Mahābhārata (critical edition) 14.14

वैशंपायन उवाच एवं बहुविधैर् वाक्यैर् मुनिभिस् तैस् तपोधनैः समाश्वस्यत राजर्षिर् हतबन्धुर् युधिष्ठिरः

vaiśaṃpāyana uvāca evaṃ bahuvidhair vākyair munibhis tais tapodhanaiḥ samāśvasyata rājarṣir hatabandhur yudhiṣṭhiraḥ

Sanskrit only: no published translation is held for this verse.

सो ऽनुनीतो भगवता विष्टरश्रवसा स्वयम् द्वैपायनेन कृष्णेन देवस्थानेन चाभिभूः

so 'nunīto bhagavatā viṣṭaraśravasā svayam dvaipāyanena kṛṣṇena devasthānena cābhibhūḥ

Sanskrit only: no published translation is held for this verse.

नारदेनाथ भीमेन नकुलेन च पार्थिवः कृष्णया सहदेवेन विजयेन च धीमता

nāradenātha bhīmena nakulena ca pārthivaḥ kṛṣṇayā sahadevena vijayena ca dhīmatā

Sanskrit only: no published translation is held for this verse.

अन्यैश् च पुरुषव्याघ्रैर् ब्राह्मणैः शास्त्रदृष्टिभिः व्यजहाच् छोकजं दुःखं संतापं चैव मानसम्

anyaiś ca puruṣavyāghrair brāhmaṇaiḥ śāstradṛṣṭibhiḥ vyajahāc chokajaṃ duḥkhaṃ saṃtāpaṃ caiva mānasam

Sanskrit only: no published translation is held for this verse.

अर्चयाम् आस देवांश् च ब्राह्मणांश् च युधिष्ठिरः कृत्वाथ प्रेतकार्याणि बन्धूनां स पुनर् नृपः अन्वशासत धर्मात्मा पृथिवीं सागराम्बराम्

arcayām āsa devāṃś ca brāhmaṇāṃś ca yudhiṣṭhiraḥ kṛtvātha pretakāryāṇi bandhūnāṃ sa punar nṛpaḥ anvaśāsata dharmātmā pṛthivīṃ sāgarāmbarām

Sanskrit only: no published translation is held for this verse.

प्रशान्तचेताः कौरव्यः स्वराज्यं प्राप्य केवलम् व्यासं च नारदं चैव तांश् चान्यान् अब्रवीन् नृपः

praśāntacetāḥ kauravyaḥ svarājyaṃ prāpya kevalam vyāsaṃ ca nāradaṃ caiva tāṃś cānyān abravīn nṛpaḥ

Sanskrit only: no published translation is held for this verse.

आश्वासितो ऽहं प्राग् वृद्धैर् भवद्भिर् मुनिपुंगवैः न सूक्ष्मम् अपि मे किं चिद् व्यलीकम् इह विद्यते

āśvāsito 'haṃ prāg vṛddhair bhavadbhir munipuṃgavaiḥ na sūkṣmam api me kiṃ cid vyalīkam iha vidyate

Sanskrit only: no published translation is held for this verse.

अर्थश् च सुमहान् प्राप्तो येन यक्ष्यामि देवताः पुरस्कृत्येह भवतः समानेष्यामहे मखम्

arthaś ca sumahān prāpto yena yakṣyāmi devatāḥ puraskṛtyeha bhavataḥ samāneṣyāmahe makham

Sanskrit only: no published translation is held for this verse.

हिमवन्तं त्वया गुप्ता गमिष्यामः पितामह बह्वाश्चर्यो हि देशः स श्रूयते द्विजसत्तम

himavantaṃ tvayā guptā gamiṣyāmaḥ pitāmaha bahvāścaryo hi deśaḥ sa śrūyate dvijasattama

Sanskrit only: no published translation is held for this verse.

तथा भगवता चित्रं कल्याणं बहु भाषितम् देवर्षिणा नारदेन देवस्थानेन चैव ह

tathā bhagavatā citraṃ kalyāṇaṃ bahu bhāṣitam devarṣiṇā nāradena devasthānena caiva ha

Sanskrit only: no published translation is held for this verse.

नाभागधेयः पुरुषः कश् चिद् एवंविधान् गुरून् लभते व्यसनं प्राप्य सुहृदः साधुसंमतान्

nābhāgadheyaḥ puruṣaḥ kaś cid evaṃvidhān gurūn labhate vyasanaṃ prāpya suhṛdaḥ sādhusaṃmatān

Sanskrit only: no published translation is held for this verse.

एवम् उक्तास् तु ते राज्ञा सर्व एव महर्षयः अभ्यनुज्ञाप्य राजानं तथोभौ कृष्णफल्गुनौ पश्यताम् एव सर्वेषां तत्रैवादर्शनं ययुः

evam uktās tu te rājñā sarva eva maharṣayaḥ abhyanujñāpya rājānaṃ tathobhau kṛṣṇaphalgunau paśyatām eva sarveṣāṃ tatraivādarśanaṃ yayuḥ

Sanskrit only: no published translation is held for this verse.

ततो धर्मसुतो राजा तत्रैवोपाविशत् प्रभुः एवं नातिमहान् कालः स तेषाम् अभ्यवर्तत

tato dharmasuto rājā tatraivopāviśat prabhuḥ evaṃ nātimahān kālaḥ sa teṣām abhyavartata

Sanskrit only: no published translation is held for this verse.

कुर्वतां शौचकर्माणि भीष्मस्य निधने तदा महादानानि विप्रेभ्यो ददताम् और्ध्वदैहिकम्

kurvatāṃ śaucakarmāṇi bhīṣmasya nidhane tadā mahādānāni viprebhyo dadatām aurdhvadaihikam

Sanskrit only: no published translation is held for this verse.

भीष्मकर्णपुरोगाणां कुरूणां कुरुनन्दन सहितो धृतराष्ट्रेण प्रददाव् और्ध्वदैहिकम्

bhīṣmakarṇapurogāṇāṃ kurūṇāṃ kurunandana sahito dhṛtarāṣṭreṇa pradadāv aurdhvadaihikam

Sanskrit only: no published translation is held for this verse.

ततो दत्त्वा बहु धनं विप्रेभ्यः पाण्डवर्षभः धृतराष्ट्रं पुरस्कृत्य विवेश गजसाह्वयम्

tato dattvā bahu dhanaṃ viprebhyaḥ pāṇḍavarṣabhaḥ dhṛtarāṣṭraṃ puraskṛtya viveśa gajasāhvayam

Sanskrit only: no published translation is held for this verse.

स समाश्वास्य पितरं प्रज्ञाचक्षुषम् ईश्वरम् अन्वशाद् वै स धर्मात्मा पृथिवीं भ्रातृभिः सह

sa samāśvāsya pitaraṃ prajñācakṣuṣam īśvaram anvaśād vai sa dharmātmā pṛthivīṃ bhrātṛbhiḥ saha

Sanskrit only: no published translation is held for this verse.