Library·Mahābhārata (critical edition)·14·14.62
जनमेजय उवाच श्रुत्वैतद् वचनं ब्रह्मन् व्यासेनोक्तं महात्मना अश्वमेधं प्रति तदा किं नृपः प्रचकार ह
janamejaya uvāca śrutvaitad vacanaṃ brahman vyāsenoktaṃ mahātmanā aśvamedhaṃ prati tadā kiṃ nṛpaḥ pracakāra ha
Sanskrit only: no published translation is held for this verse.
रत्नं च यन् मरुत्तेन निहितं पृथिवीतले तद् अवाप कथं चेति तन् मे ब्रूहि द्विजोत्तम
ratnaṃ ca yan maruttena nihitaṃ pṛthivītale tad avāpa kathaṃ ceti tan me brūhi dvijottama
Sanskrit only: no published translation is held for this verse.
वैशंपायन उवाच श्रुत्वा द्वैपायनवचो धर्मराजो युधिष्ठिरः भ्रातॄन् सर्वान् समानाय्य काले वचनम् अब्रवीत् अर्जुनं भीमसेनं च माद्रीपुत्रौ यमाव् अपि
vaiśaṃpāyana uvāca śrutvā dvaipāyanavaco dharmarājo yudhiṣṭhiraḥ bhrātṝn sarvān samānāyya kāle vacanam abravīt arjunaṃ bhīmasenaṃ ca mādrīputrau yamāv api
Sanskrit only: no published translation is held for this verse.
श्रुतं वो वचनं वीराः सौहृदाद् यन् महात्मना कुरूणां हितकामेन प्रोक्तं कृष्णेन धीमता
śrutaṃ vo vacanaṃ vīrāḥ sauhṛdād yan mahātmanā kurūṇāṃ hitakāmena proktaṃ kṛṣṇena dhīmatā
Sanskrit only: no published translation is held for this verse.
तपोवृद्धेन महता सुहृदां भूतिम् इच्छता गुरुणा धर्मशीलेन व्यासेनाद्भुतकर्मणा
tapovṛddhena mahatā suhṛdāṃ bhūtim icchatā guruṇā dharmaśīlena vyāsenādbhutakarmaṇā
Sanskrit only: no published translation is held for this verse.
भीष्मेण च महाप्राज्ञ गोविन्देन च धीमता संस्मृत्य तद् अहं सम्यक् कर्तुम् इच्छामि पाण्डवाः
bhīṣmeṇa ca mahāprājña govindena ca dhīmatā saṃsmṛtya tad ahaṃ samyak kartum icchāmi pāṇḍavāḥ
Sanskrit only: no published translation is held for this verse.
आयत्यां च तदात्वे च सर्वेषां तद् धि नो हितम् अनुबन्धे च कल्याणं यद् वचो ब्रह्मवादिनः
āyatyāṃ ca tadātve ca sarveṣāṃ tad dhi no hitam anubandhe ca kalyāṇaṃ yad vaco brahmavādinaḥ
Sanskrit only: no published translation is held for this verse.
इयं हि वसुधा सर्वा क्षीणरत्ना कुरूद्वहाः तच् चाचष्ट बहु व्यासो मरुत्तस्य धनं नृपाः
iyaṃ hi vasudhā sarvā kṣīṇaratnā kurūdvahāḥ tac cācaṣṭa bahu vyāso maruttasya dhanaṃ nṛpāḥ
Sanskrit only: no published translation is held for this verse.
यद्य् एतद् वो बहुमतं मन्यध्वं वा क्षमं यदि तद् आनयामहे सर्वे कथं वा भीम मन्यसे
yady etad vo bahumataṃ manyadhvaṃ vā kṣamaṃ yadi tad ānayāmahe sarve kathaṃ vā bhīma manyase
Sanskrit only: no published translation is held for this verse.
इत्य् उक्तवाक्ये नृपतौ तदा कुरुकुलोद्वह भीमसेनो नृपश्रेष्ठं प्राञ्जलिर् वाक्यम् अब्रवीत्
ity uktavākye nṛpatau tadā kurukulodvaha bhīmaseno nṛpaśreṣṭhaṃ prāñjalir vākyam abravīt
Sanskrit only: no published translation is held for this verse.
रोचते मे महाबाहो यद् इदं भाषितं त्वया व्यासाख्यातस्य वित्तस्य समुपानयनं प्रति
rocate me mahābāho yad idaṃ bhāṣitaṃ tvayā vyāsākhyātasya vittasya samupānayanaṃ prati
Sanskrit only: no published translation is held for this verse.
यदि तत् प्राप्नुयामेह धनम् आविक्षितं प्रभो कृतम् एव महाराज भवेद् इति मतिर् मम
yadi tat prāpnuyāmeha dhanam āvikṣitaṃ prabho kṛtam eva mahārāja bhaved iti matir mama
Sanskrit only: no published translation is held for this verse.
ते वयं प्रणिपातेन गिरीशस्य महात्मनः तद् आनयाम भद्रं ते समभ्यर्च्य कपर्दिनम्
te vayaṃ praṇipātena girīśasya mahātmanaḥ tad ānayāma bhadraṃ te samabhyarcya kapardinam
Sanskrit only: no published translation is held for this verse.
तं विभुं देवदेवेशं तस्यैवानुचरांश् च तान् प्रसाद्यार्थम् अवाप्स्यामो नूनं वाग्बुद्धिकर्मभिः
taṃ vibhuṃ devadeveśaṃ tasyaivānucarāṃś ca tān prasādyārtham avāpsyāmo nūnaṃ vāgbuddhikarmabhiḥ
Sanskrit only: no published translation is held for this verse.
रक्षन्ते ये च तद् द्रव्यं किंकरा रौद्रदर्शनाः ते च वश्या भविष्यन्ति प्रसन्ने वृषभध्वजे
rakṣante ye ca tad dravyaṃ kiṃkarā raudradarśanāḥ te ca vaśyā bhaviṣyanti prasanne vṛṣabhadhvaje
Sanskrit only: no published translation is held for this verse.
श्रुत्वैवं वदतस् तस्य वाक्यं भीमस्य भारत प्रीतो धर्मात्मजो राजा बभूवातीव भारत अर्जुनप्रमुखाश् चापि तथेत्य् एवाब्रुवन् मुदा
śrutvaivaṃ vadatas tasya vākyaṃ bhīmasya bhārata prīto dharmātmajo rājā babhūvātīva bhārata arjunapramukhāś cāpi tathety evābruvan mudā
Sanskrit only: no published translation is held for this verse.
कृत्वा तु पाण्डवाः सर्वे रत्नाहरणनिश्चयम् सेनाम् आज्ञापयाम् आसुर् नक्षत्रे ऽहनि च ध्रुवे
kṛtvā tu pāṇḍavāḥ sarve ratnāharaṇaniścayam senām ājñāpayām āsur nakṣatre 'hani ca dhruve
Sanskrit only: no published translation is held for this verse.
ततो ययुः पाण्डुसुता ब्राह्मणान् स्वस्ति वाच्य च अर्चयित्वा सुरश्रेष्ठं पूर्वम् एव महेश्वरम्
tato yayuḥ pāṇḍusutā brāhmaṇān svasti vācya ca arcayitvā suraśreṣṭhaṃ pūrvam eva maheśvaram
Sanskrit only: no published translation is held for this verse.
मोदकैः पायसेनाथ मांसापूपैस् तथैव च आशास्य च महात्मानं प्रययुर् मुदिता भृशम्
modakaiḥ pāyasenātha māṃsāpūpais tathaiva ca āśāsya ca mahātmānaṃ prayayur muditā bhṛśam
Sanskrit only: no published translation is held for this verse.
तेषां प्रयास्यतां तत्र मङ्गलानि शुभान्य् अथ प्राहुः प्रहृष्टमनसो द्विजाग्र्या नागराश् च ते
teṣāṃ prayāsyatāṃ tatra maṅgalāni śubhāny atha prāhuḥ prahṛṣṭamanaso dvijāgryā nāgarāś ca te
Sanskrit only: no published translation is held for this verse.
ततः प्रदक्षिणीकृत्य शिरोभिः प्रणिपत्य च ब्राह्मणान् अग्निसहितान् प्रययुः पाण्डुनन्दनाः
tataḥ pradakṣiṇīkṛtya śirobhiḥ praṇipatya ca brāhmaṇān agnisahitān prayayuḥ pāṇḍunandanāḥ
Sanskrit only: no published translation is held for this verse.
समनुज्ञाप्य राजानं पुत्रशोकसमाहतम् धृतराष्ट्रं सभार्यं वै पृथां पृथुललोचनाम्
samanujñāpya rājānaṃ putraśokasamāhatam dhṛtarāṣṭraṃ sabhāryaṃ vai pṛthāṃ pṛthulalocanām
Sanskrit only: no published translation is held for this verse.
मूले निक्षिप्य कौरव्यं युयुत्सुं धृतराष्ट्रजम् संपूज्यमानाः पौरैश् च ब्राह्मणैश् च मनीषिभिः
mūle nikṣipya kauravyaṃ yuyutsuṃ dhṛtarāṣṭrajam saṃpūjyamānāḥ pauraiś ca brāhmaṇaiś ca manīṣibhiḥ
Sanskrit only: no published translation is held for this verse.