Library·Mahābhārata (critical edition)·12·12.6
वैशंपायन उवाच एतावद् उक्त्वा देवर्षिर् विरराम स नारदः युधिष्ठिरस् तु राजर्षिर् दध्यौ शोकपरिप्लुतः
vaiśaṃpāyana uvāca etāvad uktvā devarṣir virarāma sa nāradaḥ yudhiṣṭhiras tu rājarṣir dadhyau śokapariplutaḥ
Sanskrit only: no published translation is held for this verse.
तं दीनमनसं वीरम् अधोवदनम् आतुरम् निःश्वसन्तं यथा नागं पर्यश्रुनयनं तथा
taṃ dīnamanasaṃ vīram adhovadanam āturam niḥśvasantaṃ yathā nāgaṃ paryaśrunayanaṃ tathā
Sanskrit only: no published translation is held for this verse.
कुन्ती शोकपरीताङ्गी दुःखोपहतचेतना अब्रवीन् मधुराभाषा काले वचनम् अर्थवत्
kuntī śokaparītāṅgī duḥkhopahatacetanā abravīn madhurābhāṣā kāle vacanam arthavat
Sanskrit only: no published translation is held for this verse.
युधिष्ठिर महाबाहो नैनं शोचितुम् अर्हसि जहि शोकं महाप्राज्ञ शृणु चेदं वचो मम
yudhiṣṭhira mahābāho nainaṃ śocitum arhasi jahi śokaṃ mahāprājña śṛṇu cedaṃ vaco mama
Sanskrit only: no published translation is held for this verse.
यतितः स मया पूर्वं भ्रात्र्यं ज्ञापयितुं तव भास्करेण च देवेन पित्रा धर्मभृतां वर
yatitaḥ sa mayā pūrvaṃ bhrātryaṃ jñāpayituṃ tava bhāskareṇa ca devena pitrā dharmabhṛtāṃ vara
Sanskrit only: no published translation is held for this verse.
यद् वाच्यं हितकामेन सुहृदा भूतिम् इच्छता तथा दिवाकरेणोक्तः स्वप्नान्ते मम चाग्रतः
yad vācyaṃ hitakāmena suhṛdā bhūtim icchatā tathā divākareṇoktaḥ svapnānte mama cāgrataḥ
Sanskrit only: no published translation is held for this verse.
न चैनम् अशकद् भानुर् अहं वा स्नेहकारणैः पुरा प्रत्यनुनेतुं वा नेतुं वाप्य् एकतां त्वया
na cainam aśakad bhānur ahaṃ vā snehakāraṇaiḥ purā pratyanunetuṃ vā netuṃ vāpy ekatāṃ tvayā
Sanskrit only: no published translation is held for this verse.
ततः कालपरीतः स वैरस्योद्धुक्षणे रतः प्रतीपकारी युष्माकम् इति चोपेक्षितो मया
tataḥ kālaparītaḥ sa vairasyoddhukṣaṇe rataḥ pratīpakārī yuṣmākam iti copekṣito mayā
Sanskrit only: no published translation is held for this verse.
इत्य् उक्तो धर्मराजस् तु मात्रा बाष्पाकुलेक्षणः उवाच वाक्यं धर्मात्मा शोकव्याकुलचेतनः
ity ukto dharmarājas tu mātrā bāṣpākulekṣaṇaḥ uvāca vākyaṃ dharmātmā śokavyākulacetanaḥ
Sanskrit only: no published translation is held for this verse.
भवत्या गूढमन्त्रत्वात् पीडितो ऽस्मीत्य् उवाच ताम् शशाप च महातेजाः सर्वलोकेषु च स्त्रियः न गुह्यं धारयिष्यन्तीत्य् अतिदुःखसमन्वितः
bhavatyā gūḍhamantratvāt pīḍito 'smīty uvāca tām śaśāpa ca mahātejāḥ sarvalokeṣu ca striyaḥ na guhyaṃ dhārayiṣyantīty atiduḥkhasamanvitaḥ
Sanskrit only: no published translation is held for this verse.
स राजा पुत्रपौत्राणां संबन्धिसुहृदां तथा स्मरन्न् उद्विग्नहृदयो बभूवास्वस्थचेतनः
sa rājā putrapautrāṇāṃ saṃbandhisuhṛdāṃ tathā smarann udvignahṛdayo babhūvāsvasthacetanaḥ
Sanskrit only: no published translation is held for this verse.
ततः शोकपरीतात्मा सधूम इव पावकः निर्वेदम् अकरोद् धीमान् राजा संतापपीडितः
tataḥ śokaparītātmā sadhūma iva pāvakaḥ nirvedam akarod dhīmān rājā saṃtāpapīḍitaḥ
Sanskrit only: no published translation is held for this verse.