Mahābhārata (critical edition) 3.153

वैशंपायन उवाच ततस् तानि महार्हाणि दिव्यानि भरतर्षभ बहूनि बहुरूपाणि विरजांसि समाददे

vaiśaṃpāyana uvāca tatas tāni mahārhāṇi divyāni bharatarṣabha bahūni bahurūpāṇi virajāṃsi samādade

Sanskrit only: no published translation is held for this verse.

ततो वायुर् महाञ् शीघ्रो नीचैः शर्करकर्षणः प्रादुरासीत् खरस्पर्शः संग्रामम् अभिचोदयन्

tato vāyur mahāñ śīghro nīcaiḥ śarkarakarṣaṇaḥ prādurāsīt kharasparśaḥ saṃgrāmam abhicodayan

Sanskrit only: no published translation is held for this verse.

पपात महती चोल्का सनिर्घाता महाप्रभा निष्प्रभश् चाभवत् सूर्यश् छन्नरश्मिस् तमोवृतः

papāta mahatī colkā sanirghātā mahāprabhā niṣprabhaś cābhavat sūryaś channaraśmis tamovṛtaḥ

Sanskrit only: no published translation is held for this verse.

निर्घातश् चाभवद् भीमो भीमे विक्रमम् आस्थिते चचाल पृथिवी चापि पांसुवर्षं पपात च

nirghātaś cābhavad bhīmo bhīme vikramam āsthite cacāla pṛthivī cāpi pāṃsuvarṣaṃ papāta ca

Sanskrit only: no published translation is held for this verse.

सलोहिता दिशश् चासन् खरवाचो मृगद्विजाः तमोवृतम् अभूत् सर्वं न प्रज्ञायत किं चन

salohitā diśaś cāsan kharavāco mṛgadvijāḥ tamovṛtam abhūt sarvaṃ na prajñāyata kiṃ cana

Sanskrit only: no published translation is held for this verse.

तद् अद्भुतम् अभिप्रेक्ष्य धर्मपुत्रो युधिष्ठिरः उवाच वदतां श्रेष्ठः को ऽस्मान् अभिभविष्यति

tad adbhutam abhiprekṣya dharmaputro yudhiṣṭhiraḥ uvāca vadatāṃ śreṣṭhaḥ ko 'smān abhibhaviṣyati

Sanskrit only: no published translation is held for this verse.

सज्जीभवत भद्रं वः पाण्डवा युद्धदुर्मदाः यथारूपाणि पश्यामि स्वभ्यग्रो नः पराक्रमः

sajjībhavata bhadraṃ vaḥ pāṇḍavā yuddhadurmadāḥ yathārūpāṇi paśyāmi svabhyagro naḥ parākramaḥ

Sanskrit only: no published translation is held for this verse.

एवम् उक्त्वा ततो राजा वीक्षां चक्रे समन्ततः अपश्यमानो भीमं च धर्मराजो युधिष्ठिरः

evam uktvā tato rājā vīkṣāṃ cakre samantataḥ apaśyamāno bhīmaṃ ca dharmarājo yudhiṣṭhiraḥ

Sanskrit only: no published translation is held for this verse.

तत्र कृष्णां यमौ चैव समीपस्थान् अरिंदमः पप्रच्छ भ्रातरं भीमं भीमकर्माणम् आहवे

tatra kṛṣṇāṃ yamau caiva samīpasthān ariṃdamaḥ papraccha bhrātaraṃ bhīmaṃ bhīmakarmāṇam āhave

Sanskrit only: no published translation is held for this verse.

कच्चिन् न भीमः पाञ्चालि किं चित् कृत्यं चिकीर्षति कृतवान् अपि वा वीरः साहसं साहसप्रियः

kaccin na bhīmaḥ pāñcāli kiṃ cit kṛtyaṃ cikīrṣati kṛtavān api vā vīraḥ sāhasaṃ sāhasapriyaḥ

Sanskrit only: no published translation is held for this verse.

इमे ह्य् अकस्माद् उत्पाता महासमरदर्शिनः दर्शयन्तो भयं तीव्रं प्रादुर्भूताः समन्ततः

ime hy akasmād utpātā mahāsamaradarśinaḥ darśayanto bhayaṃ tīvraṃ prādurbhūtāḥ samantataḥ

Sanskrit only: no published translation is held for this verse.

तं तथा वादिनं कृष्णा प्रत्युवाच मनस्विनी प्रिया प्रियं चिकीर्षन्ती महिषी चारुहासिनी

taṃ tathā vādinaṃ kṛṣṇā pratyuvāca manasvinī priyā priyaṃ cikīrṣantī mahiṣī cāruhāsinī

Sanskrit only: no published translation is held for this verse.

यत् तत् सौगन्धिकं राजन्न् आहृतं मातरिश्वना तन् मया भीमसेनस्य प्रीतयाद्योपपादितम्

yat tat saugandhikaṃ rājann āhṛtaṃ mātariśvanā tan mayā bhīmasenasya prītayādyopapāditam

Sanskrit only: no published translation is held for this verse.

अपि चोक्तो मया वीरो यदि पश्येद् बहून्य् अपि तानि सर्वाण्य् उपादाय शीघ्रम् आगम्यताम् इति

api cokto mayā vīro yadi paśyed bahūny api tāni sarvāṇy upādāya śīghram āgamyatām iti

Sanskrit only: no published translation is held for this verse.

स तु नूनं महाबाहुः प्रियार्थं मम पाण्डवः प्रागुदीचीं दिशं राजंस् तान्य् आहर्तुम् इतो गतः

sa tu nūnaṃ mahābāhuḥ priyārthaṃ mama pāṇḍavaḥ prāgudīcīṃ diśaṃ rājaṃs tāny āhartum ito gataḥ

Sanskrit only: no published translation is held for this verse.

उक्तस् त्व् एवं तया राजा यमाव् इदम् अथाब्रवीत् गच्छाम सहितास् तूर्णं येन यातो वृकोदरः

uktas tv evaṃ tayā rājā yamāv idam athābravīt gacchāma sahitās tūrṇaṃ yena yāto vṛkodaraḥ

Sanskrit only: no published translation is held for this verse.

वहन्तु राक्षसा विप्रान् यथाश्रान्तान् यथाकृशान् त्वम् अप्य् अमरसंकाश वह कृष्णां घटोत्कच

vahantu rākṣasā viprān yathāśrāntān yathākṛśān tvam apy amarasaṃkāśa vaha kṛṣṇāṃ ghaṭotkaca

Sanskrit only: no published translation is held for this verse.

व्यक्तं दूरम् इतो भीमः प्रविष्ट इति मे मतिः चिरं च तस्य कालो ऽयं स च वायुसमो जवे

vyaktaṃ dūram ito bhīmaḥ praviṣṭa iti me matiḥ ciraṃ ca tasya kālo 'yaṃ sa ca vāyusamo jave

Sanskrit only: no published translation is held for this verse.

तरस्वी वैनतेयस्य सदृशो भुवि लङ्घने उत्पतेद् अपि चाकाशं निपतेच् च यथेच्छकम्

tarasvī vainateyasya sadṛśo bhuvi laṅghane utpated api cākāśaṃ nipatec ca yathecchakam

Sanskrit only: no published translation is held for this verse.

तम् अन्वियाम भवतां प्रभावाद् रजनीचराः पुरा स नापराध्नोति सिद्धानां ब्रह्मवादिनाम्

tam anviyāma bhavatāṃ prabhāvād rajanīcarāḥ purā sa nāparādhnoti siddhānāṃ brahmavādinām

Sanskrit only: no published translation is held for this verse.

तथेत्य् उक्त्वा तु ते सर्वे हैडिम्बप्रमुखास् तदा उद्देशज्ञाः कुबेरस्य नलिन्या भरतर्षभ

tathety uktvā tu te sarve haiḍimbapramukhās tadā uddeśajñāḥ kuberasya nalinyā bharatarṣabha

Sanskrit only: no published translation is held for this verse.

आदाय पाण्डवांश् चैव तांश् च विप्रान् अनेकशः लोमशेनैव सहिताः प्रययुः प्रीतमानसाः

ādāya pāṇḍavāṃś caiva tāṃś ca viprān anekaśaḥ lomaśenaiva sahitāḥ prayayuḥ prītamānasāḥ

Sanskrit only: no published translation is held for this verse.

ते गत्वा सहिताः सर्वे ददृशुस् तत्र कानने प्रफुल्लपङ्कजवतीं नलिनीं सुमनोहराम्

te gatvā sahitāḥ sarve dadṛśus tatra kānane praphullapaṅkajavatīṃ nalinīṃ sumanoharām

Sanskrit only: no published translation is held for this verse.

तं च भीमं महात्मानं तस्यास् तीरे व्यवस्थितम् ददृशुर् निहतांश् चैव यक्षान् सुविपुलेक्षणान्

taṃ ca bhīmaṃ mahātmānaṃ tasyās tīre vyavasthitam dadṛśur nihatāṃś caiva yakṣān suvipulekṣaṇān

Sanskrit only: no published translation is held for this verse.

उद्यम्य च गदां दोर्भ्यां नदीतीरे व्यवस्थितम् प्रजासंक्षेपसमये दण्डहस्तम् इवान्तकम्

udyamya ca gadāṃ dorbhyāṃ nadītīre vyavasthitam prajāsaṃkṣepasamaye daṇḍahastam ivāntakam

Sanskrit only: no published translation is held for this verse.

तं दृष्ट्वा धर्मराजस् तु परिष्वज्य पुनः पुनः उवाच श्लक्ष्णया वाचा कौन्तेय किम् इदं कृतम्

taṃ dṛṣṭvā dharmarājas tu pariṣvajya punaḥ punaḥ uvāca ślakṣṇayā vācā kaunteya kim idaṃ kṛtam

Sanskrit only: no published translation is held for this verse.

साहसं बत भद्रं ते देवानाम् अपि चाप्रियम् पुनर् एवं न कर्तव्यं मम चेद् इच्छसि प्रियम्

sāhasaṃ bata bhadraṃ te devānām api cāpriyam punar evaṃ na kartavyaṃ mama ced icchasi priyam

Sanskrit only: no published translation is held for this verse.

अनुशास्य च कौन्तेयं पद्मानि प्रतिगृह्य च तस्याम् एव नलिन्यां ते विजह्रुर् अमरोपमाः

anuśāsya ca kaunteyaṃ padmāni pratigṛhya ca tasyām eva nalinyāṃ te vijahrur amaropamāḥ

Sanskrit only: no published translation is held for this verse.

एतस्मिन्न् एव काले तु प्रगृहीतशिलायुधाः प्रादुरासन् महाकायास् तस्योद्यानस्य रक्षिणः

etasminn eva kāle tu pragṛhītaśilāyudhāḥ prādurāsan mahākāyās tasyodyānasya rakṣiṇaḥ

Sanskrit only: no published translation is held for this verse.

ते दृष्ट्वा धर्मराजानं देवर्षिं चापि लोमशम् नकुलं सहदेवं च तथान्यान् ब्राह्मणर्षभान् विनयेनानताः सर्वे प्रणिपेतुश् च भारत

te dṛṣṭvā dharmarājānaṃ devarṣiṃ cāpi lomaśam nakulaṃ sahadevaṃ ca tathānyān brāhmaṇarṣabhān vinayenānatāḥ sarve praṇipetuś ca bhārata

Sanskrit only: no published translation is held for this verse.

सान्त्विता धर्मराजेन प्रसेदुः क्षणदाचराः विदिताश् च कुबेरस्य ततस् ते नरपुंगवाः ऊषुर् नातिचिरं कालं रममाणाः कुरूद्वहाः

sāntvitā dharmarājena praseduḥ kṣaṇadācarāḥ viditāś ca kuberasya tatas te narapuṃgavāḥ ūṣur nāticiraṃ kālaṃ ramamāṇāḥ kurūdvahāḥ

Sanskrit only: no published translation is held for this verse.