Mahābhārata (critical edition) 2.36

वैशंपायन उवाच एवम् उक्त्वा ततो भीष्मो विरराम महायशाः व्याजहारोत्तरं तत्र सहदेवो ऽर्थवद् वचः

vaiśaṃpāyana uvāca evam uktvā tato bhīṣmo virarāma mahāyaśāḥ vyājahārottaraṃ tatra sahadevo 'rthavad vacaḥ

Sanskrit only: no published translation is held for this verse.

केशवं केशिहन्तारम् अप्रमेयपराक्रमम् पूज्यमानं मया यो वः कृष्णं न सहते नृपाः

keśavaṃ keśihantāram aprameyaparākramam pūjyamānaṃ mayā yo vaḥ kṛṣṇaṃ na sahate nṛpāḥ

Sanskrit only: no published translation is held for this verse.

सर्वेषां बलिनां मूर्ध्नि मयेदं निहितं पदम् एवम् उक्ते मया सम्यग् उत्तरं प्रब्रवीतु सः

sarveṣāṃ balināṃ mūrdhni mayedaṃ nihitaṃ padam evam ukte mayā samyag uttaraṃ prabravītu saḥ

Sanskrit only: no published translation is held for this verse.

मतिमन्तस् तु ये के चिद् आचार्यं पितरं गुरुम् अर्च्यम् अर्चितम् अर्चार्हम् अनुजानन्तु ते नृपाः

matimantas tu ye ke cid ācāryaṃ pitaraṃ gurum arcyam arcitam arcārham anujānantu te nṛpāḥ

Sanskrit only: no published translation is held for this verse.

ततो न व्याजहारैषां कश् चिद् बुद्धिमतां सताम् मानिनां बलिनां राज्ञां मध्ये संदर्शिते पदे

tato na vyājahāraiṣāṃ kaś cid buddhimatāṃ satām mānināṃ balināṃ rājñāṃ madhye saṃdarśite pade

Sanskrit only: no published translation is held for this verse.

ततो ऽपतत् पुष्पवृष्टिः सहदेवस्य मूर्धनि अदृश्यरूपा वाचश् चाप्य् अब्रुवन् साधु साध्व् इति

tato 'patat puṣpavṛṣṭiḥ sahadevasya mūrdhani adṛśyarūpā vācaś cāpy abruvan sādhu sādhv iti

Sanskrit only: no published translation is held for this verse.

आविध्यद् अजिनं कृष्णं भविष्यद्भूतजल्पकः सर्वसंशयनिर्मोक्ता नारदः सर्वलोकवित्

āvidhyad ajinaṃ kṛṣṇaṃ bhaviṣyadbhūtajalpakaḥ sarvasaṃśayanirmoktā nāradaḥ sarvalokavit

Sanskrit only: no published translation is held for this verse.

तत्राहूतागताः सर्वे सुनीथप्रमुखा गणाः संप्रादृश्यन्त संक्रुद्धा विवर्णवदनास् तथा

tatrāhūtāgatāḥ sarve sunīthapramukhā gaṇāḥ saṃprādṛśyanta saṃkruddhā vivarṇavadanās tathā

Sanskrit only: no published translation is held for this verse.

युधिष्ठिराभिषेकं च वासुदेवस्य चार्हणम् अब्रुवंस् तत्र राजानो निर्वेदाद् आत्मनिश्चयात्

yudhiṣṭhirābhiṣekaṃ ca vāsudevasya cārhaṇam abruvaṃs tatra rājāno nirvedād ātmaniścayāt

Sanskrit only: no published translation is held for this verse.

सुहृद्भिर् वार्यमाणानां तेषां हि वपुर् आबभौ आमिषाद् अपकृष्टानां सिंहानाम् इव गर्जताम्

suhṛdbhir vāryamāṇānāṃ teṣāṃ hi vapur ābabhau āmiṣād apakṛṣṭānāṃ siṃhānām iva garjatām

Sanskrit only: no published translation is held for this verse.

तं बलौघम् अपर्यन्तं राजसागरम् अक्षयम् कुर्वाणं समयं कृष्णो युद्धाय बुबुधे तदा

taṃ balaugham aparyantaṃ rājasāgaram akṣayam kurvāṇaṃ samayaṃ kṛṣṇo yuddhāya bubudhe tadā

Sanskrit only: no published translation is held for this verse.

पूजयित्वा तु पूजार्हं ब्रह्मक्षत्रं विशेषतः सहदेवो नृणां देवः समापयत कर्म तत्

pūjayitvā tu pūjārhaṃ brahmakṣatraṃ viśeṣataḥ sahadevo nṛṇāṃ devaḥ samāpayata karma tat

Sanskrit only: no published translation is held for this verse.

तस्मिन्न् अभ्यर्चिते कृष्णे सुनीथः शत्रुकर्षणः अतिताम्रेक्षणः कोपाद् उवाच मनुजाधिपान्

tasminn abhyarcite kṛṣṇe sunīthaḥ śatrukarṣaṇaḥ atitāmrekṣaṇaḥ kopād uvāca manujādhipān

Sanskrit only: no published translation is held for this verse.

स्थितः सेनापतिर् वो ऽहं मन्यध्वं किं नु सांप्रतम् युधि तिष्ठाम संनह्य समेतान् वृष्णिपाण्डवान्

sthitaḥ senāpatir vo 'haṃ manyadhvaṃ kiṃ nu sāṃpratam yudhi tiṣṭhāma saṃnahya sametān vṛṣṇipāṇḍavān

Sanskrit only: no published translation is held for this verse.

इति सर्वान् समुत्साह्य राज्ञस् तांश् चेदिपुंगवः यज्ञोपघाताय ततः सो ऽमन्त्रयत राजभिः

iti sarvān samutsāhya rājñas tāṃś cedipuṃgavaḥ yajñopaghātāya tataḥ so 'mantrayata rājabhiḥ

Sanskrit only: no published translation is held for this verse.