Mahābhārata (critical edition) 15.21

वैशंपायन उवाच ततः प्रभाते राजा स धृतराष्ट्रो ऽम्बिकासुतः आहूय पाण्डवान् वीरान् वनवासकृतक्षणः

vaiśaṃpāyana uvāca tataḥ prabhāte rājā sa dhṛtarāṣṭro 'mbikāsutaḥ āhūya pāṇḍavān vīrān vanavāsakṛtakṣaṇaḥ

Sanskrit only: no published translation is held for this verse.

गान्धारीसहितो धीमान् अभिनन्द्य यथाविधि कार्त्तिक्यां कारयित्वेष्टिं ब्राह्मणैर् वेदपारगैः

gāndhārīsahito dhīmān abhinandya yathāvidhi kārttikyāṃ kārayitveṣṭiṃ brāhmaṇair vedapāragaiḥ

Sanskrit only: no published translation is held for this verse.

अग्निहोत्रं पुरस्कृत्य वल्कलाजिनसंवृतः वधूपरिवृतो राजा निर्ययौ भवनात् ततः

agnihotraṃ puraskṛtya valkalājinasaṃvṛtaḥ vadhūparivṛto rājā niryayau bhavanāt tataḥ

Sanskrit only: no published translation is held for this verse.

ततः स्त्रियः कौरवपाण्डवानां; याश् चाप्य् अन्याः कौरवराजवंश्याः तासां नादः प्रादुरासीत् तदानीं; वैचित्रवीर्ये नृपतौ प्रयाते

tataḥ striyaḥ kauravapāṇḍavānāṃ; yāś cāpy anyāḥ kauravarājavaṃśyāḥ tāsāṃ nādaḥ prādurāsīt tadānīṃ; vaicitravīrye nṛpatau prayāte

Sanskrit only: no published translation is held for this verse.

ततो लाजैः सुमनोभिश् च राजा; विचित्राभिस् तद् गृहं पूजयित्वा संयोज्यार्थैर् भृत्यजनं च सर्वं; ततः समुत्सृज्य ययौ नरेन्द्रः

tato lājaiḥ sumanobhiś ca rājā; vicitrābhis tad gṛhaṃ pūjayitvā saṃyojyārthair bhṛtyajanaṃ ca sarvaṃ; tataḥ samutsṛjya yayau narendraḥ

Sanskrit only: no published translation is held for this verse.

ततो राजा प्राञ्जलिर् वेपमानो; युधिष्ठिरः सस्वनं बाष्पकण्ठः विलप्योच्चैर् हा महाराज साधो; क्व गन्तासीत्य् अपतत् तात भूमौ

tato rājā prāñjalir vepamāno; yudhiṣṭhiraḥ sasvanaṃ bāṣpakaṇṭhaḥ vilapyoccair hā mahārāja sādho; kva gantāsīty apatat tāta bhūmau

Sanskrit only: no published translation is held for this verse.

तथार्जुनस् तीव्रदुःखाभितप्तो; मुहुर् मुहुर् निःश्वसन् भारताग्र्यः युधिष्ठिरं मैवम् इत्य् एवम् उक्त्वा; निगृह्याथोदीधरत् सीदमानः

tathārjunas tīvraduḥkhābhitapto; muhur muhur niḥśvasan bhāratāgryaḥ yudhiṣṭhiraṃ maivam ity evam uktvā; nigṛhyāthodīdharat sīdamānaḥ

Sanskrit only: no published translation is held for this verse.

वृकोदरः फल्गुनश् चैव वीरौ; माद्रीपुत्रौ विदुरः संजयश् च वैश्यापुत्रः सहितो गौतमेन; धौम्यो विप्राश् चान्वयुर् बाष्पकण्ठाः

vṛkodaraḥ phalgunaś caiva vīrau; mādrīputrau viduraḥ saṃjayaś ca vaiśyāputraḥ sahito gautamena; dhaumyo viprāś cānvayur bāṣpakaṇṭhāḥ

Sanskrit only: no published translation is held for this verse.

कुन्ती गान्धारीं बद्धनेत्रां व्रजन्तीं; स्कन्धासक्तं हस्तम् अथोद्वहन्ती राजा गान्धार्याः स्कन्धदेशे ऽवसज्य; पाणिं ययौ धृतराष्ट्रः प्रतीतः

kuntī gāndhārīṃ baddhanetrāṃ vrajantīṃ; skandhāsaktaṃ hastam athodvahantī rājā gāndhāryāḥ skandhadeśe 'vasajya; pāṇiṃ yayau dhṛtarāṣṭraḥ pratītaḥ

Sanskrit only: no published translation is held for this verse.

तथा कृष्णा द्रौपदी यादवी च; बालापत्या चोत्तरा कौरवी च चित्राङ्गदा याश् च काश् चित् स्त्रियो ऽन्याः; सार्धं राज्ञा प्रस्थितास् ता वधूभिः

tathā kṛṣṇā draupadī yādavī ca; bālāpatyā cottarā kauravī ca citrāṅgadā yāś ca kāś cit striyo 'nyāḥ; sārdhaṃ rājñā prasthitās tā vadhūbhiḥ

Sanskrit only: no published translation is held for this verse.

तासां नादो रुदतीनां तदासीद्; राजन् दुःखात् कुररीणाम् इवोच्चैः ततो निष्पेतुर् ब्राह्मणक्षत्रियाणां; विट्शूद्राणां चैव नार्यः समन्तात्

tāsāṃ nādo rudatīnāṃ tadāsīd; rājan duḥkhāt kurarīṇām ivoccaiḥ tato niṣpetur brāhmaṇakṣatriyāṇāṃ; viṭśūdrāṇāṃ caiva nāryaḥ samantāt

Sanskrit only: no published translation is held for this verse.

तन्निर्याणे दुःखितः पौरवर्गो; गजाह्वये ऽतीव बभूव राजन् यथा पूर्वं गच्छतां पाण्डवानां; द्यूते राजन् कौरवाणां सभायाम्

tanniryāṇe duḥkhitaḥ pauravargo; gajāhvaye 'tīva babhūva rājan yathā pūrvaṃ gacchatāṃ pāṇḍavānāṃ; dyūte rājan kauravāṇāṃ sabhāyām

Sanskrit only: no published translation is held for this verse.

या नापश्यच् चन्द्रमा नैव सूर्यो; रामाः कदा चिद् अपि तस्मिन् नरेन्द्रे महावनं गच्छति कौरवेन्द्रे; शोकेनार्ता राजमार्गं प्रपेदुः

yā nāpaśyac candramā naiva sūryo; rāmāḥ kadā cid api tasmin narendre mahāvanaṃ gacchati kauravendre; śokenārtā rājamārgaṃ prapeduḥ

Sanskrit only: no published translation is held for this verse.