Mahābhārata (critical edition) 2.25

वैशंपायन उवाच स श्वेतपर्वतं वीरः समतिक्रम्य भारत देशं किंपुरुषावासं द्रुमपुत्रेण रक्षितम्

vaiśaṃpāyana uvāca sa śvetaparvataṃ vīraḥ samatikramya bhārata deśaṃ kiṃpuruṣāvāsaṃ drumaputreṇa rakṣitam

Sanskrit only: no published translation is held for this verse.

महता संनिपातेन क्षत्रियान्तकरेण ह व्यजयत् पाण्डवश्रेष्ठः करे चैव न्यवेशयत्

mahatā saṃnipātena kṣatriyāntakareṇa ha vyajayat pāṇḍavaśreṣṭhaḥ kare caiva nyaveśayat

Sanskrit only: no published translation is held for this verse.

तं जित्वा हाटकं नाम देशं गुह्यकरक्षितम् पाकशासनिर् अव्यग्रः सहसैन्यः समासदत्

taṃ jitvā hāṭakaṃ nāma deśaṃ guhyakarakṣitam pākaśāsanir avyagraḥ sahasainyaḥ samāsadat

Sanskrit only: no published translation is held for this verse.

तांस् तु सान्त्वेन निर्जित्य मानसं सर उत्तमम् ऋषिकुल्याश् च ताः सर्वा ददर्श कुरुनन्दनः

tāṃs tu sāntvena nirjitya mānasaṃ sara uttamam ṛṣikulyāś ca tāḥ sarvā dadarśa kurunandanaḥ

Sanskrit only: no published translation is held for this verse.

सरो मानसम् आसाद्य हाटकान् अभितः प्रभुः गन्धर्वरक्षितं देशं व्यजयत् पाण्डवस् ततः

saro mānasam āsādya hāṭakān abhitaḥ prabhuḥ gandharvarakṣitaṃ deśaṃ vyajayat pāṇḍavas tataḥ

Sanskrit only: no published translation is held for this verse.

तत्र तित्तिरिकल्माषान् मण्डूकाक्षान् हयोत्तमान् लेभे स करम् अत्यन्तं गन्धर्वनगरात् तदा

tatra tittirikalmāṣān maṇḍūkākṣān hayottamān lebhe sa karam atyantaṃ gandharvanagarāt tadā

Sanskrit only: no published translation is held for this verse.

उत्तरं हरिवर्षं तु समासाद्य स पाण्डवः इयेष जेतुं तं देशं पाकशासननन्दनः

uttaraṃ harivarṣaṃ tu samāsādya sa pāṇḍavaḥ iyeṣa jetuṃ taṃ deśaṃ pākaśāsananandanaḥ

Sanskrit only: no published translation is held for this verse.

तत एनं महाकाया महावीर्या महाबलाः द्वारपालाः समासाद्य हृष्टा वचनम् अब्रुवन्

tata enaṃ mahākāyā mahāvīryā mahābalāḥ dvārapālāḥ samāsādya hṛṣṭā vacanam abruvan

Sanskrit only: no published translation is held for this verse.

पार्थ नेदं त्वया शक्यं पुरं जेतुं कथं चन उपावर्तस्व कल्याण पर्याप्तम् इदम् अच्युत

pārtha nedaṃ tvayā śakyaṃ puraṃ jetuṃ kathaṃ cana upāvartasva kalyāṇa paryāptam idam acyuta

Sanskrit only: no published translation is held for this verse.

इदं पुरं यः प्रविशेद् ध्रुवं स न भवेन् नरः प्रीयामहे त्वया वीर पर्याप्तो विजयस् तव

idaṃ puraṃ yaḥ praviśed dhruvaṃ sa na bhaven naraḥ prīyāmahe tvayā vīra paryāpto vijayas tava

Sanskrit only: no published translation is held for this verse.

न चापि किं चिज् जेतव्यम् अर्जुनात्र प्रदृश्यते उत्तराः कुरवो ह्य् एते नात्र युद्धं प्रवर्तते

na cāpi kiṃ cij jetavyam arjunātra pradṛśyate uttarāḥ kuravo hy ete nātra yuddhaṃ pravartate

Sanskrit only: no published translation is held for this verse.

प्रविष्टश् चापि कौन्तेय नेह द्रक्ष्यसि किं चन न हि मानुषदेहेन शक्यम् अत्राभिवीक्षितुम्

praviṣṭaś cāpi kaunteya neha drakṣyasi kiṃ cana na hi mānuṣadehena śakyam atrābhivīkṣitum

Sanskrit only: no published translation is held for this verse.

अथेह पुरुषव्याघ्र किं चिद् अन्यच् चिकीर्षसि तद् ब्रवीहि करिष्यामो वचनात् तव भारत

atheha puruṣavyāghra kiṃ cid anyac cikīrṣasi tad bravīhi kariṣyāmo vacanāt tava bhārata

Sanskrit only: no published translation is held for this verse.

ततस् तान् अब्रवीद् राजन्न् अर्जुनः पाकशासनिः पार्थिवत्वं चिकीर्षामि धर्मराजस्य धीमतः

tatas tān abravīd rājann arjunaḥ pākaśāsaniḥ pārthivatvaṃ cikīrṣāmi dharmarājasya dhīmataḥ

Sanskrit only: no published translation is held for this verse.

न प्रवेक्ष्यामि वो देशं बाध्यत्वं यदि मानुषैः युधिष्ठिराय यत् किं चित् करवन् नः प्रदीयताम्

na pravekṣyāmi vo deśaṃ bādhyatvaṃ yadi mānuṣaiḥ yudhiṣṭhirāya yat kiṃ cit karavan naḥ pradīyatām

Sanskrit only: no published translation is held for this verse.

ततो दिव्यानि वस्त्राणि दिव्यान्य् आभरणानि च मोकाजिनानि दिव्यानि तस्मै ते प्रददुः करम्

tato divyāni vastrāṇi divyāny ābharaṇāni ca mokājināni divyāni tasmai te pradaduḥ karam

Sanskrit only: no published translation is held for this verse.

एवं स पुरुषव्याघ्रो विजिग्ये दिशम् उत्तराम् संग्रामान् सुबहून् कृत्वा क्षत्रियैर् दस्युभिस् तथा

evaṃ sa puruṣavyāghro vijigye diśam uttarām saṃgrāmān subahūn kṛtvā kṣatriyair dasyubhis tathā

Sanskrit only: no published translation is held for this verse.

स विनिर्जित्य राज्ञस् तान् करे च विनिवेश्य ह धनान्य् आदाय सर्वेभ्यो रत्नानि विविधानि च

sa vinirjitya rājñas tān kare ca viniveśya ha dhanāny ādāya sarvebhyo ratnāni vividhāni ca

Sanskrit only: no published translation is held for this verse.

हयांस् तित्तिरिकल्माषाञ् शुकपत्रनिभान् अपि मयूरसदृशांश् चान्यान् सर्वान् अनिलरंहसः

hayāṃs tittirikalmāṣāñ śukapatranibhān api mayūrasadṛśāṃś cānyān sarvān anilaraṃhasaḥ

Sanskrit only: no published translation is held for this verse.

वृतः सुमहता राजन् बलेन चतुरङ्गिणा आजगाम पुनर् वीरः शक्रप्रस्थं पुरोत्तमम्

vṛtaḥ sumahatā rājan balena caturaṅgiṇā ājagāma punar vīraḥ śakraprasthaṃ purottamam

Sanskrit only: no published translation is held for this verse.