Mahābhārata (critical edition) 12.346

भीष्म उवाच अथ तेन नरश्रेष्ठ ब्राह्मणेन तपस्विना निराहारेण वसता दुःखितास् ते भुजंगमाः

bhīṣma uvāca atha tena naraśreṣṭha brāhmaṇena tapasvinā nirāhāreṇa vasatā duḥkhitās te bhujaṃgamāḥ

Sanskrit only: no published translation is held for this verse.

सर्वे संभूय सहितास् तस्य नागस्य बान्धवाः भ्रातरस् तनया भार्या ययुस् तं ब्राह्मणं प्रति

sarve saṃbhūya sahitās tasya nāgasya bāndhavāḥ bhrātaras tanayā bhāryā yayus taṃ brāhmaṇaṃ prati

Sanskrit only: no published translation is held for this verse.

ते ऽपश्यन् पुलिने तं वै विविक्ते नियतव्रतम् समासीनं निराहारं द्विजं जप्यपरायणम्

te 'paśyan puline taṃ vai vivikte niyatavratam samāsīnaṃ nirāhāraṃ dvijaṃ japyaparāyaṇam

Sanskrit only: no published translation is held for this verse.

ते सर्वे समभिक्रम्य विप्रम् अभ्यर्च्य चासकृत् ऊचुर् वाक्यम् असंदिग्धम् आतिथेयस्य बान्धवाः

te sarve samabhikramya vipram abhyarcya cāsakṛt ūcur vākyam asaṃdigdham ātitheyasya bāndhavāḥ

Sanskrit only: no published translation is held for this verse.

षष्ठो हि दिवसस् ते ऽद्य प्राप्तस्येह तपोधन न चाभिलषसे किं चिद् आहारं धर्मवत्सल

ṣaṣṭho hi divasas te 'dya prāptasyeha tapodhana na cābhilaṣase kiṃ cid āhāraṃ dharmavatsala

Sanskrit only: no published translation is held for this verse.

अस्मान् अभिगतश् चासि वयं च त्वाम् उपस्थिताः कार्यं चातिथ्यम् अस्माभिर् वयं सर्वे कुटुम्बिनः

asmān abhigataś cāsi vayaṃ ca tvām upasthitāḥ kāryaṃ cātithyam asmābhir vayaṃ sarve kuṭumbinaḥ

Sanskrit only: no published translation is held for this verse.

मूलं फलं वा पर्णं वा पयो वा द्विजसत्तम आहारहेतोर् अन्नं वा भोक्तुम् अर्हसि ब्राह्मण

mūlaṃ phalaṃ vā parṇaṃ vā payo vā dvijasattama āhārahetor annaṃ vā bhoktum arhasi brāhmaṇa

Sanskrit only: no published translation is held for this verse.

त्यक्ताहारेण भवता वने निवसता सता बालवृद्धम् इदं सर्वं पीड्यते धर्मसंकटात्

tyaktāhāreṇa bhavatā vane nivasatā satā bālavṛddham idaṃ sarvaṃ pīḍyate dharmasaṃkaṭāt

Sanskrit only: no published translation is held for this verse.

न हि नो भ्रूणहा कश् चिद् राजापथ्यो ऽनृतो ऽपि वा पूर्वाशी वा कुले ह्य् अस्मिन् देवतातिथिबन्धुषु

na hi no bhrūṇahā kaś cid rājāpathyo 'nṛto 'pi vā pūrvāśī vā kule hy asmin devatātithibandhuṣu

Sanskrit only: no published translation is held for this verse.

ब्राह्मण उवाच उपदेशेन युष्माकम् आहारो ऽयं मया वृतः द्विरूनं दशरात्रं वै नागस्यागमनं प्रति

brāhmaṇa uvāca upadeśena yuṣmākam āhāro 'yaṃ mayā vṛtaḥ dvirūnaṃ daśarātraṃ vai nāgasyāgamanaṃ prati

Sanskrit only: no published translation is held for this verse.

यद्य् अष्टरात्रे निर्याते नागमिष्यति पन्नगः तदाहारं करिष्यामि तन्निमित्तम् इदं व्रतम्

yady aṣṭarātre niryāte nāgamiṣyati pannagaḥ tadāhāraṃ kariṣyāmi tannimittam idaṃ vratam

Sanskrit only: no published translation is held for this verse.

कर्तव्यो न च संतापो गम्यतां च यथागतम् तन्निमित्तं व्रतं मह्यं नैतद् भेत्तुम् इहार्हथ

kartavyo na ca saṃtāpo gamyatāṃ ca yathāgatam tannimittaṃ vrataṃ mahyaṃ naitad bhettum ihārhatha

Sanskrit only: no published translation is held for this verse.

भीष्म उवाच तेन ते समनुज्ञाता ब्राह्मणेन भुजंगमाः स्वम् एव भवनं जग्मुर् अकृतार्था नरर्षभ

bhīṣma uvāca tena te samanujñātā brāhmaṇena bhujaṃgamāḥ svam eva bhavanaṃ jagmur akṛtārthā nararṣabha

Sanskrit only: no published translation is held for this verse.