Mahābhārata (critical edition) 12.348

नाग उवाच अथ ब्राह्मणरूपेण कं तं समनुपश्यसि मानुषं केवलं विप्रं देवं वाथ शुचिस्मिते

nāga uvāca atha brāhmaṇarūpeṇa kaṃ taṃ samanupaśyasi mānuṣaṃ kevalaṃ vipraṃ devaṃ vātha śucismite

Sanskrit only: no published translation is held for this verse.

को हि मां मानुषः शक्तो द्रष्टुकामो यशस्विनि संदर्शनरुचिर् वाक्यम् आज्ञापूर्वं वदिष्यति

ko hi māṃ mānuṣaḥ śakto draṣṭukāmo yaśasvini saṃdarśanarucir vākyam ājñāpūrvaṃ vadiṣyati

Sanskrit only: no published translation is held for this verse.

सुरासुरगणानां च देवर्षीणां च भामिनि ननु नागा महावीर्याः सौरसेयास् तरस्विनः

surāsuragaṇānāṃ ca devarṣīṇāṃ ca bhāmini nanu nāgā mahāvīryāḥ sauraseyās tarasvinaḥ

Sanskrit only: no published translation is held for this verse.

वन्दनीयाश् च वरदा वयम् अप्य् अनुयायिनः मनुष्याणां विशेषेण धनाध्यक्षा इति श्रुतिः

vandanīyāś ca varadā vayam apy anuyāyinaḥ manuṣyāṇāṃ viśeṣeṇa dhanādhyakṣā iti śrutiḥ

Sanskrit only: no published translation is held for this verse.

नागभार्योवाच आर्जवेनाभिजानामि नासौ देवो ऽनिलाशन एकं त्व् अस्य विजानामि भक्तिमान् अतिरोषणः

nāgabhāryovāca ārjavenābhijānāmi nāsau devo 'nilāśana ekaṃ tv asya vijānāmi bhaktimān atiroṣaṇaḥ

Sanskrit only: no published translation is held for this verse.

स हि कार्यान्तराकाङ्क्षी जलेप्सुः स्तोकको यथा वर्षं वर्षप्रियः पक्षी दर्शनं तव काङ्क्षति

sa hi kāryāntarākāṅkṣī jalepsuḥ stokako yathā varṣaṃ varṣapriyaḥ pakṣī darśanaṃ tava kāṅkṣati

Sanskrit only: no published translation is held for this verse.

न हि त्वा दैवतं किं चिद् विविग्नं प्रतिपालयेत् तुल्ये ह्य् अभिजने जातो न कश् चित् पर्युपासते

na hi tvā daivataṃ kiṃ cid vivignaṃ pratipālayet tulye hy abhijane jāto na kaś cit paryupāsate

Sanskrit only: no published translation is held for this verse.

तद् रोषं सहजं त्यक्त्वा त्वम् एनं द्रष्टुम् अर्हसि आशाछेदेन तस्याद्य नात्मानं दग्धुम् अर्हसि

tad roṣaṃ sahajaṃ tyaktvā tvam enaṃ draṣṭum arhasi āśāchedena tasyādya nātmānaṃ dagdhum arhasi

Sanskrit only: no published translation is held for this verse.

आशया त्व् अभिपन्नानाम् अकृत्वाश्रुप्रमार्जनम् राजा वा राजपुत्रो वा भ्रूणहत्यैव युज्यते

āśayā tv abhipannānām akṛtvāśrupramārjanam rājā vā rājaputro vā bhrūṇahatyaiva yujyate

Sanskrit only: no published translation is held for this verse.

मौनाज् ज्ञानफलावाप्तिर् दानेन च यशो महत् वाग्मित्वं सत्यवाक्येन परत्र च महीयते

maunāj jñānaphalāvāptir dānena ca yaśo mahat vāgmitvaṃ satyavākyena paratra ca mahīyate

Sanskrit only: no published translation is held for this verse.

भूमिप्रदानेन गतिं लभत्य् आश्रमसंमिताम् नष्टस्यार्थस्य संप्राप्तिं कृत्वा फलम् उपाश्नुते

bhūmipradānena gatiṃ labhaty āśramasaṃmitām naṣṭasyārthasya saṃprāptiṃ kṛtvā phalam upāśnute

Sanskrit only: no published translation is held for this verse.

अभिप्रेताम् असंक्लिष्टां कृत्वाकामवतीं क्रियाम् न याति निरयं कश् चिद् इति धर्मविदो विदुः

abhipretām asaṃkliṣṭāṃ kṛtvākāmavatīṃ kriyām na yāti nirayaṃ kaś cid iti dharmavido viduḥ

Sanskrit only: no published translation is held for this verse.

नाग उवाच अभिमानेन मानो मे जातिदोषेण वै महान् रोषः संकल्पजः साध्वि दग्धो वाचाग्निना त्वया

nāga uvāca abhimānena māno me jātidoṣeṇa vai mahān roṣaḥ saṃkalpajaḥ sādhvi dagdho vācāgninā tvayā

Sanskrit only: no published translation is held for this verse.

न च रोषाद् अहं साध्वि पश्येयम् अधिकं तमः यस्य वक्तव्यतां यान्ति विशेषेण भुजंगमाः

na ca roṣād ahaṃ sādhvi paśyeyam adhikaṃ tamaḥ yasya vaktavyatāṃ yānti viśeṣeṇa bhujaṃgamāḥ

Sanskrit only: no published translation is held for this verse.

दोषस्य हि वशं गत्वा दशग्रीवः प्रतापवान् तथा शक्रप्रतिस्पर्धी हतो रामेण संयुगे

doṣasya hi vaśaṃ gatvā daśagrīvaḥ pratāpavān tathā śakrapratispardhī hato rāmeṇa saṃyuge

Sanskrit only: no published translation is held for this verse.

अन्तःपुरगतं वत्सं श्रुत्वा रामेण निर्हृतम् धर्षणाद् रोषसंविग्नाः कार्तवीर्यसुता हताः

antaḥpuragataṃ vatsaṃ śrutvā rāmeṇa nirhṛtam dharṣaṇād roṣasaṃvignāḥ kārtavīryasutā hatāḥ

Sanskrit only: no published translation is held for this verse.

जामदग्न्येन रामेण सहस्रनयनोपमः संयुगे निहतो रोषात् कार्तवीर्यो महाबलः

jāmadagnyena rāmeṇa sahasranayanopamaḥ saṃyuge nihato roṣāt kārtavīryo mahābalaḥ

Sanskrit only: no published translation is held for this verse.

तद् एष तपसां शत्रुः श्रेयसश् च निपातनः निगृहीतो मया रोषः श्रुत्वैव वचनं तव

tad eṣa tapasāṃ śatruḥ śreyasaś ca nipātanaḥ nigṛhīto mayā roṣaḥ śrutvaiva vacanaṃ tava

Sanskrit only: no published translation is held for this verse.

आत्मानं च विशेषेण प्रशंसाम्य् अनपायिनि यस्य मे त्वं विशालाक्षि भार्या सर्वगुणान्विता

ātmānaṃ ca viśeṣeṇa praśaṃsāmy anapāyini yasya me tvaṃ viśālākṣi bhāryā sarvaguṇānvitā

Sanskrit only: no published translation is held for this verse.

एष तत्रैव गच्छामि यत्र तिष्ठत्य् असौ द्विजः सर्वथा चोक्तवान् वाक्यं नाकृतार्थः प्रयास्यति

eṣa tatraiva gacchāmi yatra tiṣṭhaty asau dvijaḥ sarvathā coktavān vākyaṃ nākṛtārthaḥ prayāsyati

Sanskrit only: no published translation is held for this verse.