Mahābhārata (critical edition) 12.143

भीष्म उवाच ततस् तं लुब्धकः पश्यन् कृपयाभिपरिप्लुतः कपोतम् अग्नौ पतितं वाक्यं पुनर् उवाच ह

bhīṣma uvāca tatas taṃ lubdhakaḥ paśyan kṛpayābhipariplutaḥ kapotam agnau patitaṃ vākyaṃ punar uvāca ha

Sanskrit only: no published translation is held for this verse.

किम् ईदृशं नृशंसेन मया कृतम् अबुद्धिना भविष्यति हि मे नित्यं पातकं हृदि जीवतः

kim īdṛśaṃ nṛśaṃsena mayā kṛtam abuddhinā bhaviṣyati hi me nityaṃ pātakaṃ hṛdi jīvataḥ

Sanskrit only: no published translation is held for this verse.

स विनिन्दन्न् अथात्मानं पुनः पुनर् उवाच ह धिङ् माम् अस्तु सुदुर्बुद्धिं सदा निकृतिनिश्चयम् शुभं कर्म परित्यज्य यो ऽहं शकुनिलुब्धकः

sa vinindann athātmānaṃ punaḥ punar uvāca ha dhiṅ mām astu sudurbuddhiṃ sadā nikṛtiniścayam śubhaṃ karma parityajya yo 'haṃ śakunilubdhakaḥ

Sanskrit only: no published translation is held for this verse.

नृशंसस्य ममाद्यायं प्रत्यादेशो न संशयः दत्तः स्वमांसं ददता कपोतेन महात्मना

nṛśaṃsasya mamādyāyaṃ pratyādeśo na saṃśayaḥ dattaḥ svamāṃsaṃ dadatā kapotena mahātmanā

Sanskrit only: no published translation is held for this verse.

सो ऽहं त्यक्ष्ये प्रियान् प्राणान् पुत्रदारं विसृज्य च उपदिष्टो हि मे धर्मः कपोतेनातिधर्मिणा

so 'haṃ tyakṣye priyān prāṇān putradāraṃ visṛjya ca upadiṣṭo hi me dharmaḥ kapotenātidharmiṇā

Sanskrit only: no published translation is held for this verse.

अद्य प्रभृति देहं स्वं सर्वभोगैर् विवर्जितम् यथा स्वल्पं जलं ग्रीष्मे शोषयिष्याम्य् अहं तथा

adya prabhṛti dehaṃ svaṃ sarvabhogair vivarjitam yathā svalpaṃ jalaṃ grīṣme śoṣayiṣyāmy ahaṃ tathā

Sanskrit only: no published translation is held for this verse.

क्षुत्पिपासातपसहः कृशो धमनिसंततः उपवासैर् बहुविधैश् चरिष्ये पारलौकिकम्

kṣutpipāsātapasahaḥ kṛśo dhamanisaṃtataḥ upavāsair bahuvidhaiś cariṣye pāralaukikam

Sanskrit only: no published translation is held for this verse.

अहो देहप्रदानेन दर्शितातिथिपूजना तस्माद् धर्मं चरिष्यामि धर्मो हि परमा गतिः दृष्टो हि धर्मो धर्मिष्ठैर् यादृशो विहगोत्तमे

aho dehapradānena darśitātithipūjanā tasmād dharmaṃ cariṣyāmi dharmo hi paramā gatiḥ dṛṣṭo hi dharmo dharmiṣṭhair yādṛśo vihagottame

Sanskrit only: no published translation is held for this verse.

एवम् उक्त्वा विनिश्चित्य रौद्रकर्मा स लुब्धकः महाप्रस्थानम् आश्रित्य प्रययौ संशितव्रतः

evam uktvā viniścitya raudrakarmā sa lubdhakaḥ mahāprasthānam āśritya prayayau saṃśitavrataḥ

Sanskrit only: no published translation is held for this verse.

ततो यष्टिं शलाकाश् च क्षारकं पञ्जरं तथा तांश् च बद्धा कपोतान् स संप्रमुच्योत्ससर्ज ह

tato yaṣṭiṃ śalākāś ca kṣārakaṃ pañjaraṃ tathā tāṃś ca baddhā kapotān sa saṃpramucyotsasarja ha

Sanskrit only: no published translation is held for this verse.