Library·Mahābhārata (critical edition)·3·3.117
राम उवाच ममापराधात् तैः क्षुद्रैर् हतस् त्वं तात बालिशैः कार्तवीर्यस्य दायादैर् वने मृग इवेषुभिः
rāma uvāca mamāparādhāt taiḥ kṣudrair hatas tvaṃ tāta bāliśaiḥ kārtavīryasya dāyādair vane mṛga iveṣubhiḥ
Sanskrit only: no published translation is held for this verse.
धर्मज्ञस्य कथं तात वर्तमानस्य सत्पथे मृत्युर् एवंविधो युक्तः सर्वभूतेष्व् अनागसः
dharmajñasya kathaṃ tāta vartamānasya satpathe mṛtyur evaṃvidho yuktaḥ sarvabhūteṣv anāgasaḥ
Sanskrit only: no published translation is held for this verse.
किं नु तैर् न कृतं पापं यैर् भवांस् तपसि स्थितः अयुध्यमानो वृद्धः सन् हतः शरशतैः शितैः
kiṃ nu tair na kṛtaṃ pāpaṃ yair bhavāṃs tapasi sthitaḥ ayudhyamāno vṛddhaḥ san hataḥ śaraśataiḥ śitaiḥ
Sanskrit only: no published translation is held for this verse.
किं नु ते तत्र वक्ष्यन्ति सचिवेषु सुहृत्सु च अयुध्यमानं धर्मज्ञम् एकं हत्वानपत्रपाः
kiṃ nu te tatra vakṣyanti saciveṣu suhṛtsu ca ayudhyamānaṃ dharmajñam ekaṃ hatvānapatrapāḥ
Sanskrit only: no published translation is held for this verse.
अकृतव्रण उवाच विलप्यैवं स करुणं बहु नानाविधं नृप प्रेतकार्याणि सर्वाणि पितुश् चक्रे महातपाः
akṛtavraṇa uvāca vilapyaivaṃ sa karuṇaṃ bahu nānāvidhaṃ nṛpa pretakāryāṇi sarvāṇi pituś cakre mahātapāḥ
Sanskrit only: no published translation is held for this verse.
ददाह पितरं चाग्नौ रामः परपुरंजयः प्रतिजज्ञे वधं चापि सर्वक्षत्रस्य भारत
dadāha pitaraṃ cāgnau rāmaḥ parapuraṃjayaḥ pratijajñe vadhaṃ cāpi sarvakṣatrasya bhārata
Sanskrit only: no published translation is held for this verse.
संक्रुद्धो ऽतिबलः शूरः शस्त्रम् आदाय वीर्यवान् जघ्निवान् कार्तवीर्यस्य सुतान् एको ऽन्तकोपमः
saṃkruddho 'tibalaḥ śūraḥ śastram ādāya vīryavān jaghnivān kārtavīryasya sutān eko 'ntakopamaḥ
Sanskrit only: no published translation is held for this verse.
तेषां चानुगता ये च क्षत्रियाः क्षत्रियर्षभ तांश् च सर्वान् अवामृद्नाद् रामः प्रहरतां वरः
teṣāṃ cānugatā ye ca kṣatriyāḥ kṣatriyarṣabha tāṃś ca sarvān avāmṛdnād rāmaḥ praharatāṃ varaḥ
Sanskrit only: no published translation is held for this verse.
त्रिःसप्तकृत्वः पृथिवीं कृत्वा निःक्षत्रियां प्रभुः समन्तपञ्चके पञ्च चकार रुधिरह्रदान्
triḥsaptakṛtvaḥ pṛthivīṃ kṛtvā niḥkṣatriyāṃ prabhuḥ samantapañcake pañca cakāra rudhirahradān
Sanskrit only: no published translation is held for this verse.
स तेषु तर्पयाम् आस पितॄन् भृगुकुलोद्वहः साक्षाद् ददर्श चर्चीकं स च रामं न्यवारयत्
sa teṣu tarpayām āsa pitṝn bhṛgukulodvahaḥ sākṣād dadarśa carcīkaṃ sa ca rāmaṃ nyavārayat
Sanskrit only: no published translation is held for this verse.
ततो यज्ञेन महता जामदग्न्यः प्रतापवान् तर्पयाम् आस देवेन्द्रम् ऋत्विग्भ्यश् च महीं ददौ
tato yajñena mahatā jāmadagnyaḥ pratāpavān tarpayām āsa devendram ṛtvigbhyaś ca mahīṃ dadau
Sanskrit only: no published translation is held for this verse.
वेदीं चाप्य् अददद् धैमीं कश्यपाय महात्मने दशव्यामायतां कृत्वा नवोत्सेधां विशां पते
vedīṃ cāpy adadad dhaimīṃ kaśyapāya mahātmane daśavyāmāyatāṃ kṛtvā navotsedhāṃ viśāṃ pate
Sanskrit only: no published translation is held for this verse.
तां कश्यपस्यानुमते ब्राह्मणाः खण्डशस् तदा व्यभजंस् तेन ते राजन् प्रख्याताः खाण्डवायनाः
tāṃ kaśyapasyānumate brāhmaṇāḥ khaṇḍaśas tadā vyabhajaṃs tena te rājan prakhyātāḥ khāṇḍavāyanāḥ
Sanskrit only: no published translation is held for this verse.
स प्रदाय महीं तस्मै कश्यपाय महात्मने अस्मिन् महेन्द्रे शैलेन्द्रे वसत्य् अमितविक्रमः
sa pradāya mahīṃ tasmai kaśyapāya mahātmane asmin mahendre śailendre vasaty amitavikramaḥ
Sanskrit only: no published translation is held for this verse.
एवं वैरम् अभूत् तस्य क्षत्रियैर् लोकवासिभिः पृथिवी चापि विजिता रामेणामिततेजसा
evaṃ vairam abhūt tasya kṣatriyair lokavāsibhiḥ pṛthivī cāpi vijitā rāmeṇāmitatejasā
Sanskrit only: no published translation is held for this verse.
वैशंपायन उवाच ततश् चतुर्दशीं रामः समयेन महामनाः दर्शयाम् आस तान् विप्रान् धर्मराजं च सानुजम्
vaiśaṃpāyana uvāca tataś caturdaśīṃ rāmaḥ samayena mahāmanāḥ darśayām āsa tān viprān dharmarājaṃ ca sānujam
Sanskrit only: no published translation is held for this verse.
स तम् आनर्च राजेन्द्रो भ्रातृभिः सहितः प्रभुः द्विजानां च परां पूजां चक्रे नृपतिसत्तमः
sa tam ānarca rājendro bhrātṛbhiḥ sahitaḥ prabhuḥ dvijānāṃ ca parāṃ pūjāṃ cakre nṛpatisattamaḥ
Sanskrit only: no published translation is held for this verse.
अर्चयित्वा जामदग्न्यं पूजितस् तेन चाभिभूः महेन्द्र उष्य तां रात्रिं प्रययौ दक्षिणामुखः
arcayitvā jāmadagnyaṃ pūjitas tena cābhibhūḥ mahendra uṣya tāṃ rātriṃ prayayau dakṣiṇāmukhaḥ
Sanskrit only: no published translation is held for this verse.