Mahābhārata (critical edition) 13.152

वैशंपायन उवाच तूष्णींभूते तदा भीष्मे पटे चित्रम् इवार्पितम् मुहूर्तम् इव च ध्यात्वा व्यासः सत्यवतीसुतः नृपं शयानं गाङ्गेयम् इदम् आह वचस् तदा

vaiśaṃpāyana uvāca tūṣṇīṃbhūte tadā bhīṣme paṭe citram ivārpitam muhūrtam iva ca dhyātvā vyāsaḥ satyavatīsutaḥ nṛpaṃ śayānaṃ gāṅgeyam idam āha vacas tadā

Sanskrit only: no published translation is held for this verse.

राजन् प्रकृतिम् आपन्नः कुरुराजो युधिष्ठिरः सहितो भ्रातृभिः सर्वैः पार्थिवैश् चानुयायिभिः

rājan prakṛtim āpannaḥ kururājo yudhiṣṭhiraḥ sahito bhrātṛbhiḥ sarvaiḥ pārthivaiś cānuyāyibhiḥ

Sanskrit only: no published translation is held for this verse.

उपास्ते त्वां नरव्याघ्र सह कृष्णेन धीमता तम् इमं पुरयानाय त्वम् अनुज्ञातुम् अर्हसि

upāste tvāṃ naravyāghra saha kṛṣṇena dhīmatā tam imaṃ purayānāya tvam anujñātum arhasi

Sanskrit only: no published translation is held for this verse.

एवम् उक्तो भगवता व्यासेन पृथिवीपतिः युधिष्ठिरं सहामात्यम् अनुजज्ञे नदीसुतः

evam ukto bhagavatā vyāsena pṛthivīpatiḥ yudhiṣṭhiraṃ sahāmātyam anujajñe nadīsutaḥ

Sanskrit only: no published translation is held for this verse.

उवाच चैनं मधुरं ततः शांतनवो नृपः प्रविशस्व पुरं राजन् व्येतु ते मानसो ज्वरः

uvāca cainaṃ madhuraṃ tataḥ śāṃtanavo nṛpaḥ praviśasva puraṃ rājan vyetu te mānaso jvaraḥ

Sanskrit only: no published translation is held for this verse.

यजस्व विविधैर् यज्ञैर् बह्वन्नैः स्वाप्तदक्षिणैः ययातिर् इव राजेन्द्र श्रद्धादमपुरःसरः

yajasva vividhair yajñair bahvannaiḥ svāptadakṣiṇaiḥ yayātir iva rājendra śraddhādamapuraḥsaraḥ

Sanskrit only: no published translation is held for this verse.

क्षत्रधर्मरतः पार्थ पितॄन् देवांश् च तर्पय श्रेयसा योक्ष्यसे चैव व्येतु ते मानसो ज्वरः

kṣatradharmarataḥ pārtha pitṝn devāṃś ca tarpaya śreyasā yokṣyase caiva vyetu te mānaso jvaraḥ

Sanskrit only: no published translation is held for this verse.

रञ्जयस्व प्रजाः सर्वाः प्रकृतीः परिसान्त्वय सुहृदः फलसत्कारैर् अभ्यर्चय यथार्हतः

rañjayasva prajāḥ sarvāḥ prakṛtīḥ parisāntvaya suhṛdaḥ phalasatkārair abhyarcaya yathārhataḥ

Sanskrit only: no published translation is held for this verse.

अनु त्वां तात जीवन्तु मित्राणि सुहृदस् तथा चैत्यस्थाने स्थितं वृक्षं फलवन्तम् इव द्विजाः

anu tvāṃ tāta jīvantu mitrāṇi suhṛdas tathā caityasthāne sthitaṃ vṛkṣaṃ phalavantam iva dvijāḥ

Sanskrit only: no published translation is held for this verse.

आगन्तव्यं च भवता समये मम पार्थिव विनिवृत्ते दिनकरे प्रवृत्ते चोत्तरायणे

āgantavyaṃ ca bhavatā samaye mama pārthiva vinivṛtte dinakare pravṛtte cottarāyaṇe

Sanskrit only: no published translation is held for this verse.

तथेत्य् उक्त्वा तु कौन्तेयः सो ऽभिवाद्य पितामहम् प्रययौ सपरीवारो नगरं नागसाह्वयम्

tathety uktvā tu kaunteyaḥ so 'bhivādya pitāmaham prayayau saparīvāro nagaraṃ nāgasāhvayam

Sanskrit only: no published translation is held for this verse.

धृतराष्ट्रं पुरस्कृत्य गान्धारीं च पतिव्रताम् सह तैर् ऋषिभिः सर्वैर् भ्रातृभिः केशवेन च

dhṛtarāṣṭraṃ puraskṛtya gāndhārīṃ ca pativratām saha tair ṛṣibhiḥ sarvair bhrātṛbhiḥ keśavena ca

Sanskrit only: no published translation is held for this verse.

पौरजानपदैश् चैव मन्त्रिवृद्धैश् च पार्थिवः प्रविवेश कुरुश्रेष्ठ पुरं वारणसाह्वयम्

paurajānapadaiś caiva mantrivṛddhaiś ca pārthivaḥ praviveśa kuruśreṣṭha puraṃ vāraṇasāhvayam

Sanskrit only: no published translation is held for this verse.