icchāmi kurūṇāṃ vaṃśam āditaḥ kathyamānaṃ tvayā vipra viprarṣigaṇasaṃnidhau
Sanskrit only: no published translation is held for this verse.
वैशंपायन उवाच पौरवाणां वंशकरो दुःषन्तो नाम वीर्यवान् पृथिव्याश् चतुरन्ताया गोप्ता भरतसत्तम
vaiśaṃpāyana uvāca pauravāṇāṃ vaṃśakaro duḥṣanto nāma vīryavān pṛthivyāś caturantāyā goptā bharatasattama
Sanskrit only: no published translation is held for this verse.
चतुर्भागं भुवः कृत्स्नं स भुङ्क्ते मनुजेश्वरः समुद्रावरणांश् चापि देशान् स समितिंजयः
caturbhāgaṃ bhuvaḥ kṛtsnaṃ sa bhuṅkte manujeśvaraḥ samudrāvaraṇāṃś cāpi deśān sa samitiṃjayaḥ
Sanskrit only: no published translation is held for this verse.
आम्लेच्छाटविकान् सर्वान् स भुङ्क्ते रिपुमर्दनः रत्नाकरसमुद्रान्तांश् चातुर्वर्ण्यजनावृतान्
āmlecchāṭavikān sarvān sa bhuṅkte ripumardanaḥ ratnākarasamudrāntāṃś cāturvarṇyajanāvṛtān
Sanskrit only: no published translation is held for this verse.
न वर्णसंकरकरो नाकृष्यकरकृज्जनः न पापकृत् कश् चिद् आसीत् तस्मिन् राजनि शासति
na varṇasaṃkarakaro nākṛṣyakarakṛjjanaḥ na pāpakṛt kaś cid āsīt tasmin rājani śāsati
Sanskrit only: no published translation is held for this verse.
धर्म्यां रतिं सेवमाना धर्मार्थाव् अभिपेदिरे तदा नरा नरव्याघ्र तस्मिञ् जनपदेश्वरे
dharmyāṃ ratiṃ sevamānā dharmārthāv abhipedire tadā narā naravyāghra tasmiñ janapadeśvare
Sanskrit only: no published translation is held for this verse.
नासीच् चोरभयं तात न क्षुधाभयम् अण्व् अपि नासीद् व्याधिभयं चापि तस्मिञ् जनपदेश्वरे
nāsīc corabhayaṃ tāta na kṣudhābhayam aṇv api nāsīd vyādhibhayaṃ cāpi tasmiñ janapadeśvare
Sanskrit only: no published translation is held for this verse.
स्वैर् धर्मै रेमिरे वर्णा दैवे कर्मणि निःस्पृहाः तम् आश्रित्य महीपालम् आसंश् चैवाकुतोभयाः
svair dharmai remire varṇā daive karmaṇi niḥspṛhāḥ tam āśritya mahīpālam āsaṃś caivākutobhayāḥ
Sanskrit only: no published translation is held for this verse.
कालवर्षी च पर्जन्यः सस्यानि फलवन्ति च सर्वरत्नसमृद्धा च मही वसुमती तदा
kālavarṣī ca parjanyaḥ sasyāni phalavanti ca sarvaratnasamṛddhā ca mahī vasumatī tadā
Sanskrit only: no published translation is held for this verse.
स चाद्भुतमहावीर्यो वज्रसंहननो युवा उद्यम्य मन्दरं दोर्भ्यां हरेत् सवनकाननम्
sa cādbhutamahāvīryo vajrasaṃhanano yuvā udyamya mandaraṃ dorbhyāṃ haret savanakānanam
Sanskrit only: no published translation is held for this verse.
धनुष्य् अथ गदायुद्धे त्सरुप्रहरणेषु च नागपृष्ठे ऽश्वपृष्ठे च बभूव परिनिष्ठितः
dhanuṣy atha gadāyuddhe tsarupraharaṇeṣu ca nāgapṛṣṭhe 'śvapṛṣṭhe ca babhūva pariniṣṭhitaḥ
Sanskrit only: no published translation is held for this verse.
बले विष्णुसमश् चासीत् तेजसा भास्करोपमः अक्षुब्धत्वे ऽर्णवसमः सहिष्णुत्वे धरासमः
bale viṣṇusamaś cāsīt tejasā bhāskaropamaḥ akṣubdhatve 'rṇavasamaḥ sahiṣṇutve dharāsamaḥ
Sanskrit only: no published translation is held for this verse.
संमतः स महीपालः प्रसन्नपुरराष्ट्रवान् भूयो धर्मपरैर् भावैर् विदितं जनम् आवसत्
saṃmataḥ sa mahīpālaḥ prasannapurarāṣṭravān bhūyo dharmaparair bhāvair viditaṃ janam āvasat
Sanskrit only: no published translation is held for this verse.