Library·Mahābhārata (critical edition)·16·16.1
वैशंपायन उवाच षट्त्रिंशे त्व् अथ संप्राप्ते वर्षे कौरवनन्दनः ददर्श विपरीतानि निमित्तानि युधिष्ठिरः
vaiśaṃpāyana uvāca ṣaṭtriṃśe tv atha saṃprāpte varṣe kauravanandanaḥ dadarśa viparītāni nimittāni yudhiṣṭhiraḥ
Sanskrit only: no published translation is held for this verse.
ववुर् वाताः सनिर्घाता रूक्षाः शर्करवर्षिणः अपसव्यानि शकुना मण्डलानि प्रचक्रिरे
vavur vātāḥ sanirghātā rūkṣāḥ śarkaravarṣiṇaḥ apasavyāni śakunā maṇḍalāni pracakrire
Sanskrit only: no published translation is held for this verse.
प्रत्यगूहुर् महानद्यो दिशो नीहारसंवृताः उल्काश् चाङ्गारवर्षिण्यः प्रपेतुर् गगनाद् भुवि
pratyagūhur mahānadyo diśo nīhārasaṃvṛtāḥ ulkāś cāṅgāravarṣiṇyaḥ prapetur gaganād bhuvi
Sanskrit only: no published translation is held for this verse.
आदित्यो रजसा राजन् समवच्छन्नमण्डलः विरश्मिर् उदये नित्यं कबन्धैः समदृश्यत
ādityo rajasā rājan samavacchannamaṇḍalaḥ viraśmir udaye nityaṃ kabandhaiḥ samadṛśyata
Sanskrit only: no published translation is held for this verse.
परिवेषाश् च दृश्यन्ते दारुणाः चन्द्रसूर्ययोः त्रिवर्णाः श्यामरूक्षान्तास् तथा भस्मारुणप्रभाः
pariveṣāś ca dṛśyante dāruṇāḥ candrasūryayoḥ trivarṇāḥ śyāmarūkṣāntās tathā bhasmāruṇaprabhāḥ
Sanskrit only: no published translation is held for this verse.
एते चान्ये च बहव उत्पाता भयशंसिनः दृश्यन्ते ऽहर् अहो राजन् हृदयोद्वेगकारकाः
ete cānye ca bahava utpātā bhayaśaṃsinaḥ dṛśyante 'har aho rājan hṛdayodvegakārakāḥ
Sanskrit only: no published translation is held for this verse.
कस्य चित् त्व् अथ कालस्य कुरुराजो युधिष्ठिरः शुश्राव वृष्णिचक्रस्य मौसले कदनं कृतम्
kasya cit tv atha kālasya kururājo yudhiṣṭhiraḥ śuśrāva vṛṣṇicakrasya mausale kadanaṃ kṛtam
Sanskrit only: no published translation is held for this verse.
विमुक्तं वासुदेवं च श्रुत्वा रामं च पाण्डवः समानीयाब्रवीद् भ्रातॄन् किं करिष्याम इत्य् उत
vimuktaṃ vāsudevaṃ ca śrutvā rāmaṃ ca pāṇḍavaḥ samānīyābravīd bhrātṝn kiṃ kariṣyāma ity uta
Sanskrit only: no published translation is held for this verse.
परस्परं समासाद्य ब्रह्मदण्डबलात्कृतान् वृष्णीन् विनष्टांस् ते श्रुत्वा व्यथिताः पाण्डवाभवन्
parasparaṃ samāsādya brahmadaṇḍabalātkṛtān vṛṣṇīn vinaṣṭāṃs te śrutvā vyathitāḥ pāṇḍavābhavan
Sanskrit only: no published translation is held for this verse.
निधनं वासुदेवस्य समुद्रस्येव शोषणम् वीरा न श्रद्दधुस् तस्य विनाशं शार्ङ्गधन्वनः
nidhanaṃ vāsudevasya samudrasyeva śoṣaṇam vīrā na śraddadhus tasya vināśaṃ śārṅgadhanvanaḥ
Sanskrit only: no published translation is held for this verse.
मौसलं ते परिश्रुत्य दुःखशोकसमन्विताः विषण्णा हतसंकल्पाः पाण्डवाः समुपाविशन्
mausalaṃ te pariśrutya duḥkhaśokasamanvitāḥ viṣaṇṇā hatasaṃkalpāḥ pāṇḍavāḥ samupāviśan
Sanskrit only: no published translation is held for this verse.