Mahābhārata (critical edition) 15.2

वैशंपायन उवाच एवं संपूजितो राजा पाण्डवैर् अम्बिकासुतः विजहार यथापूर्वम् ऋषिभिः पर्युपासितः

vaiśaṃpāyana uvāca evaṃ saṃpūjito rājā pāṇḍavair ambikāsutaḥ vijahāra yathāpūrvam ṛṣibhiḥ paryupāsitaḥ

Sanskrit only: no published translation is held for this verse.

ब्रह्मदेयाग्रहारांश् च प्रददौ स कुरूद्वहः तच् च कुन्तीसुतो राजा सर्वम् एवान्वमोदत

brahmadeyāgrahārāṃś ca pradadau sa kurūdvahaḥ tac ca kuntīsuto rājā sarvam evānvamodata

Sanskrit only: no published translation is held for this verse.

आनृशंस्यपरो राजा प्रीयमाणो युधिष्ठिरः उवाच स तदा भ्रातॄन् अमात्यांश् च महीपतिः

ānṛśaṃsyaparo rājā prīyamāṇo yudhiṣṭhiraḥ uvāca sa tadā bhrātṝn amātyāṃś ca mahīpatiḥ

Sanskrit only: no published translation is held for this verse.

मया चैव भवद्भिश् च मान्य एष नराधिपः निदेशे धृतराष्ट्रस्य यः स्थास्यति स मे सुहृत् विपरीतश् च मे शत्रुर् निरस्यश् च भवेन् नरः

mayā caiva bhavadbhiś ca mānya eṣa narādhipaḥ nideśe dhṛtarāṣṭrasya yaḥ sthāsyati sa me suhṛt viparītaś ca me śatrur nirasyaś ca bhaven naraḥ

Sanskrit only: no published translation is held for this verse.

परिदृष्टेषु चाहःसु पुत्राणां श्राद्धकर्मणि ददातु राजा सर्वेषां यावद् अस्य चिकीर्षितम्

paridṛṣṭeṣu cāhaḥsu putrāṇāṃ śrāddhakarmaṇi dadātu rājā sarveṣāṃ yāvad asya cikīrṣitam

Sanskrit only: no published translation is held for this verse.

ततः स राजा कौरव्यो धृतराष्ट्रो महामनाः ब्राह्मणेभ्यो महार्हेभ्यो ददौ वित्तान्य् अनेकशः

tataḥ sa rājā kauravyo dhṛtarāṣṭro mahāmanāḥ brāhmaṇebhyo mahārhebhyo dadau vittāny anekaśaḥ

Sanskrit only: no published translation is held for this verse.

धर्मराजश् च भीमश् च सव्यसाची यमाव् अपि तत् सर्वम् अन्ववर्तन्त धृतराष्ट्रव्यपेक्षया

dharmarājaś ca bhīmaś ca savyasācī yamāv api tat sarvam anvavartanta dhṛtarāṣṭravyapekṣayā

Sanskrit only: no published translation is held for this verse.

कथं नु राजा वृद्धः सन् पुत्रशोकसमाहतः शोकम् अस्मत्कृतं प्राप्य न म्रियेतेति चिन्त्यते

kathaṃ nu rājā vṛddhaḥ san putraśokasamāhataḥ śokam asmatkṛtaṃ prāpya na mriyeteti cintyate

Sanskrit only: no published translation is held for this verse.

यावद् धि कुरुमुख्यस्य जीवत्पुत्रस्य वै सुखम् बभूव तद् अवाप्नोतु भोगांश् चेति व्यवस्थिताः

yāvad dhi kurumukhyasya jīvatputrasya vai sukham babhūva tad avāpnotu bhogāṃś ceti vyavasthitāḥ

Sanskrit only: no published translation is held for this verse.

ततस् ते सहिताः सर्वे भ्रातरः पञ्च पाण्डवाः तथाशीलाः समातस्थुर् धृतराष्ट्रस्य शासने

tatas te sahitāḥ sarve bhrātaraḥ pañca pāṇḍavāḥ tathāśīlāḥ samātasthur dhṛtarāṣṭrasya śāsane

Sanskrit only: no published translation is held for this verse.

धृतराष्ट्रश् च तान् वीरान् विनीतान् विनये स्थितान् शिष्यवृत्तौ स्थितान् नित्यं गुरुवत् पर्यपश्यत

dhṛtarāṣṭraś ca tān vīrān vinītān vinaye sthitān śiṣyavṛttau sthitān nityaṃ guruvat paryapaśyata

Sanskrit only: no published translation is held for this verse.

गान्धारी चैव पुत्राणां विविधैः श्राद्धकर्मभिः आनृण्यम् अगमत् कामान् विप्रेभ्यः प्रतिपाद्य वै

gāndhārī caiva putrāṇāṃ vividhaiḥ śrāddhakarmabhiḥ ānṛṇyam agamat kāmān viprebhyaḥ pratipādya vai

Sanskrit only: no published translation is held for this verse.

एवं धर्मभृतां श्रेष्ठो धर्मराजो युधिष्ठिरः भ्रातृभिः सहितो धीमान् पूजयाम् आस तं नृपम्

evaṃ dharmabhṛtāṃ śreṣṭho dharmarājo yudhiṣṭhiraḥ bhrātṛbhiḥ sahito dhīmān pūjayām āsa taṃ nṛpam

Sanskrit only: no published translation is held for this verse.