Library·Mahābhārata (critical edition)·15·15.38
कुन्त्य् उवाच भगवञ् श्वशुरो मे ऽसि दैवतस्यापि दैवतम् स मे देवातिदेवस् त्वं शृणु सत्यां गिरं मम
kunty uvāca bhagavañ śvaśuro me 'si daivatasyāpi daivatam sa me devātidevas tvaṃ śṛṇu satyāṃ giraṃ mama
Sanskrit only: no published translation is held for this verse.
तपस्वी कोपनो विप्रो दुर्वासा नाम मे पितुः भिक्षाम् उपागतो भोक्तुं तम् अहं पर्यतोषयम्
tapasvī kopano vipro durvāsā nāma me pituḥ bhikṣām upāgato bhoktuṃ tam ahaṃ paryatoṣayam
Sanskrit only: no published translation is held for this verse.
शौचेन त्व् आगसस् त्यागैः शुद्धेन मनसा तथा कोपस्थानेष्व् अपि महत्स्व् अकुप्यं न कदा चन
śaucena tv āgasas tyāgaiḥ śuddhena manasā tathā kopasthāneṣv api mahatsv akupyaṃ na kadā cana
Sanskrit only: no published translation is held for this verse.
स मे वरम् अदात् प्रीतः कृतम् इत्य् अहम् अब्रुवम् अवश्यं ते ग्रहीतव्यम् इति मां सो ऽब्रवीद् वचः
sa me varam adāt prītaḥ kṛtam ity aham abruvam avaśyaṃ te grahītavyam iti māṃ so 'bravīd vacaḥ
Sanskrit only: no published translation is held for this verse.
ततः शापभयाद् विप्रम् अवोचं पुनर् एव तम् एवम् अस्त्व् इति च प्राह पुनर् एव स मां द्विजः
tataḥ śāpabhayād vipram avocaṃ punar eva tam evam astv iti ca prāha punar eva sa māṃ dvijaḥ
Sanskrit only: no published translation is held for this verse.
धर्मस्य जननी भद्रे भवित्री त्वं वरानने वशे स्थास्यन्ति ते देवा यांस् त्वम् आवाहयिष्यसि
dharmasya jananī bhadre bhavitrī tvaṃ varānane vaśe sthāsyanti te devā yāṃs tvam āvāhayiṣyasi
Sanskrit only: no published translation is held for this verse.
इत्य् उक्त्वान्तर्हितो विप्रस् ततो ऽहं विस्मिताभवम् न च सर्वास्व् अवस्थासु स्मृतिर् मे विप्रणश्यति
ity uktvāntarhito vipras tato 'haṃ vismitābhavam na ca sarvāsv avasthāsu smṛtir me vipraṇaśyati
Sanskrit only: no published translation is held for this verse.
अथ हर्म्यतलस्थाहं रविम् उद्यन्तम् ईक्षती संस्मृत्य तद् ऋषेर् वाक्यं स्पृहयन्ती दिवाकरम् स्थिताहं बालभावेन तत्र दोषम् अबुध्यती
atha harmyatalasthāhaṃ ravim udyantam īkṣatī saṃsmṛtya tad ṛṣer vākyaṃ spṛhayantī divākaram sthitāhaṃ bālabhāvena tatra doṣam abudhyatī
Sanskrit only: no published translation is held for this verse.
अथ देवः सहस्रांशुर् मत्समीपगतो ऽभवत् द्विधा कृत्वात्मनो देहं भूमौ च गगने ऽपि च तताप लोकान् एकेन द्वितीयेनागमच् च माम्
atha devaḥ sahasrāṃśur matsamīpagato 'bhavat dvidhā kṛtvātmano dehaṃ bhūmau ca gagane 'pi ca tatāpa lokān ekena dvitīyenāgamac ca mām
Sanskrit only: no published translation is held for this verse.
स माम् उवाच वेपन्तीं वरं मत्तो वृणीष्व ह गम्यताम् इति तं चाहं प्रणम्य शिरसावदम्
sa mām uvāca vepantīṃ varaṃ matto vṛṇīṣva ha gamyatām iti taṃ cāhaṃ praṇamya śirasāvadam
Sanskrit only: no published translation is held for this verse.
स माम् उवाच तिग्मांशुर् वृथाह्वानं न ते क्षमम् धक्ष्यामि त्वां च विप्रं च येन दत्तो वरस् तव
sa mām uvāca tigmāṃśur vṛthāhvānaṃ na te kṣamam dhakṣyāmi tvāṃ ca vipraṃ ca yena datto varas tava
Sanskrit only: no published translation is held for this verse.
तम् अहं रक्षती विप्रं शापाद् अनपराधिनम् पुत्रो मे त्वत्समो देव भवेद् इति ततो ऽब्रुवम्
tam ahaṃ rakṣatī vipraṃ śāpād anaparādhinam putro me tvatsamo deva bhaved iti tato 'bruvam
Sanskrit only: no published translation is held for this verse.
ततो मां तेजसाविश्य मोहयित्वा च भानुमान् उवाच भविता पुत्रस् तवेत्य् अभ्यगमद् दिवम्
tato māṃ tejasāviśya mohayitvā ca bhānumān uvāca bhavitā putras tavety abhyagamad divam
Sanskrit only: no published translation is held for this verse.
ततो ऽहम् अन्तर्भवने पितुर् वृत्तान्तरक्षिणी गूढोत्पन्नं सुतं बालं जले कर्णम् अवासृजम्
tato 'ham antarbhavane pitur vṛttāntarakṣiṇī gūḍhotpannaṃ sutaṃ bālaṃ jale karṇam avāsṛjam
Sanskrit only: no published translation is held for this verse.
नूनं तस्यैव देवस्य प्रसादात् पुनर् एव तु कन्याहम् अभवं विप्र यथा प्राह स माम् ऋषिः
nūnaṃ tasyaiva devasya prasādāt punar eva tu kanyāham abhavaṃ vipra yathā prāha sa mām ṛṣiḥ
Sanskrit only: no published translation is held for this verse.
स मया मूढया पुत्रो ज्ञायमानो ऽप्य् उपेक्षितः तन् मां दहति विप्रर्षे यथा सुविदितं तव
sa mayā mūḍhayā putro jñāyamāno 'py upekṣitaḥ tan māṃ dahati viprarṣe yathā suviditaṃ tava
Sanskrit only: no published translation is held for this verse.
यदि पापम् अपापं वा तद् एतद् विवृतं मया तन् मे भयं त्वं भगवन् व्यपनेतुम् इहार्हसि
yadi pāpam apāpaṃ vā tad etad vivṛtaṃ mayā tan me bhayaṃ tvaṃ bhagavan vyapanetum ihārhasi
Sanskrit only: no published translation is held for this verse.
यच् चास्य राज्ञो विदितं हृदिस्थं भवतो ऽनघ तं चायं लभतां कामम् अद्यैव मुनिसत्तम
yac cāsya rājño viditaṃ hṛdisthaṃ bhavato 'nagha taṃ cāyaṃ labhatāṃ kāmam adyaiva munisattama
Sanskrit only: no published translation is held for this verse.
इत्य् उक्तः प्रत्युवाचेदं व्यासो वेदविदां वरः साधु सर्वम् इदं तथ्यम् एवम् एव यथात्थ माम्
ity uktaḥ pratyuvācedaṃ vyāso vedavidāṃ varaḥ sādhu sarvam idaṃ tathyam evam eva yathāttha mām
Sanskrit only: no published translation is held for this verse.
अपराधश् च ते नास्ति कन्याभावं गता ह्य् असि देवाश् चैश्वर्यवन्तो वै शरीराण्य् आविशन्ति वै
aparādhaś ca te nāsti kanyābhāvaṃ gatā hy asi devāś caiśvaryavanto vai śarīrāṇy āviśanti vai
Sanskrit only: no published translation is held for this verse.
सन्ति देवनिकायाश् च संकल्पाज् जनयन्ति ये वाचा दृष्ट्या तथा स्पर्शात् संघर्षेणेति पञ्चधा
santi devanikāyāś ca saṃkalpāj janayanti ye vācā dṛṣṭyā tathā sparśāt saṃgharṣeṇeti pañcadhā
Sanskrit only: no published translation is held for this verse.
मनुष्यधर्मो दैवेन धर्मेण न हि युज्यते इति कुन्ति व्यजानीहि व्येतु ते मानसो ज्वरः
manuṣyadharmo daivena dharmeṇa na hi yujyate iti kunti vyajānīhi vyetu te mānaso jvaraḥ
Sanskrit only: no published translation is held for this verse.
सर्वं बलवतां पथ्यं सर्वं बलवतां शुचि सर्वं बलवतां धर्मः सर्वं बलवतां स्वकम्
sarvaṃ balavatāṃ pathyaṃ sarvaṃ balavatāṃ śuci sarvaṃ balavatāṃ dharmaḥ sarvaṃ balavatāṃ svakam
Sanskrit only: no published translation is held for this verse.