Mahābhārata (critical edition) 12.44

वैशंपायन उवाच ततो विसर्जयाम् आस सर्वाः प्रकृतयो नृपः विविशुश् चाभ्यनुज्ञाता यथास्वानि गृहाणि च

vaiśaṃpāyana uvāca tato visarjayām āsa sarvāḥ prakṛtayo nṛpaḥ viviśuś cābhyanujñātā yathāsvāni gṛhāṇi ca

Sanskrit only: no published translation is held for this verse.

ततो युधिष्ठिरो राजा भीमं भीमपराक्रमम् सान्त्वयन्न् अब्रवीद् धीमान् अर्जुनं यमजौ तथा

tato yudhiṣṭhiro rājā bhīmaṃ bhīmaparākramam sāntvayann abravīd dhīmān arjunaṃ yamajau tathā

Sanskrit only: no published translation is held for this verse.

शत्रुभिर् विविधैः शस्त्रैः कृत्तदेहा महारणे श्रान्ता भवन्तः सुभृशं तापिताः शोकमन्युभिः

śatrubhir vividhaiḥ śastraiḥ kṛttadehā mahāraṇe śrāntā bhavantaḥ subhṛśaṃ tāpitāḥ śokamanyubhiḥ

Sanskrit only: no published translation is held for this verse.

अरण्ये दुःखवसतीर् मत्कृते पुरुषोत्तमाः भवद्भिर् अनुभूताश् च यथा कुपुरुषैस् तथा

araṇye duḥkhavasatīr matkṛte puruṣottamāḥ bhavadbhir anubhūtāś ca yathā kupuruṣais tathā

Sanskrit only: no published translation is held for this verse.

यथासुखं यथाजोषं जयो ऽयम् अनुभूयताम् विश्रान्तांल् लब्धविज्ञानाञ् श्वः समेतास्मि वः पुनः

yathāsukhaṃ yathājoṣaṃ jayo 'yam anubhūyatām viśrāntāṃl labdhavijñānāñ śvaḥ sametāsmi vaḥ punaḥ

Sanskrit only: no published translation is held for this verse.

ततो दुर्योधनगृहं प्रासादैर् उपशोभितम् बहुरत्नसमाकीर्णं दासीदाससमाकुलम्

tato duryodhanagṛhaṃ prāsādair upaśobhitam bahuratnasamākīrṇaṃ dāsīdāsasamākulam

Sanskrit only: no published translation is held for this verse.

धृतराष्ट्राभ्यनुज्ञातं भ्रात्रा दत्तं वृकोदरः प्रतिपेदे महाबाहुर् मन्दरं मघवान् इव

dhṛtarāṣṭrābhyanujñātaṃ bhrātrā dattaṃ vṛkodaraḥ pratipede mahābāhur mandaraṃ maghavān iva

Sanskrit only: no published translation is held for this verse.

यथा दुर्योधनगृहं तथा दुःशासनस्य च प्रासादमालासंयुक्तं हेमतोरणभूषितम्

yathā duryodhanagṛhaṃ tathā duḥśāsanasya ca prāsādamālāsaṃyuktaṃ hematoraṇabhūṣitam

Sanskrit only: no published translation is held for this verse.

दासीदाससुसंपूर्णं प्रभूतधनधान्यवत् प्रतिपेदे महाबाहुर् अर्जुनो राजशासनात्

dāsīdāsasusaṃpūrṇaṃ prabhūtadhanadhānyavat pratipede mahābāhur arjuno rājaśāsanāt

Sanskrit only: no published translation is held for this verse.

दुर्मर्षणस्य भवनं दुःशासनगृहाद् वरम् कुबेरभवनप्रख्यं मणिहेमविभूषितम्

durmarṣaṇasya bhavanaṃ duḥśāsanagṛhād varam kuberabhavanaprakhyaṃ maṇihemavibhūṣitam

Sanskrit only: no published translation is held for this verse.

नकुलाय वरार्हाय कर्शिताय महावने ददौ प्रीतो महाराज धर्मराजो युधिष्ठिरः

nakulāya varārhāya karśitāya mahāvane dadau prīto mahārāja dharmarājo yudhiṣṭhiraḥ

Sanskrit only: no published translation is held for this verse.

दुर्मुखस्य च वेश्माग्र्यं श्रीमत् कनकभूषितम् पूर्णं पद्मदलाक्षीणां स्त्रीणां शयनसंकुलम्

durmukhasya ca veśmāgryaṃ śrīmat kanakabhūṣitam pūrṇaṃ padmadalākṣīṇāṃ strīṇāṃ śayanasaṃkulam

Sanskrit only: no published translation is held for this verse.

प्रददौ सहदेवाय सततं प्रियकारिणे मुमुदे तच् च लब्ध्वा स कैलासं धनदो यथा

pradadau sahadevāya satataṃ priyakāriṇe mumude tac ca labdhvā sa kailāsaṃ dhanado yathā

Sanskrit only: no published translation is held for this verse.

युयुत्सुर् विदुरश् चैव संजयश् च महाद्युतिः सुधर्मा चैव धौम्यश् च यथास्वं जग्मुर् आलयान्

yuyutsur viduraś caiva saṃjayaś ca mahādyutiḥ sudharmā caiva dhaumyaś ca yathāsvaṃ jagmur ālayān

Sanskrit only: no published translation is held for this verse.

सह सात्यकिना शौरिर् अर्जुनस्य निवेशनम् विवेश पुरुषव्याघ्रो व्याघ्रो गिरिगुहाम् इव

saha sātyakinā śaurir arjunasya niveśanam viveśa puruṣavyāghro vyāghro giriguhām iva

Sanskrit only: no published translation is held for this verse.

तत्र भक्षान्नपानैस् ते समुपेताः सुखोषिताः सुखप्रबुद्धा राजानम् उपतस्थुर् युधिष्ठिरम्

tatra bhakṣānnapānais te samupetāḥ sukhoṣitāḥ sukhaprabuddhā rājānam upatasthur yudhiṣṭhiram

Sanskrit only: no published translation is held for this verse.