Mahābhārata (critical edition) 14.41

ब्रह्मोवाच य उत्पन्नो महान् पूर्वम् अहंकारः स उच्यते अहम् इत्य् एव संभूतो द्वितीयः सर्ग उच्यते

brahmovāca ya utpanno mahān pūrvam ahaṃkāraḥ sa ucyate aham ity eva saṃbhūto dvitīyaḥ sarga ucyate

Sanskrit only: no published translation is held for this verse.

अहंकारश् च भूतादिर् वैकारिक इति स्मृतः तेजसश् चेतना धातुः प्रजासर्गः प्रजापतिः

ahaṃkāraś ca bhūtādir vaikārika iti smṛtaḥ tejasaś cetanā dhātuḥ prajāsargaḥ prajāpatiḥ

Sanskrit only: no published translation is held for this verse.

देवानां प्रभवो देवो मनसश् च त्रिलोककृत् अहम् इत्य् एव तत् सर्वम् अभिमन्ता स उच्यते

devānāṃ prabhavo devo manasaś ca trilokakṛt aham ity eva tat sarvam abhimantā sa ucyate

Sanskrit only: no published translation is held for this verse.

अध्यात्मज्ञाननित्यानां मुनीनां भावितात्मनाम् स्वाध्यायक्रतुसिद्धानाम् एष लोकः सनातनः

adhyātmajñānanityānāṃ munīnāṃ bhāvitātmanām svādhyāyakratusiddhānām eṣa lokaḥ sanātanaḥ

Sanskrit only: no published translation is held for this verse.

अहंकारेणाहरतो गुणान् इमान्; भूतादिर् एवं सृजते स भूतकृत् वैकारिकः सर्वम् इदं विचेष्टते; स्वतेजसा रञ्जयते जगत् तथा

ahaṃkāreṇāharato guṇān imān; bhūtādir evaṃ sṛjate sa bhūtakṛt vaikārikaḥ sarvam idaṃ viceṣṭate; svatejasā rañjayate jagat tathā

Sanskrit only: no published translation is held for this verse.