Mahābhārata (critical edition) 12.334

वैशंपायन उवाच श्रुत्वैतन् नारदो वाक्यं नरनारायणेरितम् अत्यन्तभक्तिमान् देवे एकान्तित्वम् उपेयिवान्

vaiśaṃpāyana uvāca śrutvaitan nārado vākyaṃ naranārāyaṇeritam atyantabhaktimān deve ekāntitvam upeyivān

Sanskrit only: no published translation is held for this verse.

प्रोष्य वर्षसहस्रं तु नरनारायणाश्रमे श्रुत्वा भगवदाख्यानं दृष्ट्वा च हरिम् अव्ययम् हिमवन्तं जगामाशु यत्रास्य स्वक आश्रमः

proṣya varṣasahasraṃ tu naranārāyaṇāśrame śrutvā bhagavadākhyānaṃ dṛṣṭvā ca harim avyayam himavantaṃ jagāmāśu yatrāsya svaka āśramaḥ

Sanskrit only: no published translation is held for this verse.

ताव् अपि ख्याततपसौ नरनारायणाव् ऋषी तस्मिन्न् एवाश्रमे रम्ये तेपतुस् तप उत्तमम्

tāv api khyātatapasau naranārāyaṇāv ṛṣī tasminn evāśrame ramye tepatus tapa uttamam

Sanskrit only: no published translation is held for this verse.

त्वम् अप्य् अमितविक्रान्तः पाण्डवानां कुलोद्वहः पावितात्माद्य संवृत्तः श्रुत्वेमाम् आदितः कथाम्

tvam apy amitavikrāntaḥ pāṇḍavānāṃ kulodvahaḥ pāvitātmādya saṃvṛttaḥ śrutvemām āditaḥ kathām

Sanskrit only: no published translation is held for this verse.

नैव तस्य परो लोको नायं पार्थिवसत्तम कर्मणा मनसा वाचा यो द्विष्याद् विष्णुम् अव्ययम्

naiva tasya paro loko nāyaṃ pārthivasattama karmaṇā manasā vācā yo dviṣyād viṣṇum avyayam

Sanskrit only: no published translation is held for this verse.

मज्जन्ति पितरस् तस्य नरके शाश्वतीः समाः यो द्विष्याद् विबुधश्रेष्ठं देवं नारायणं हरिम्

majjanti pitaras tasya narake śāśvatīḥ samāḥ yo dviṣyād vibudhaśreṣṭhaṃ devaṃ nārāyaṇaṃ harim

Sanskrit only: no published translation is held for this verse.

कथं नाम भवेद् द्वेष्य आत्मा लोकस्य कस्य चित् आत्मा हि पुरुषव्याघ्र ज्ञेयो विष्णुर् इति स्थितिः

kathaṃ nāma bhaved dveṣya ātmā lokasya kasya cit ātmā hi puruṣavyāghra jñeyo viṣṇur iti sthitiḥ

Sanskrit only: no published translation is held for this verse.

य एष गुरुर् अस्माकम् ऋषिर् गन्धवतीसुतः तेनैतत् कथितं तात माहात्म्यं परमात्मनः तस्माच् छ्रुतं मया चेदं कथितं च तवानघ

ya eṣa gurur asmākam ṛṣir gandhavatīsutaḥ tenaitat kathitaṃ tāta māhātmyaṃ paramātmanaḥ tasmāc chrutaṃ mayā cedaṃ kathitaṃ ca tavānagha

Sanskrit only: no published translation is held for this verse.

कृष्णद्वैपायनं व्यासं विद्धि नारायणं प्रभुम् को ह्य् अन्यः पुरुषव्याघ्र महाभारतकृद् भवेत् धर्मान् नानाविधांश् चैव को ब्रूयात् तम् ऋते प्रभुम्

kṛṣṇadvaipāyanaṃ vyāsaṃ viddhi nārāyaṇaṃ prabhum ko hy anyaḥ puruṣavyāghra mahābhāratakṛd bhavet dharmān nānāvidhāṃś caiva ko brūyāt tam ṛte prabhum

Sanskrit only: no published translation is held for this verse.

वर्ततां ते महायज्ञो यथा संकल्पितस् त्वया संकल्पिताश्वमेधस् त्वं श्रुतधर्मश् च तत्त्वतः

vartatāṃ te mahāyajño yathā saṃkalpitas tvayā saṃkalpitāśvamedhas tvaṃ śrutadharmaś ca tattvataḥ

Sanskrit only: no published translation is held for this verse.

एतत् तु महद् आख्यानं श्रुत्वा पारिक्षितो नृपः ततो यज्ञसमाप्त्यर्थं क्रियाः सर्वाः समारभत्

etat tu mahad ākhyānaṃ śrutvā pārikṣito nṛpaḥ tato yajñasamāptyarthaṃ kriyāḥ sarvāḥ samārabhat

Sanskrit only: no published translation is held for this verse.

नारायणीयम् आख्यानम् एतत् ते कथितं मया नारदेन पुरा राजन् गुरवे मे निवेदितम् ऋषीणां पाण्डवानां च शृण्वतोः कृष्णभीष्मयोः

nārāyaṇīyam ākhyānam etat te kathitaṃ mayā nāradena purā rājan gurave me niveditam ṛṣīṇāṃ pāṇḍavānāṃ ca śṛṇvatoḥ kṛṣṇabhīṣmayoḥ

Sanskrit only: no published translation is held for this verse.

स हि परमगुरुर् भुवनपतिर्; धरणिधरः शमनियमनिधिः श्रुतिविनयनिधिर् द्विजपरमहितस्; तव भवतु गतिर् हरिर् अमरहितः

sa hi paramagurur bhuvanapatir; dharaṇidharaḥ śamaniyamanidhiḥ śrutivinayanidhir dvijaparamahitas; tava bhavatu gatir harir amarahitaḥ

Sanskrit only: no published translation is held for this verse.

तपसां निधिः सुमहतां महतो; यशसश् च भाजनम् अरिष्टकहा एकान्तिनां शरणदो ऽभयदो; गतिदो ऽस्तु वः स मखभागहरः

tapasāṃ nidhiḥ sumahatāṃ mahato; yaśasaś ca bhājanam ariṣṭakahā ekāntināṃ śaraṇado 'bhayado; gatido 'stu vaḥ sa makhabhāgaharaḥ

Sanskrit only: no published translation is held for this verse.

त्रिगुणातिगश् चतुष्पञ्चधरः; पूर्तेष्टयोश् च फलभागहरः विदधाति नित्यम् अजितो ऽतिबलो; गतिम् आत्मगां सुकृतिनाम् ऋषिणाम्

triguṇātigaś catuṣpañcadharaḥ; pūrteṣṭayoś ca phalabhāgaharaḥ vidadhāti nityam ajito 'tibalo; gatim ātmagāṃ sukṛtinām ṛṣiṇām

Sanskrit only: no published translation is held for this verse.

तं लोकसाक्षिणम् अजं पुरुषं; रविवर्णम् ईश्वरगतिं बहुशः प्रणमध्वम् एकमतयो यतयः; सलिलोद्भवो ऽपि तम् ऋषिं प्रणतः

taṃ lokasākṣiṇam ajaṃ puruṣaṃ; ravivarṇam īśvaragatiṃ bahuśaḥ praṇamadhvam ekamatayo yatayaḥ; salilodbhavo 'pi tam ṛṣiṃ praṇataḥ

Sanskrit only: no published translation is held for this verse.

स हि लोकयोनिर् अमृतस्य पदं; सूक्ष्मं पुराणम् अचलं परमम् तत् सांख्ययोगिभिर् उदारधृतं; बुद्ध्या यतात्मभिर् विदितं सततम्

sa hi lokayonir amṛtasya padaṃ; sūkṣmaṃ purāṇam acalaṃ paramam tat sāṃkhyayogibhir udāradhṛtaṃ; buddhyā yatātmabhir viditaṃ satatam

Sanskrit only: no published translation is held for this verse.