Library·Mahābhārata (critical edition)·3·3.151
वैशंपायन उवाच स गत्वा नलिनीं रम्यां राक्षसैर् अभिरक्षिताम् कैलासशिखरे रम्ये ददर्श शुभकानने
vaiśaṃpāyana uvāca sa gatvā nalinīṃ ramyāṃ rākṣasair abhirakṣitām kailāsaśikhare ramye dadarśa śubhakānane
Sanskrit only: no published translation is held for this verse.
कुबेरभवनाभ्याशे जातां पर्वतनिर्झरे सुरम्यां विपुलच्छायां नानाद्रुमलतावृताम्
kuberabhavanābhyāśe jātāṃ parvatanirjhare suramyāṃ vipulacchāyāṃ nānādrumalatāvṛtām
Sanskrit only: no published translation is held for this verse.
हरिताम्बुजसंछन्नां दिव्यां कनकपुष्कराम् पवित्रभूतां लोकस्य शुभाम् अद्भुतदर्शनाम्
haritāmbujasaṃchannāṃ divyāṃ kanakapuṣkarām pavitrabhūtāṃ lokasya śubhām adbhutadarśanām
Sanskrit only: no published translation is held for this verse.
तत्रामृतरसं शीतं लघु कुन्तीसुतः शुभम् ददर्श विमलं तोयं शिवं बहु च पाण्डवः
tatrāmṛtarasaṃ śītaṃ laghu kuntīsutaḥ śubham dadarśa vimalaṃ toyaṃ śivaṃ bahu ca pāṇḍavaḥ
Sanskrit only: no published translation is held for this verse.
तां तु पुष्करिणीं रम्यां पद्मसौगन्धिकायुताम् जातरूपमयैः पद्मैश् छन्नां परमगन्धिभिः
tāṃ tu puṣkariṇīṃ ramyāṃ padmasaugandhikāyutām jātarūpamayaiḥ padmaiś channāṃ paramagandhibhiḥ
Sanskrit only: no published translation is held for this verse.
वैडूर्यवरनालैश् च बहुचित्रैर् मनोहरैः हंसकारण्डवोद्धूतैः सृजद्भिर् अमलं रजः
vaiḍūryavaranālaiś ca bahucitrair manoharaiḥ haṃsakāraṇḍavoddhūtaiḥ sṛjadbhir amalaṃ rajaḥ
Sanskrit only: no published translation is held for this verse.
आक्रीडं यक्षराजस्य कुबेरस्य महात्मनः गन्धर्वैर् अप्सरोभिश् च देवैश् च परमार्चिताम्
ākrīḍaṃ yakṣarājasya kuberasya mahātmanaḥ gandharvair apsarobhiś ca devaiś ca paramārcitām
Sanskrit only: no published translation is held for this verse.
सेविताम् ऋषिभिर् दिव्यां यक्षैः किंपुरुषैस् तथा राक्षसैः किंनरैश् चैव गुप्तां वैश्रवणेन च
sevitām ṛṣibhir divyāṃ yakṣaiḥ kiṃpuruṣais tathā rākṣasaiḥ kiṃnaraiś caiva guptāṃ vaiśravaṇena ca
Sanskrit only: no published translation is held for this verse.
तां च दृष्ट्वैव कौन्तेयो भीमसेनो महाबलः बभूव परमप्रीतो दिव्यं संप्रेक्ष्य तत् सरः
tāṃ ca dṛṣṭvaiva kaunteyo bhīmaseno mahābalaḥ babhūva paramaprīto divyaṃ saṃprekṣya tat saraḥ
Sanskrit only: no published translation is held for this verse.
तच् च क्रोधवशा नाम राक्षसा राजशासनात् रक्षन्ति शतसाहस्राश् चित्रायुधपरिच्छदाः
tac ca krodhavaśā nāma rākṣasā rājaśāsanāt rakṣanti śatasāhasrāś citrāyudhaparicchadāḥ
Sanskrit only: no published translation is held for this verse.
ते तु दृष्ट्वैव कौन्तेयम् अजिनैः परिवारितम् रुक्माङ्गदधरं वीरं भीमं भीमपराक्रमम्
te tu dṛṣṭvaiva kaunteyam ajinaiḥ parivāritam rukmāṅgadadharaṃ vīraṃ bhīmaṃ bhīmaparākramam
Sanskrit only: no published translation is held for this verse.
सायुधं बद्धनिस्त्रिंशम् अशङ्कितम् अरिंदमम् पुष्करेप्सुम् उपायान्तम् अन्योन्यम् अभिचुक्रुशुः
sāyudhaṃ baddhanistriṃśam aśaṅkitam ariṃdamam puṣkarepsum upāyāntam anyonyam abhicukruśuḥ
Sanskrit only: no published translation is held for this verse.
अयं पुरुषशार्दूलः सायुधो ऽजिनसंवृतः यच् चिकीर्षुर् इह प्राप्तस् तत् संप्रष्टुम् इहार्हथ
ayaṃ puruṣaśārdūlaḥ sāyudho 'jinasaṃvṛtaḥ yac cikīrṣur iha prāptas tat saṃpraṣṭum ihārhatha
Sanskrit only: no published translation is held for this verse.
ततः सर्वे महाबाहुं समासाद्य वृकोदरम् तेजोयुक्तम् अपृच्छन्त कस् त्वम् आख्यातुम् अर्हसि
tataḥ sarve mahābāhuṃ samāsādya vṛkodaram tejoyuktam apṛcchanta kas tvam ākhyātum arhasi
Sanskrit only: no published translation is held for this verse.
मुनिवेषधरश् चासि चीरवासाश् च लक्ष्यसे यदर्थम् असि संप्राप्तस् तद् आचक्ष्व महाद्युते
muniveṣadharaś cāsi cīravāsāś ca lakṣyase yadartham asi saṃprāptas tad ācakṣva mahādyute
Sanskrit only: no published translation is held for this verse.