Library·Mahābhārata (critical edition)·1·1.95
वैशंपायन उवाच ततो विवाहे निर्वृत्ते स राजा शंतनुर् नृपः तां कन्यां रूपसंपन्नां स्वगृहे संन्यवेशयत्
vaiśaṃpāyana uvāca tato vivāhe nirvṛtte sa rājā śaṃtanur nṛpaḥ tāṃ kanyāṃ rūpasaṃpannāṃ svagṛhe saṃnyaveśayat
Sanskrit only: no published translation is held for this verse.
ततः शांतनवो धीमान् सत्यवत्याम् अजायत वीरश् चित्राङ्गदो नाम वीर्येण मनुजान् अति
tataḥ śāṃtanavo dhīmān satyavatyām ajāyata vīraś citrāṅgado nāma vīryeṇa manujān ati
Sanskrit only: no published translation is held for this verse.
अथापरं महेष्वासं सत्यवत्यां पुनः प्रभुः विचित्रवीर्यं राजानं जनयाम् आस वीर्यवान्
athāparaṃ maheṣvāsaṃ satyavatyāṃ punaḥ prabhuḥ vicitravīryaṃ rājānaṃ janayām āsa vīryavān
Sanskrit only: no published translation is held for this verse.
अप्राप्तवति तस्मिंश् च यौवनं भरतर्षभ स राजा शंतनुर् धीमान् कालधर्मम् उपेयिवान्
aprāptavati tasmiṃś ca yauvanaṃ bharatarṣabha sa rājā śaṃtanur dhīmān kāladharmam upeyivān
Sanskrit only: no published translation is held for this verse.
स्वर्गते शंतनौ भीष्मश् चित्राङ्गदम् अरिंदमम् स्थापयाम् आस वै राज्ये सत्यवत्या मते स्थितः
svargate śaṃtanau bhīṣmaś citrāṅgadam ariṃdamam sthāpayām āsa vai rājye satyavatyā mate sthitaḥ
Sanskrit only: no published translation is held for this verse.
स तु चित्राङ्गदः शौर्यात् सर्वांश् चिक्षेप पार्थिवान् मनुष्यं न हि मेने स कं चित् सदृशम् आत्मनः
sa tu citrāṅgadaḥ śauryāt sarvāṃś cikṣepa pārthivān manuṣyaṃ na hi mene sa kaṃ cit sadṛśam ātmanaḥ
Sanskrit only: no published translation is held for this verse.
तं क्षिपन्तं सुरांश् चैव मनुष्यान् असुरांस् तथा गन्धर्वराजो बलवांस् तुल्यनामाभ्ययात् तदा तेनास्य सुमहद् युद्धं कुरुक्षेत्रे बभूव ह
taṃ kṣipantaṃ surāṃś caiva manuṣyān asurāṃs tathā gandharvarājo balavāṃs tulyanāmābhyayāt tadā tenāsya sumahad yuddhaṃ kurukṣetre babhūva ha
Sanskrit only: no published translation is held for this verse.
तयोर् बलवतोस् तत्र गन्धर्वकुरुमुख्ययोः नद्यास् तीरे हिरण्वत्याः समास् तिस्रो ऽभवद् रणः
tayor balavatos tatra gandharvakurumukhyayoḥ nadyās tīre hiraṇvatyāḥ samās tisro 'bhavad raṇaḥ
Sanskrit only: no published translation is held for this verse.
तस्मिन् विमर्दे तुमुले शस्त्रवृष्टिसमाकुले मायाधिको ऽवधीद् वीरं गन्धर्वः कुरुसत्तमम्
tasmin vimarde tumule śastravṛṣṭisamākule māyādhiko 'vadhīd vīraṃ gandharvaḥ kurusattamam
Sanskrit only: no published translation is held for this verse.
चित्राङ्गदं कुरुश्रेष्ठं विचित्रशरकार्मुकम् अन्ताय कृत्वा गन्धर्वो दिवम् आचक्रमे ततः
citrāṅgadaṃ kuruśreṣṭhaṃ vicitraśarakārmukam antāya kṛtvā gandharvo divam ācakrame tataḥ
Sanskrit only: no published translation is held for this verse.
तस्मिन् नृपतिशार्दूले निहते भूरिवर्चसि भीष्मः शांतनवो राजन् प्रेतकार्याण्य् अकारयत्
tasmin nṛpatiśārdūle nihate bhūrivarcasi bhīṣmaḥ śāṃtanavo rājan pretakāryāṇy akārayat
Sanskrit only: no published translation is held for this verse.
विचित्रवीर्यं च तदा बालम् अप्राप्तयौवनम् कुरुराज्ये महाबाहुर् अभ्यषिञ्चद् अनन्तरम्
vicitravīryaṃ ca tadā bālam aprāptayauvanam kururājye mahābāhur abhyaṣiñcad anantaram
Sanskrit only: no published translation is held for this verse.
विचित्रवीर्यस् तु तदा भीष्मस्य वचने स्थितः अन्वशासन् महाराज पितृपैतामहं पदम्
vicitravīryas tu tadā bhīṣmasya vacane sthitaḥ anvaśāsan mahārāja pitṛpaitāmahaṃ padam
Sanskrit only: no published translation is held for this verse.
स धर्मशास्त्रकुशलो भीष्मं शांतनवं नृपः पूजयाम् आस धर्मेण स चैनं प्रत्यपालयत्
sa dharmaśāstrakuśalo bhīṣmaṃ śāṃtanavaṃ nṛpaḥ pūjayām āsa dharmeṇa sa cainaṃ pratyapālayat
Sanskrit only: no published translation is held for this verse.