Mahābhārata (critical edition) 2.21

वैशंपायन उवाच ततस् तं निश्चितात्मानं युद्धाय यदुनन्दनः उवाच वाग्मी राजानं जरासंधम् अधोक्षजः

vaiśaṃpāyana uvāca tatas taṃ niścitātmānaṃ yuddhāya yadunandanaḥ uvāca vāgmī rājānaṃ jarāsaṃdham adhokṣajaḥ

Sanskrit only: no published translation is held for this verse.

त्रयाणां केन ते राजन् योद्धुं वितरते मनः अस्मद् अन्यतमेनेह सज्जीभवतु को युधि

trayāṇāṃ kena te rājan yoddhuṃ vitarate manaḥ asmad anyatameneha sajjībhavatu ko yudhi

Sanskrit only: no published translation is held for this verse.

एवम् उक्तः स कृष्णेन युद्धं वव्रे महाद्युतिः जरासंधस् ततो राजन् भीमसेनेन मागधः

evam uktaḥ sa kṛṣṇena yuddhaṃ vavre mahādyutiḥ jarāsaṃdhas tato rājan bhīmasenena māgadhaḥ

Sanskrit only: no published translation is held for this verse.

धारयन्न् अगदान् मुख्यान् निर्वृतीर् वेदनानि च उपतस्थे जरासंधं युयुत्सुं वै पुरोहितः

dhārayann agadān mukhyān nirvṛtīr vedanāni ca upatasthe jarāsaṃdhaṃ yuyutsuṃ vai purohitaḥ

Sanskrit only: no published translation is held for this verse.

कृतस्वस्त्ययनो विद्वान् ब्राह्मणेन यशस्विना समनह्यज् जरासंधः क्षत्रधर्मम् अनुव्रतः

kṛtasvastyayano vidvān brāhmaṇena yaśasvinā samanahyaj jarāsaṃdhaḥ kṣatradharmam anuvrataḥ

Sanskrit only: no published translation is held for this verse.

अवमुच्य किरीटं स केशान् समनुमृज्य च उदतिष्ठज् जरासंधो वेलातिग इवार्णवः

avamucya kirīṭaṃ sa keśān samanumṛjya ca udatiṣṭhaj jarāsaṃdho velātiga ivārṇavaḥ

Sanskrit only: no published translation is held for this verse.

उवाच मतिमान् राजा भीमं भीमपराक्रमम् भीम योत्स्ये त्वया सार्धं श्रेयसा निर्जितं वरम्

uvāca matimān rājā bhīmaṃ bhīmaparākramam bhīma yotsye tvayā sārdhaṃ śreyasā nirjitaṃ varam

Sanskrit only: no published translation is held for this verse.

एवम् उक्त्वा जरासंधो भीमसेनम् अरिंदमः प्रत्युद्ययौ महातेजाः शक्रं बलिर् इवासुरः

evam uktvā jarāsaṃdho bhīmasenam ariṃdamaḥ pratyudyayau mahātejāḥ śakraṃ balir ivāsuraḥ

Sanskrit only: no published translation is held for this verse.

ततः संमन्त्र्य कृष्णेन कृतस्वस्त्ययनो बली भीमसेनो जरासंधम् आससाद युयुत्सया

tataḥ saṃmantrya kṛṣṇena kṛtasvastyayano balī bhīmaseno jarāsaṃdham āsasāda yuyutsayā

Sanskrit only: no published translation is held for this verse.

ततस् तौ नरशार्दूलौ बाहुशस्त्रौ समीयतुः वीरौ परमसंहृष्टाव् अन्योन्यजयकाङ्क्षिणौ

tatas tau naraśārdūlau bāhuśastrau samīyatuḥ vīrau paramasaṃhṛṣṭāv anyonyajayakāṅkṣiṇau

Sanskrit only: no published translation is held for this verse.

तयोर् अथ भुजाघातान् निग्रहप्रग्रहात् तथा आसीत् सुभीमसंह्रादो वज्रपर्वतयोर् इव

tayor atha bhujāghātān nigrahapragrahāt tathā āsīt subhīmasaṃhrādo vajraparvatayor iva

Sanskrit only: no published translation is held for this verse.

उभौ परमसंहृष्टौ बलेनातिबलाव् उभौ अन्योन्यस्यान्तरं प्रेप्सू परस्परजयैषिणौ

ubhau paramasaṃhṛṣṭau balenātibalāv ubhau anyonyasyāntaraṃ prepsū parasparajayaiṣiṇau

Sanskrit only: no published translation is held for this verse.

तद् भीमम् उत्सार्य जनं युद्धम् आसीद् उपह्वरे बलिनोः संयुगे राजन् वृत्रवासवयोर् इव

tad bhīmam utsārya janaṃ yuddham āsīd upahvare balinoḥ saṃyuge rājan vṛtravāsavayor iva

Sanskrit only: no published translation is held for this verse.

प्रकर्षणाकर्षणाभ्याम् अभ्याकर्षविकर्षणैः आकर्षेतां तथान्योन्यं जानुभिश् चाभिजघ्नतुः

prakarṣaṇākarṣaṇābhyām abhyākarṣavikarṣaṇaiḥ ākarṣetāṃ tathānyonyaṃ jānubhiś cābhijaghnatuḥ

Sanskrit only: no published translation is held for this verse.

ततः शब्देन महता भर्त्सयन्तौ परस्परम् पाषाणसंघातनिभैः प्रहारैर् अभिजघ्नतुः

tataḥ śabdena mahatā bhartsayantau parasparam pāṣāṇasaṃghātanibhaiḥ prahārair abhijaghnatuḥ

Sanskrit only: no published translation is held for this verse.

व्यूढोरस्कौ दीर्घभुजौ नियुद्धकुशलाव् उभौ बाहुभिः समसज्जेताम् आयसैः परिघैर् इव

vyūḍhoraskau dīrghabhujau niyuddhakuśalāv ubhau bāhubhiḥ samasajjetām āyasaiḥ parighair iva

Sanskrit only: no published translation is held for this verse.

कार्त्तिकस्य तु मासस्य प्रवृत्तं प्रथमे ऽहनि अनारतं दिवारात्रम् अविश्रान्तम् अवर्तत

kārttikasya tu māsasya pravṛttaṃ prathame 'hani anārataṃ divārātram aviśrāntam avartata

Sanskrit only: no published translation is held for this verse.

तद् वृत्तं तु त्रयोदश्यां समवेतं महात्मनोः चतुर्दश्यां निशायां तु निवृत्तो मागधः क्लमात्

tad vṛttaṃ tu trayodaśyāṃ samavetaṃ mahātmanoḥ caturdaśyāṃ niśāyāṃ tu nivṛtto māgadhaḥ klamāt

Sanskrit only: no published translation is held for this verse.

तं राजानं तथा क्लान्तं दृष्ट्वा राजञ् जनार्दनः उवाच भीमकर्माणं भीमं संबोधयन्न् इव

taṃ rājānaṃ tathā klāntaṃ dṛṣṭvā rājañ janārdanaḥ uvāca bhīmakarmāṇaṃ bhīmaṃ saṃbodhayann iva

Sanskrit only: no published translation is held for this verse.

क्लान्तः शत्रुर् न कौन्तेय लभ्यः पीडयितुं रणे पीड्यमानो हि कार्त्स्न्येन जह्याज् जीवितम् आत्मनः

klāntaḥ śatrur na kaunteya labhyaḥ pīḍayituṃ raṇe pīḍyamāno hi kārtsnyena jahyāj jīvitam ātmanaḥ

Sanskrit only: no published translation is held for this verse.

तस्मात् ते नैव कौन्तेय पीडनीयो नराधिपः समम् एतेन युध्यस्व बाहुभ्यां भरतर्षभ

tasmāt te naiva kaunteya pīḍanīyo narādhipaḥ samam etena yudhyasva bāhubhyāṃ bharatarṣabha

Sanskrit only: no published translation is held for this verse.

एवम् उक्तः स कृष्णेन पाण्डवः परवीरहा जरासंधस्य तद् रन्ध्रं ज्ञात्वा चक्रे मतिं वधे

evam uktaḥ sa kṛṣṇena pāṇḍavaḥ paravīrahā jarāsaṃdhasya tad randhraṃ jñātvā cakre matiṃ vadhe

Sanskrit only: no published translation is held for this verse.

ततस् तम् अजितं जेतुं जरासंधं वृकोदरः संरभ्य बलिनां मुख्यो जग्राह कुरुनन्दनः

tatas tam ajitaṃ jetuṃ jarāsaṃdhaṃ vṛkodaraḥ saṃrabhya balināṃ mukhyo jagrāha kurunandanaḥ

Sanskrit only: no published translation is held for this verse.