Mahābhārata (critical edition) 2.59

दुर्योधन उवाच एहि क्षत्तर् द्रौपदीम् आनयस्व; प्रियां भार्यां संमतां पाण्डवानाम् संमार्जतां वेश्म परैतु शीघ्रम्; आनन्दो नः सह दासीभिर् अस्तु

duryodhana uvāca ehi kṣattar draupadīm ānayasva; priyāṃ bhāryāṃ saṃmatāṃ pāṇḍavānām saṃmārjatāṃ veśma paraitu śīghram; ānando naḥ saha dāsībhir astu

Sanskrit only: no published translation is held for this verse.

विदुर उवाच दुर्विभाव्यं भवति त्वादृशेन; न मन्द संबुध्यसि पाशबद्धः प्रपाते त्वं लम्बमानो न वेत्सि; व्याघ्रान् मृगः कोपयसे ऽतिबाल्यात्

vidura uvāca durvibhāvyaṃ bhavati tvādṛśena; na manda saṃbudhyasi pāśabaddhaḥ prapāte tvaṃ lambamāno na vetsi; vyāghrān mṛgaḥ kopayase 'tibālyāt

Sanskrit only: no published translation is held for this verse.

आशीविषाः शिरसि ते पूर्णकोशा महाविषाः मा कोपिष्ठाः सुमन्दात्मन् मा गमस् त्वं यमक्षयम्

āśīviṣāḥ śirasi te pūrṇakośā mahāviṣāḥ mā kopiṣṭhāḥ sumandātman mā gamas tvaṃ yamakṣayam

Sanskrit only: no published translation is held for this verse.

न हि दासीत्वम् आपन्ना कृष्णा भवति भारत अनीशेन हि राज्ञैषा पणे न्यस्तेति मे मतिः

na hi dāsītvam āpannā kṛṣṇā bhavati bhārata anīśena hi rājñaiṣā paṇe nyasteti me matiḥ

Sanskrit only: no published translation is held for this verse.

अयं धत्ते वेणुर् इवात्मघाती; फलं राजा धृतराष्ट्रस्य पुत्रः द्यूतं हि वैराय महाभयाय; पक्वो न बुध्यत्य् अयम् अन्तकाले

ayaṃ dhatte veṇur ivātmaghātī; phalaṃ rājā dhṛtarāṣṭrasya putraḥ dyūtaṃ hi vairāya mahābhayāya; pakvo na budhyaty ayam antakāle

Sanskrit only: no published translation is held for this verse.

नारुंतुदः स्यान् न नृशंसवादी; न हीनतः परम् अभ्याददीत ययास्य वाचा पर उद्विजेत; न तां वदेद् रुशतीं पापलोक्याम्

nāruṃtudaḥ syān na nṛśaṃsavādī; na hīnataḥ param abhyādadīta yayāsya vācā para udvijeta; na tāṃ vaded ruśatīṃ pāpalokyām

Sanskrit only: no published translation is held for this verse.

समुच्चरन्त्य् अतिवादा हि वक्त्राद्; यैर् आहतः शोचति रात्र्यहानि परस्य नामर्मसु ते पतन्ति; तान् पण्डितो नावसृजेत् परेषु

samuccaranty ativādā hi vaktrād; yair āhataḥ śocati rātryahāni parasya nāmarmasu te patanti; tān paṇḍito nāvasṛjet pareṣu

Sanskrit only: no published translation is held for this verse.

अजो हि शस्त्रम् अखनत् किलैकः; शस्त्रे विपन्ने पद्भिर् अपास्य भूमिम् निकृन्तनं स्वस्य कण्ठस्य घोरं; तद्वद् वैरं मा खनीः पाण्डुपुत्रैः

ajo hi śastram akhanat kilaikaḥ; śastre vipanne padbhir apāsya bhūmim nikṛntanaṃ svasya kaṇṭhasya ghoraṃ; tadvad vairaṃ mā khanīḥ pāṇḍuputraiḥ

Sanskrit only: no published translation is held for this verse.

न किं चिद् ईड्यं प्रवदन्ति पापं; वनेचरं वा गृहमेधिनं वा तपस्विनं संपरिपूर्णविद्यं; भषन्ति हैवं श्वनराः सदैव

na kiṃ cid īḍyaṃ pravadanti pāpaṃ; vanecaraṃ vā gṛhamedhinaṃ vā tapasvinaṃ saṃparipūrṇavidyaṃ; bhaṣanti haivaṃ śvanarāḥ sadaiva

Sanskrit only: no published translation is held for this verse.

द्वारं सुघोरं नरकस्य जिह्मं; न बुध्यसे धृतराष्ट्रस्य पुत्र त्वाम् अन्वेतारो बहवः कुरूणां; द्यूतोदये सह दुःशासनेन

dvāraṃ sughoraṃ narakasya jihmaṃ; na budhyase dhṛtarāṣṭrasya putra tvām anvetāro bahavaḥ kurūṇāṃ; dyūtodaye saha duḥśāsanena

Sanskrit only: no published translation is held for this verse.

मज्जन्त्य् अलाबूनि शिलाः प्लवन्ते; मुह्यन्ति नावो ऽम्भसि शश्वद् एव मूढो राजा धृतराष्ट्रस्य पुत्रो; न मे वाचः पथ्यरूपाः शृणोति

majjanty alābūni śilāḥ plavante; muhyanti nāvo 'mbhasi śaśvad eva mūḍho rājā dhṛtarāṣṭrasya putro; na me vācaḥ pathyarūpāḥ śṛṇoti

Sanskrit only: no published translation is held for this verse.

अन्तो नूनं भवितायं कुरूणां; सुदारुणः सर्वहरो विनाशः वाचः काव्याः सुहृदां पथ्यरूपा; न श्रूयन्ते वर्धते लोभ एव

anto nūnaṃ bhavitāyaṃ kurūṇāṃ; sudāruṇaḥ sarvaharo vināśaḥ vācaḥ kāvyāḥ suhṛdāṃ pathyarūpā; na śrūyante vardhate lobha eva

Sanskrit only: no published translation is held for this verse.