Mahābhārata (critical edition) 11.22

गान्धार्य् उवाच आवन्त्यं भीमसेनेन भक्षयन्ति निपातितम् गृध्रगोमायवः शूरं बहुबन्धुम् अबन्धुवत्

gāndhāry uvāca āvantyaṃ bhīmasenena bhakṣayanti nipātitam gṛdhragomāyavaḥ śūraṃ bahubandhum abandhuvat

Sanskrit only: no published translation is held for this verse.

तं पश्य कदनं कृत्वा शत्रूणां मधुसूदन शयानं वीरशयने रुधिरेण समुक्षितम्

taṃ paśya kadanaṃ kṛtvā śatrūṇāṃ madhusūdana śayānaṃ vīraśayane rudhireṇa samukṣitam

Sanskrit only: no published translation is held for this verse.

तं सृगालाश् च कङ्काश् च क्रव्यादाश् च पृथग्विधाः तेन तेन विकर्षन्ति पश्य कालस्य पर्ययम्

taṃ sṛgālāś ca kaṅkāś ca kravyādāś ca pṛthagvidhāḥ tena tena vikarṣanti paśya kālasya paryayam

Sanskrit only: no published translation is held for this verse.

शयानं वीरशयने वीरम् आक्रन्दसारिणम् आवन्त्यम् अभितो नार्यो रुदत्यः पर्युपासते

śayānaṃ vīraśayane vīram ākrandasāriṇam āvantyam abhito nāryo rudatyaḥ paryupāsate

Sanskrit only: no published translation is held for this verse.

प्रातिपीयं महेष्वासं हतं भल्लेन बाह्लिकम् प्रसुप्तम् इव शार्दूलं पश्य कृष्ण मनस्विनम्

prātipīyaṃ maheṣvāsaṃ hataṃ bhallena bāhlikam prasuptam iva śārdūlaṃ paśya kṛṣṇa manasvinam

Sanskrit only: no published translation is held for this verse.

अतीव मुखवर्णो ऽस्य निहतस्यापि शोभते सोमस्येवाभिपूर्णस्य पौर्णमास्यां समुद्यतः

atīva mukhavarṇo 'sya nihatasyāpi śobhate somasyevābhipūrṇasya paurṇamāsyāṃ samudyataḥ

Sanskrit only: no published translation is held for this verse.

पुत्रशोकाभितप्तेन प्रतिज्ञां परिरक्षता पाकशासनिना संख्ये वार्द्धक्षत्रिर् निपातितः

putraśokābhitaptena pratijñāṃ parirakṣatā pākaśāsaninā saṃkhye vārddhakṣatrir nipātitaḥ

Sanskrit only: no published translation is held for this verse.

एकादश चमूर् जित्वा रक्ष्यमाणं महात्मना सत्यं चिकीर्षता पश्य हतम् एनं जयद्रथम्

ekādaśa camūr jitvā rakṣyamāṇaṃ mahātmanā satyaṃ cikīrṣatā paśya hatam enaṃ jayadratham

Sanskrit only: no published translation is held for this verse.

सिन्धुसौवीरभर्तारं दर्पपूर्णं मनस्विनम् भक्षयन्ति शिवा गृध्रा जनार्दन जयद्रथम्

sindhusauvīrabhartāraṃ darpapūrṇaṃ manasvinam bhakṣayanti śivā gṛdhrā janārdana jayadratham

Sanskrit only: no published translation is held for this verse.

संरक्ष्यमाणं भार्याभिर् अनुरक्ताभिर् अच्युत भषन्तो व्यपकर्षन्ति गहनं निम्नम् अन्तिकात्

saṃrakṣyamāṇaṃ bhāryābhir anuraktābhir acyuta bhaṣanto vyapakarṣanti gahanaṃ nimnam antikāt

Sanskrit only: no published translation is held for this verse.

तम् एताः पर्युपासन्ते रक्षमाणा महाभुजम् सिन्धुसौवीरगान्धारकाम्बोजयवनस्त्रियः

tam etāḥ paryupāsante rakṣamāṇā mahābhujam sindhusauvīragāndhārakāmbojayavanastriyaḥ

Sanskrit only: no published translation is held for this verse.

यदा कृष्णाम् उपादाय प्राद्रवत् केकयैः सह तदैव वध्यः पाण्डूनां जनार्दन जयद्रथः

yadā kṛṣṇām upādāya prādravat kekayaiḥ saha tadaiva vadhyaḥ pāṇḍūnāṃ janārdana jayadrathaḥ

Sanskrit only: no published translation is held for this verse.

दुःशलां मानयद्भिस् तु यदा मुक्तो जयद्रथः कथम् अद्य न तां कृष्ण मानयन्ति स्म ते पुनः

duḥśalāṃ mānayadbhis tu yadā mukto jayadrathaḥ katham adya na tāṃ kṛṣṇa mānayanti sma te punaḥ

Sanskrit only: no published translation is held for this verse.

सैषा मम सुता बाला विलपन्ती सुदुःखिता प्रमापयति चात्मानम् आक्रोशति च पाण्डवान्

saiṣā mama sutā bālā vilapantī suduḥkhitā pramāpayati cātmānam ākrośati ca pāṇḍavān

Sanskrit only: no published translation is held for this verse.

किं नु दुःखतरं कृष्ण परं मम भविष्यति यत् सुता विधवा बाला स्नुषाश् च निहतेश्वराः

kiṃ nu duḥkhataraṃ kṛṣṇa paraṃ mama bhaviṣyati yat sutā vidhavā bālā snuṣāś ca nihateśvarāḥ

Sanskrit only: no published translation is held for this verse.

अहो धिग् दुःशलां पश्य वीतशोकभयाम् इव शिरो भर्तुर् अनासाद्य धावमानाम् इतस् ततः

aho dhig duḥśalāṃ paśya vītaśokabhayām iva śiro bhartur anāsādya dhāvamānām itas tataḥ

Sanskrit only: no published translation is held for this verse.

वारयाम् आस यः सर्वान् पाण्डवान् पुत्रगृद्धिनः स हत्वा विपुलाः सेनाः स्वयं मृत्युवशं गतः

vārayām āsa yaḥ sarvān pāṇḍavān putragṛddhinaḥ sa hatvā vipulāḥ senāḥ svayaṃ mṛtyuvaśaṃ gataḥ

Sanskrit only: no published translation is held for this verse.

तं मत्तम् इव मातङ्गं वीरं परमदुर्जयम् परिवार्य रुदन्त्य् एताः स्त्रियश् चन्द्रोपमाननाः

taṃ mattam iva mātaṅgaṃ vīraṃ paramadurjayam parivārya rudanty etāḥ striyaś candropamānanāḥ

Sanskrit only: no published translation is held for this verse.