Library·Mahābhārata (critical edition)·13·13.124
युधिष्ठिर उवाच सत्स्त्रीणां समुदाचारं सर्वधर्मभृतां वर श्रोतुम् इच्छाम्य् अहं त्वत्तस् तं मे ब्रूहि पितामह
yudhiṣṭhira uvāca satstrīṇāṃ samudācāraṃ sarvadharmabhṛtāṃ vara śrotum icchāmy ahaṃ tvattas taṃ me brūhi pitāmaha
Sanskrit only: no published translation is held for this verse.
भीष्म उवाच सर्वज्ञां सर्वधर्मज्ञां देवलोके मनस्विनीम् कैकेयी सुमना नाम शाण्डिलीं पर्यपृच्छत
bhīṣma uvāca sarvajñāṃ sarvadharmajñāṃ devaloke manasvinīm kaikeyī sumanā nāma śāṇḍilīṃ paryapṛcchata
Sanskrit only: no published translation is held for this verse.
केन वृत्तेन कल्याणि समाचारेण केन वा विधूय सर्वपापानि देवलोकं त्वम् आगता
kena vṛttena kalyāṇi samācāreṇa kena vā vidhūya sarvapāpāni devalokaṃ tvam āgatā
Sanskrit only: no published translation is held for this verse.
हुताशनशिखेव त्वं ज्वलमाना स्वतेजसा सुता ताराधिपस्येव प्रभया दिवम् आगता
hutāśanaśikheva tvaṃ jvalamānā svatejasā sutā tārādhipasyeva prabhayā divam āgatā
Sanskrit only: no published translation is held for this verse.
अरजांसि च वस्त्राणि धारयन्ती गतक्लमा विमानस्था शुभे भासि सहस्रगुणम् ओजसा
arajāṃsi ca vastrāṇi dhārayantī gataklamā vimānasthā śubhe bhāsi sahasraguṇam ojasā
Sanskrit only: no published translation is held for this verse.
न त्वम् अल्पेन तपसा दानेन नियमेन वा इमं लोकम् अनुप्राप्ता तस्मात् तत्त्वं वदस्व मे
na tvam alpena tapasā dānena niyamena vā imaṃ lokam anuprāptā tasmāt tattvaṃ vadasva me
Sanskrit only: no published translation is held for this verse.
इति पृष्टा सुमनया मधुरं चारुहासिनी शाण्डिली निभृतं वाक्यं सुमनाम् इदम् अब्रवीत्
iti pṛṣṭā sumanayā madhuraṃ cāruhāsinī śāṇḍilī nibhṛtaṃ vākyaṃ sumanām idam abravīt
Sanskrit only: no published translation is held for this verse.
नाहं काषायवसना नापि वल्कलधारिणी न च मुण्डा न जटिला भूत्वा देवत्वम् आगता
nāhaṃ kāṣāyavasanā nāpi valkaladhāriṇī na ca muṇḍā na jaṭilā bhūtvā devatvam āgatā
Sanskrit only: no published translation is held for this verse.
अहितानि च वाक्यानि सर्वाणि परुषाणि च अप्रमत्ता च भर्तारं कदा चिन् नाहम् अब्रुवम्
ahitāni ca vākyāni sarvāṇi paruṣāṇi ca apramattā ca bhartāraṃ kadā cin nāham abruvam
Sanskrit only: no published translation is held for this verse.
देवतानां पितॄणां च ब्राह्मणानां च पूजने अप्रमत्ता सदायुक्ता श्वश्रूश्वशुरवर्तिनी
devatānāṃ pitṝṇāṃ ca brāhmaṇānāṃ ca pūjane apramattā sadāyuktā śvaśrūśvaśuravartinī
Sanskrit only: no published translation is held for this verse.
पैशुन्ये न प्रवर्तामि न ममैतन् मनोगतम् अद्वारे न च तिष्ठामि चिरं न कथयामि च
paiśunye na pravartāmi na mamaitan manogatam advāre na ca tiṣṭhāmi ciraṃ na kathayāmi ca
Sanskrit only: no published translation is held for this verse.
असद् वा हसितं किं चिद् अहितं वापि कर्मणा रहस्यम् अरहस्यं वा न प्रवर्तामि सर्वथा
asad vā hasitaṃ kiṃ cid ahitaṃ vāpi karmaṇā rahasyam arahasyaṃ vā na pravartāmi sarvathā
Sanskrit only: no published translation is held for this verse.
कार्यार्थे निर्गतं चापि भर्तारं गृहम् आगतम् आसनेनोपसंयोज्य पूजयामि समाहिता
kāryārthe nirgataṃ cāpi bhartāraṃ gṛham āgatam āsanenopasaṃyojya pūjayāmi samāhitā
Sanskrit only: no published translation is held for this verse.
यद् यच् च नाभिजानाति यद् भोज्यं नाभिनन्दति भक्ष्यं वाप्य् अथ वा लेह्यं तत् सर्वं वर्जयाम्य् अहम्
yad yac ca nābhijānāti yad bhojyaṃ nābhinandati bhakṣyaṃ vāpy atha vā lehyaṃ tat sarvaṃ varjayāmy aham
Sanskrit only: no published translation is held for this verse.
कुटुम्बार्थे समानीतं यत् किं चित् कार्यम् एव तु प्रातर् उत्थाय तत् सर्वं कारयामि करोमि च
kuṭumbārthe samānītaṃ yat kiṃ cit kāryam eva tu prātar utthāya tat sarvaṃ kārayāmi karomi ca
Sanskrit only: no published translation is held for this verse.
प्रवासं यदि मे भर्ता याति कार्येण केन चित् मङ्गलैर् बहुभिर् युक्ता भवामि नियता सदा
pravāsaṃ yadi me bhartā yāti kāryeṇa kena cit maṅgalair bahubhir yuktā bhavāmi niyatā sadā
Sanskrit only: no published translation is held for this verse.
अञ्जनं रोचनां चैव स्नानं माल्यानुलेपनम् प्रसाधनं च निष्क्रान्ते नाभिनन्दामि भर्तरि
añjanaṃ rocanāṃ caiva snānaṃ mālyānulepanam prasādhanaṃ ca niṣkrānte nābhinandāmi bhartari
Sanskrit only: no published translation is held for this verse.
नोत्थापयामि भर्तारं सुखसुप्तम् अहं सदा आतुरेष्व् अपि कार्येषु तेन तुष्यति मे मनः
notthāpayāmi bhartāraṃ sukhasuptam ahaṃ sadā ātureṣv api kāryeṣu tena tuṣyati me manaḥ
Sanskrit only: no published translation is held for this verse.
नायासयामि भर्तारं कुटुम्बार्थे च सर्वदा गुप्तगुह्या सदा चास्मि सुसंमृष्टनिवेशना
nāyāsayāmi bhartāraṃ kuṭumbārthe ca sarvadā guptaguhyā sadā cāsmi susaṃmṛṣṭaniveśanā
Sanskrit only: no published translation is held for this verse.
इमं धर्मपथं नारी पालयन्ती समाहिता अरुन्धतीव नारीणां स्वर्गलोके महीयते
imaṃ dharmapathaṃ nārī pālayantī samāhitā arundhatīva nārīṇāṃ svargaloke mahīyate
Sanskrit only: no published translation is held for this verse.
भीष्म उवाच एतद् आख्याय सा देवी सुमनायै तपस्विनी पतिधर्मं महाभागा जगामादर्शनं तदा
bhīṣma uvāca etad ākhyāya sā devī sumanāyai tapasvinī patidharmaṃ mahābhāgā jagāmādarśanaṃ tadā
Sanskrit only: no published translation is held for this verse.
यश् चेदं पाण्डवाख्यानं पठेत् पर्वणि पर्वणि स देवलोकं संप्राप्य नन्दने सुसुखं वसेत्
yaś cedaṃ pāṇḍavākhyānaṃ paṭhet parvaṇi parvaṇi sa devalokaṃ saṃprāpya nandane susukhaṃ vaset
Sanskrit only: no published translation is held for this verse.