Mahābhārata (critical edition) 12.100

भीष्म उवाच अत्राप्य् उदाहरन्तीमम् इतिहासं पुरातनम् प्रतर्दनो मैथिलश् च संग्रामं यत्र चक्रतुः

bhīṣma uvāca atrāpy udāharantīmam itihāsaṃ purātanam pratardano maithilaś ca saṃgrāmaṃ yatra cakratuḥ

Sanskrit only: no published translation is held for this verse.

यज्ञोपवीती संग्रामे जनको मैथिलो यथा योधान् उद्धर्षयाम् आस तन् निबोध युधिष्ठिर

yajñopavītī saṃgrāme janako maithilo yathā yodhān uddharṣayām āsa tan nibodha yudhiṣṭhira

Sanskrit only: no published translation is held for this verse.

जनको मैथिलो राजा महात्मा सर्वतत्त्ववित् योधान् स्वान् दर्शयाम् आस स्वर्गं नरकम् एव च

janako maithilo rājā mahātmā sarvatattvavit yodhān svān darśayām āsa svargaṃ narakam eva ca

Sanskrit only: no published translation is held for this verse.

अभीतानाम् इमे लोका भास्वन्तो हन्त पश्यत पूर्णा गन्धर्वकन्याभिः सर्वकामदुहो ऽक्षयाः

abhītānām ime lokā bhāsvanto hanta paśyata pūrṇā gandharvakanyābhiḥ sarvakāmaduho 'kṣayāḥ

Sanskrit only: no published translation is held for this verse.

इमे पलायमानानां नरकाः प्रत्युपस्थिताः अकीर्तिः शाश्वती चैव पतितव्यम् अनन्तरम्

ime palāyamānānāṃ narakāḥ pratyupasthitāḥ akīrtiḥ śāśvatī caiva patitavyam anantaram

Sanskrit only: no published translation is held for this verse.

तान् दृष्ट्वारीन् विजयतो भूत्वा संत्यागबुद्धयः नरकस्याप्रतिष्ठस्य मा भूत वशवर्तिनः

tān dṛṣṭvārīn vijayato bhūtvā saṃtyāgabuddhayaḥ narakasyāpratiṣṭhasya mā bhūta vaśavartinaḥ

Sanskrit only: no published translation is held for this verse.

त्यागमूलं हि शूराणां स्वर्गद्वारम् अनुत्तमम् इत्य् उक्तास् ते नृपतिना योधाः परपुरंजय

tyāgamūlaṃ hi śūrāṇāṃ svargadvāram anuttamam ity uktās te nṛpatinā yodhāḥ parapuraṃjaya

Sanskrit only: no published translation is held for this verse.

व्यजयन्त रणे शत्रून् हर्षयन्तो जनेश्वरम् तस्माद् आत्मवता नित्यं स्थातव्यं रणमूर्धनि

vyajayanta raṇe śatrūn harṣayanto janeśvaram tasmād ātmavatā nityaṃ sthātavyaṃ raṇamūrdhani

Sanskrit only: no published translation is held for this verse.

गजानां रथिनो मध्ये रथानाम् अनु सादिनः सादिनाम् अन्तरा स्थाप्यं पादातम् इह दंशितम्

gajānāṃ rathino madhye rathānām anu sādinaḥ sādinām antarā sthāpyaṃ pādātam iha daṃśitam

Sanskrit only: no published translation is held for this verse.

य एवं व्यूहते राजा स नित्यं जयते द्विषः तस्माद् एवं विधातव्यं नित्यम् एव युधिष्ठिर

ya evaṃ vyūhate rājā sa nityaṃ jayate dviṣaḥ tasmād evaṃ vidhātavyaṃ nityam eva yudhiṣṭhira

Sanskrit only: no published translation is held for this verse.

सर्वे सुकृतम् इच्छन्तः सुयुद्धेनातिमन्यवः क्षोभयेयुर् अनीकानि सागरं मकरा इव

sarve sukṛtam icchantaḥ suyuddhenātimanyavaḥ kṣobhayeyur anīkāni sāgaraṃ makarā iva

Sanskrit only: no published translation is held for this verse.

हर्षयेयुर् विषण्णांश् च व्यवस्थाप्य परस्परम् जितां च भूमिं रक्षेत भग्नान् नात्यनुसारयेत्

harṣayeyur viṣaṇṇāṃś ca vyavasthāpya parasparam jitāṃ ca bhūmiṃ rakṣeta bhagnān nātyanusārayet

Sanskrit only: no published translation is held for this verse.

पुनरावर्तमानानां निराशानां च जीविते न वेगः सुसहो राजंस् तस्मान् नात्यनुसारयेत्

punarāvartamānānāṃ nirāśānāṃ ca jīvite na vegaḥ susaho rājaṃs tasmān nātyanusārayet

Sanskrit only: no published translation is held for this verse.

न हि प्रहर्तुम् इच्छन्ति शूराः प्राद्रवतां भयात् तस्मात् पलायमानानां कुर्यान् नात्यनुसारणम्

na hi prahartum icchanti śūrāḥ prādravatāṃ bhayāt tasmāt palāyamānānāṃ kuryān nātyanusāraṇam

Sanskrit only: no published translation is held for this verse.

चराणाम् अचरा ह्य् अन्नम् अदंष्ट्रा दंष्ट्रिणाम् अपि अपाणयः पाणिमताम् अन्नं शूरस्य कातराः

carāṇām acarā hy annam adaṃṣṭrā daṃṣṭriṇām api apāṇayaḥ pāṇimatām annaṃ śūrasya kātarāḥ

Sanskrit only: no published translation is held for this verse.

समानपृष्ठोदरपाणिपादाः; पश्चाच् छूरं भीरवो ऽनुव्रजन्ति अतो भयार्ताः प्रणिपत्य भूयः; कृत्वाञ्जलीन् उपतिष्ठन्ति शूरान्

samānapṛṣṭhodarapāṇipādāḥ; paścāc chūraṃ bhīravo 'nuvrajanti ato bhayārtāḥ praṇipatya bhūyaḥ; kṛtvāñjalīn upatiṣṭhanti śūrān

Sanskrit only: no published translation is held for this verse.

शूरबाहुषु लोको ऽयं लम्बते पुत्रवत् सदा तस्मात् सर्वास्व् अवस्थासु शूरः संमानम् अर्हति

śūrabāhuṣu loko 'yaṃ lambate putravat sadā tasmāt sarvāsv avasthāsu śūraḥ saṃmānam arhati

Sanskrit only: no published translation is held for this verse.

न हि शौर्यात् परं किं चित् त्रिषु लोकेषु विद्यते शूरः सर्वं पालयति सर्वं शूरे प्रतिष्ठितम्

na hi śauryāt paraṃ kiṃ cit triṣu lokeṣu vidyate śūraḥ sarvaṃ pālayati sarvaṃ śūre pratiṣṭhitam

Sanskrit only: no published translation is held for this verse.