Library·Mahābhārata (critical edition)·12·12.13
सहदेव उवाच न बाह्यं द्रव्यम् उत्सृज्य सिद्धिर् भवति भारत शारीरं द्रव्यम् उत्सृज्य सिद्धिर् भवति वा न वा
sahadeva uvāca na bāhyaṃ dravyam utsṛjya siddhir bhavati bhārata śārīraṃ dravyam utsṛjya siddhir bhavati vā na vā
Sanskrit only: no published translation is held for this verse.
बाह्यद्रव्यविमुक्तस्य शारीरेषु च गृध्यतः यो धर्मो यत् सुखं वा स्याद् द्विषतां तत् तथास्तु नः
bāhyadravyavimuktasya śārīreṣu ca gṛdhyataḥ yo dharmo yat sukhaṃ vā syād dviṣatāṃ tat tathāstu naḥ
Sanskrit only: no published translation is held for this verse.
शारीरं द्रव्यम् उत्सृज्य पृथिवीम् अनुशासतः यो धर्मो यत् सुखं वा स्यात् सुहृदां तत् तथास्तु नः
śārīraṃ dravyam utsṛjya pṛthivīm anuśāsataḥ yo dharmo yat sukhaṃ vā syāt suhṛdāṃ tat tathāstu naḥ
Sanskrit only: no published translation is held for this verse.
द्व्यक्षरस् तु भवेन् मृत्युस् त्र्यक्षरं ब्रह्म शाश्वतम् ममेति च भवेन् मृत्युर् न ममेति च शाश्वतम्
dvyakṣaras tu bhaven mṛtyus tryakṣaraṃ brahma śāśvatam mameti ca bhaven mṛtyur na mameti ca śāśvatam
Sanskrit only: no published translation is held for this verse.
ब्रह्ममृत्यू च तौ राजन्न् आत्मन्य् एव समाश्रितौ अदृश्यमानौ भूतानि योधयेताम् असंशयम्
brahmamṛtyū ca tau rājann ātmany eva samāśritau adṛśyamānau bhūtāni yodhayetām asaṃśayam
Sanskrit only: no published translation is held for this verse.
अविनाशो ऽस्य सत्त्वस्य नियतो यदि भारत भित्त्वा शरीरं भूतानां न हिंसा प्रतिपत्स्यते
avināśo 'sya sattvasya niyato yadi bhārata bhittvā śarīraṃ bhūtānāṃ na hiṃsā pratipatsyate
Sanskrit only: no published translation is held for this verse.
अथापि च सहोत्पत्तिः सत्त्वस्य प्रलयस् तथा नष्टे शरीरे नष्टं स्याद् वृथा च स्यात् क्रियापथः
athāpi ca sahotpattiḥ sattvasya pralayas tathā naṣṭe śarīre naṣṭaṃ syād vṛthā ca syāt kriyāpathaḥ
Sanskrit only: no published translation is held for this verse.
तस्माद् एकान्तम् उत्सृज्य पूर्वैः पूर्वतरैश् च यः पन्था निषेवितः सद्भिः स निषेव्यो विजानता
tasmād ekāntam utsṛjya pūrvaiḥ pūrvataraiś ca yaḥ panthā niṣevitaḥ sadbhiḥ sa niṣevyo vijānatā
Sanskrit only: no published translation is held for this verse.
लब्ध्वापि पृथिवीं कृत्स्नां सहस्थावरजङ्गमाम् न भुङ्क्ते यो नृपः सम्यङ् निष्फलं तस्य जीवितम्
labdhvāpi pṛthivīṃ kṛtsnāṃ sahasthāvarajaṅgamām na bhuṅkte yo nṛpaḥ samyaṅ niṣphalaṃ tasya jīvitam
Sanskrit only: no published translation is held for this verse.
अथ वा वसतो राजन् वने वन्येन जीवतः द्रव्येषु यस्य ममता मृत्योर् आस्ये स वर्तते
atha vā vasato rājan vane vanyena jīvataḥ dravyeṣu yasya mamatā mṛtyor āsye sa vartate
Sanskrit only: no published translation is held for this verse.
बाह्याभ्यन्तरभूतानां स्वभावं पश्य भारत ये तु पश्यन्ति तद्भावं मुच्यन्ते महतो भयात्
bāhyābhyantarabhūtānāṃ svabhāvaṃ paśya bhārata ye tu paśyanti tadbhāvaṃ mucyante mahato bhayāt
Sanskrit only: no published translation is held for this verse.
भवान् पिता भवान् माता भवान् भ्राता भवान् गुरुः दुःखप्रलापान् आर्तस्य तस्मान् मे क्षन्तुम् अर्हसि
bhavān pitā bhavān mātā bhavān bhrātā bhavān guruḥ duḥkhapralāpān ārtasya tasmān me kṣantum arhasi
Sanskrit only: no published translation is held for this verse.
तथ्यं वा यदि वातथ्यं यन् मयैतत् प्रभाषितम् तद् विद्धि पृथिवीपाल भक्त्या भरतसत्तम
tathyaṃ vā yadi vātathyaṃ yan mayaitat prabhāṣitam tad viddhi pṛthivīpāla bhaktyā bharatasattama
Sanskrit only: no published translation is held for this verse.