Mahābhārata (critical edition) 12.345

भीष्म उवाच स वनानि विचित्राणि तीर्थानि च सरांसि च अभिगच्छन् क्रमेण स्म कं चिन् मुनिम् उपस्थितः

bhīṣma uvāca sa vanāni vicitrāṇi tīrthāni ca sarāṃsi ca abhigacchan krameṇa sma kaṃ cin munim upasthitaḥ

Sanskrit only: no published translation is held for this verse.

तं स तेन यथोद्दिष्टं नागं विप्रेण ब्राह्मणः पर्यपृच्छद् यथान्यायं श्रुत्वैव च जगाम सः

taṃ sa tena yathoddiṣṭaṃ nāgaṃ vipreṇa brāhmaṇaḥ paryapṛcchad yathānyāyaṃ śrutvaiva ca jagāma saḥ

Sanskrit only: no published translation is held for this verse.

सो ऽभिगम्य यथाख्यातं नागायतनम् अर्थवित् प्रोक्तवान् अहम् अस्मीति भोःशब्दालंकृतं वचः

so 'bhigamya yathākhyātaṃ nāgāyatanam arthavit proktavān aham asmīti bhoḥśabdālaṃkṛtaṃ vacaḥ

Sanskrit only: no published translation is held for this verse.

ततस् तस्य वचः श्रुत्वा रूपिणी धर्मवत्सला दर्शयाम् आस तं विप्रं नागपत्नी पतिव्रता

tatas tasya vacaḥ śrutvā rūpiṇī dharmavatsalā darśayām āsa taṃ vipraṃ nāgapatnī pativratā

Sanskrit only: no published translation is held for this verse.

सा तस्मै विधिवत् पूजां चक्रे धर्मपरायणा स्वागतेनागतं कृत्वा किं करोमीति चाब्रवीत्

sā tasmai vidhivat pūjāṃ cakre dharmaparāyaṇā svāgatenāgataṃ kṛtvā kiṃ karomīti cābravīt

Sanskrit only: no published translation is held for this verse.

ब्राह्मण उवाच विश्रान्तो ऽभ्यर्चितश् चास्मि भवत्या श्लक्ष्णया गिरा द्रष्टुम् इच्छामि भवति तं देवं नागम् उत्तमम्

brāhmaṇa uvāca viśrānto 'bhyarcitaś cāsmi bhavatyā ślakṣṇayā girā draṣṭum icchāmi bhavati taṃ devaṃ nāgam uttamam

Sanskrit only: no published translation is held for this verse.

एतद् धि परमं कार्यम् एतन् मे फलम् ईप्सितम् अनेनार्थेन चास्म्य् अद्य संप्राप्तः पन्नगालयम्

etad dhi paramaṃ kāryam etan me phalam īpsitam anenārthena cāsmy adya saṃprāptaḥ pannagālayam

Sanskrit only: no published translation is held for this verse.

नागभार्योवाच आर्य सूर्यरथं वोढुं गतो ऽसौ मासचारिकः सप्ताष्टभिर् दिनैर् विप्र दर्शयिष्यत्य् असंशयम्

nāgabhāryovāca ārya sūryarathaṃ voḍhuṃ gato 'sau māsacārikaḥ saptāṣṭabhir dinair vipra darśayiṣyaty asaṃśayam

Sanskrit only: no published translation is held for this verse.

एतद् विदितम् आर्यस्य विवासकरणं मम भर्तुर् भवतु किं चान्यत् क्रियतां तद् वदस्व मे

etad viditam āryasya vivāsakaraṇaṃ mama bhartur bhavatu kiṃ cānyat kriyatāṃ tad vadasva me

Sanskrit only: no published translation is held for this verse.

ब्राह्मण उवाच अनेन निश्चयेनाहं साध्वि संप्राप्तवान् इह प्रतीक्षन्न् आगमं देवि वत्स्याम्य् अस्मिन् महावने

brāhmaṇa uvāca anena niścayenāhaṃ sādhvi saṃprāptavān iha pratīkṣann āgamaṃ devi vatsyāmy asmin mahāvane

Sanskrit only: no published translation is held for this verse.

संप्राप्तस्यैव चाव्यग्रम् आवेद्यो ऽहम् इहागतः ममाभिगमनं प्राप्तो वाच्यश् च वचनं त्वया

saṃprāptasyaiva cāvyagram āvedyo 'ham ihāgataḥ mamābhigamanaṃ prāpto vācyaś ca vacanaṃ tvayā

Sanskrit only: no published translation is held for this verse.

अहम् अप्य् अत्र वत्स्यामि गोमत्याः पुलिने शुभे कालं परिमिताहारो यथोक्तं परिपालयन्

aham apy atra vatsyāmi gomatyāḥ puline śubhe kālaṃ parimitāhāro yathoktaṃ paripālayan

Sanskrit only: no published translation is held for this verse.

भीष्म उवाच ततः स विप्रस् तां नागीं समाधाय पुनः पुनः तद् एव पुलिनं नद्याः प्रययौ ब्राह्मणर्षभः

bhīṣma uvāca tataḥ sa vipras tāṃ nāgīṃ samādhāya punaḥ punaḥ tad eva pulinaṃ nadyāḥ prayayau brāhmaṇarṣabhaḥ

Sanskrit only: no published translation is held for this verse.