Library·Mahābhārata (critical edition)·3·3.221
मार्कण्डेय उवाच यदाभिषिक्तो भगवान् सेनापत्येन पावकिः तदा संप्रस्थितः श्रीमान् हृष्टो भद्रवटं हरः रथेनादित्यवर्णेन पार्वत्या सहितः प्रभुः
mārkaṇḍeya uvāca yadābhiṣikto bhagavān senāpatyena pāvakiḥ tadā saṃprasthitaḥ śrīmān hṛṣṭo bhadravaṭaṃ haraḥ rathenādityavarṇena pārvatyā sahitaḥ prabhuḥ
Sanskrit only: no published translation is held for this verse.
सहस्रं तस्य सिंहानां तस्मिन् युक्तं रथोत्तमे उत्पपात दिवं शुभ्रं कालेनाभिप्रचोदितः
sahasraṃ tasya siṃhānāṃ tasmin yuktaṃ rathottame utpapāta divaṃ śubhraṃ kālenābhipracoditaḥ
Sanskrit only: no published translation is held for this verse.
ते पिबन्त इवाकाशं त्रासयन्तश् चराचरान् सिंहा नभस्य् अगच्छन्त नदन्तश् चारुकेसराः
te pibanta ivākāśaṃ trāsayantaś carācarān siṃhā nabhasy agacchanta nadantaś cārukesarāḥ
Sanskrit only: no published translation is held for this verse.
तस्मिन् रथे पशुपतिः स्थितो भात्य् उमया सह विद्युता सहितः सूर्यः सेन्द्रचापे घने यथा
tasmin rathe paśupatiḥ sthito bhāty umayā saha vidyutā sahitaḥ sūryaḥ sendracāpe ghane yathā
Sanskrit only: no published translation is held for this verse.
अग्रतस् तस्य भगवान् धनेशो गुह्यकैः सह आस्थाय रुचिरं याति पुष्पकं नरवाहनः
agratas tasya bhagavān dhaneśo guhyakaiḥ saha āsthāya ruciraṃ yāti puṣpakaṃ naravāhanaḥ
Sanskrit only: no published translation is held for this verse.
ऐरावतं समास्थाय शक्रश् चापि सुरैः सह पृष्ठतो ऽनुययौ यान्तं वरदं वृषभध्वजम्
airāvataṃ samāsthāya śakraś cāpi suraiḥ saha pṛṣṭhato 'nuyayau yāntaṃ varadaṃ vṛṣabhadhvajam
Sanskrit only: no published translation is held for this verse.
जम्भकैर् यक्षरक्षोभिः स्रग्विभिः समलंकृतः यात्य् अमोघो महायक्षो दक्षिणं पक्षम् आस्थितः
jambhakair yakṣarakṣobhiḥ sragvibhiḥ samalaṃkṛtaḥ yāty amogho mahāyakṣo dakṣiṇaṃ pakṣam āsthitaḥ
Sanskrit only: no published translation is held for this verse.
तस्य दक्षिणतो देवा मरुतश् चित्रयोधिनः गच्छन्ति वसुभिः सार्धं रुद्रैश् च सह संगताः
tasya dakṣiṇato devā marutaś citrayodhinaḥ gacchanti vasubhiḥ sārdhaṃ rudraiś ca saha saṃgatāḥ
Sanskrit only: no published translation is held for this verse.
यमश् च मृत्युना सार्धं सर्वतः परिवारितः घोरैर् व्याधिशतैर् याति घोररूपवपुस् तथा
yamaś ca mṛtyunā sārdhaṃ sarvataḥ parivāritaḥ ghorair vyādhiśatair yāti ghorarūpavapus tathā
Sanskrit only: no published translation is held for this verse.
यमस्य पृष्ठतश् चैव घोरस् त्रिशिखरः शितः विजयो नाम रुद्रस्य याति शूलः स्वलंकृतः
yamasya pṛṣṭhataś caiva ghoras triśikharaḥ śitaḥ vijayo nāma rudrasya yāti śūlaḥ svalaṃkṛtaḥ
Sanskrit only: no published translation is held for this verse.
तम् उग्रपाशो वरुणो भगवान् सलिलेश्वरः परिवार्य शनैर् याति यादोभिर् विविधैर् वृतः
tam ugrapāśo varuṇo bhagavān salileśvaraḥ parivārya śanair yāti yādobhir vividhair vṛtaḥ
Sanskrit only: no published translation is held for this verse.
पृष्ठतो विजयस्यापि याति रुद्रस्य पट्टिशः गदामुसलशक्त्याद्यैर् वृतः प्रहरणोत्तमैः
pṛṣṭhato vijayasyāpi yāti rudrasya paṭṭiśaḥ gadāmusalaśaktyādyair vṛtaḥ praharaṇottamaiḥ
Sanskrit only: no published translation is held for this verse.
पट्टिशं त्व् अन्वगाद् राजंश् छत्रं रौद्रं महाप्रभम् कमण्डलुश् चाप्य् अनु तं महर्षिगणसंवृतः
paṭṭiśaṃ tv anvagād rājaṃś chatraṃ raudraṃ mahāprabham kamaṇḍaluś cāpy anu taṃ maharṣigaṇasaṃvṛtaḥ
Sanskrit only: no published translation is held for this verse.
तस्य दक्षिणतो भाति दण्डो गच्छञ् श्रिया वृतः भृग्वङ्गिरोभिः सहितो देवैश् चाप्य् अभिपूजितः
tasya dakṣiṇato bhāti daṇḍo gacchañ śriyā vṛtaḥ bhṛgvaṅgirobhiḥ sahito devaiś cāpy abhipūjitaḥ
Sanskrit only: no published translation is held for this verse.
एषां तु पृष्ठतो रुद्रो विमले स्यन्दने स्थितः याति संहर्षयन् सर्वांस् तेजसा त्रिदिवौकसः
eṣāṃ tu pṛṣṭhato rudro vimale syandane sthitaḥ yāti saṃharṣayan sarvāṃs tejasā tridivaukasaḥ
Sanskrit only: no published translation is held for this verse.
ऋषयश् चैव देवाश् च गन्धर्वा भुजगास् तथा नद्यो नदा द्रुमाश् चैव तथैवाप्सरसां गणाः
ṛṣayaś caiva devāś ca gandharvā bhujagās tathā nadyo nadā drumāś caiva tathaivāpsarasāṃ gaṇāḥ
Sanskrit only: no published translation is held for this verse.
नक्षत्राणि ग्रहाश् चैव देवानां शिशवश् च ये स्त्रियश् च विविधाकारा यान्ति रुद्रस्य पृष्ठतः सृजन्त्यः पुष्पवर्षाणि चारुरूपा वराङ्गनाः
nakṣatrāṇi grahāś caiva devānāṃ śiśavaś ca ye striyaś ca vividhākārā yānti rudrasya pṛṣṭhataḥ sṛjantyaḥ puṣpavarṣāṇi cārurūpā varāṅganāḥ
Sanskrit only: no published translation is held for this verse.
पर्जन्यश् चाप्य् अनुययौ नमस्कृत्य पिनाकिनम् छत्रं तु पाण्डुरं सोमस् तस्य मूर्धन्य् अधारयत् चामरे चापि वायुश् च गृहीत्वाग्निश् च विष्ठितौ
parjanyaś cāpy anuyayau namaskṛtya pinākinam chatraṃ tu pāṇḍuraṃ somas tasya mūrdhany adhārayat cāmare cāpi vāyuś ca gṛhītvāgniś ca viṣṭhitau
Sanskrit only: no published translation is held for this verse.
शक्रश् च पृष्ठतस् तस्य याति राजञ् श्रिया वृतः सह राजर्षिभिः सर्वैः स्तुवानो वृषकेतनम्
śakraś ca pṛṣṭhatas tasya yāti rājañ śriyā vṛtaḥ saha rājarṣibhiḥ sarvaiḥ stuvāno vṛṣaketanam
Sanskrit only: no published translation is held for this verse.
गौरी विद्याथ गान्धारी केशिनी मित्रसाह्वया सावित्र्या सह सर्वास् ताः पार्वत्या यान्ति पृष्ठतः
gaurī vidyātha gāndhārī keśinī mitrasāhvayā sāvitryā saha sarvās tāḥ pārvatyā yānti pṛṣṭhataḥ
Sanskrit only: no published translation is held for this verse.
तत्र विद्यागणाः सर्वे ये के चित् कविभिः कृताः यस्य कुर्वन्ति वचनं सेन्द्रा देवाश् चमूमुखे
tatra vidyāgaṇāḥ sarve ye ke cit kavibhiḥ kṛtāḥ yasya kurvanti vacanaṃ sendrā devāś camūmukhe
Sanskrit only: no published translation is held for this verse.
स गृहीत्वा पताकां तु यात्य् अग्रे राक्षसो ग्रहः व्यापृतस् तु श्मशाने यो नित्यं रुद्रस्य वै सखा पिङ्गलो नाम यक्षेन्द्रो लोकस्यानन्ददायकः
sa gṛhītvā patākāṃ tu yāty agre rākṣaso grahaḥ vyāpṛtas tu śmaśāne yo nityaṃ rudrasya vai sakhā piṅgalo nāma yakṣendro lokasyānandadāyakaḥ
Sanskrit only: no published translation is held for this verse.
एभिः स सहितस् तत्र ययौ देवो यथासुखम् अग्रतः पृष्ठतश् चैव न हि तस्य गतिर् ध्रुवा
ebhiḥ sa sahitas tatra yayau devo yathāsukham agrataḥ pṛṣṭhataś caiva na hi tasya gatir dhruvā
Sanskrit only: no published translation is held for this verse.
रुद्रं सत्कर्मभिर् मर्त्याः पूजयन्तीह दैवतम् शिवम् इत्य् एव यं प्राहुर् ईशं रुद्रं पिनाकिनम् भावैस् तु विविधाकारैः पूजयन्ति महेश्वरम्
rudraṃ satkarmabhir martyāḥ pūjayantīha daivatam śivam ity eva yaṃ prāhur īśaṃ rudraṃ pinākinam bhāvais tu vividhākāraiḥ pūjayanti maheśvaram
Sanskrit only: no published translation is held for this verse.
देवसेनापतिस् त्व् एवं देवसेनाभिर् आवृतः अनुगच्छति देवेशं ब्रह्मण्यः कृत्तिकासुतः
devasenāpatis tv evaṃ devasenābhir āvṛtaḥ anugacchati deveśaṃ brahmaṇyaḥ kṛttikāsutaḥ
Sanskrit only: no published translation is held for this verse.
अथाब्रवीन् महासेनं महादेवो बृहद्वचः सप्तमं मारुतस्कन्धं रक्ष नित्यम् अतन्द्रितः
athābravīn mahāsenaṃ mahādevo bṛhadvacaḥ saptamaṃ mārutaskandhaṃ rakṣa nityam atandritaḥ
Sanskrit only: no published translation is held for this verse.
स्कन्द उवाच सप्तमं मारुतस्कन्धं पालयिष्याम्य् अहं प्रभो यद् अन्यद् अपि मे कार्यं देव तद् वद माचिरम्
skanda uvāca saptamaṃ mārutaskandhaṃ pālayiṣyāmy ahaṃ prabho yad anyad api me kāryaṃ deva tad vada māciram
Sanskrit only: no published translation is held for this verse.
रुद्र उवाच कार्येष्व् अहं त्वया पुत्र संद्रष्टव्यः सदैव हि दर्शनान् मम भक्त्या च श्रेयः परम् अवाप्स्यसि
rudra uvāca kāryeṣv ahaṃ tvayā putra saṃdraṣṭavyaḥ sadaiva hi darśanān mama bhaktyā ca śreyaḥ param avāpsyasi
Sanskrit only: no published translation is held for this verse.
मार्कण्डेय उवाच इत्य् उक्त्वा विससर्जैनं परिष्वज्य महेष्वरः विसर्जिते ततः स्कन्दे बभूवौत्पातिकं महत् सहसैव महाराज देवान् सर्वान् प्रमोहयत्
mārkaṇḍeya uvāca ity uktvā visasarjainaṃ pariṣvajya maheṣvaraḥ visarjite tataḥ skande babhūvautpātikaṃ mahat sahasaiva mahārāja devān sarvān pramohayat
Sanskrit only: no published translation is held for this verse.
जज्वाल खं सनक्षत्रं प्रमूढं भुवनं भृशम् चचाल व्यनदच् चोर्वी तमोभूतं जगत् प्रभो
jajvāla khaṃ sanakṣatraṃ pramūḍhaṃ bhuvanaṃ bhṛśam cacāla vyanadac corvī tamobhūtaṃ jagat prabho
Sanskrit only: no published translation is held for this verse.
ततस् तद् दारुणं दृष्ट्वा क्षुभितः शंकरस् तदा उमा चैव महाभागा देवाश् च समहर्षयः
tatas tad dāruṇaṃ dṛṣṭvā kṣubhitaḥ śaṃkaras tadā umā caiva mahābhāgā devāś ca samaharṣayaḥ
Sanskrit only: no published translation is held for this verse.
ततस् तेषु प्रमूढेषु पर्वताम्बुदसंनिभम् नानाप्रहरणं घोरम् अदृश्यत महद् बलम्
tatas teṣu pramūḍheṣu parvatāmbudasaṃnibham nānāpraharaṇaṃ ghoram adṛśyata mahad balam
Sanskrit only: no published translation is held for this verse.
तद् धि घोरम् असंख्येयं गर्जच् च विविधा गिरः अभ्यद्रवद् रणे देवान् भगवन्तं च शंकरम्
tad dhi ghoram asaṃkhyeyaṃ garjac ca vividhā giraḥ abhyadravad raṇe devān bhagavantaṃ ca śaṃkaram
Sanskrit only: no published translation is held for this verse.
तैर् विसृष्टान्य् अनीकेषु बाणजालान्य् अनेकशः पर्वताश् च शतघ्न्यश् च प्रासाश् च परिघा गदाः
tair visṛṣṭāny anīkeṣu bāṇajālāny anekaśaḥ parvatāś ca śataghnyaś ca prāsāś ca parighā gadāḥ
Sanskrit only: no published translation is held for this verse.
निपतद्भिश् च तैर् घोरैर् देवानीकं महायुधैः क्षणेन व्यद्रवत् सर्वं विमुखं चाप्य् अदृश्यत
nipatadbhiś ca tair ghorair devānīkaṃ mahāyudhaiḥ kṣaṇena vyadravat sarvaṃ vimukhaṃ cāpy adṛśyata
Sanskrit only: no published translation is held for this verse.
निकृत्तयोधनागाश्वं कृत्तायुधमहारथम् दानवैर् अर्दितं सैन्यं देवानां विमुखं बभौ
nikṛttayodhanāgāśvaṃ kṛttāyudhamahāratham dānavair arditaṃ sainyaṃ devānāṃ vimukhaṃ babhau
Sanskrit only: no published translation is held for this verse.
असुरैर् वध्यमानं तत् पावकैर् इव काननम् अपतद् दग्धभूयिष्ठं महाद्रुमवनं यथा
asurair vadhyamānaṃ tat pāvakair iva kānanam apatad dagdhabhūyiṣṭhaṃ mahādrumavanaṃ yathā
Sanskrit only: no published translation is held for this verse.
ते विभिन्नशिरोदेहाः प्रच्यवन्ते दिवौकसः न नाथम् अध्यगच्छन्त वध्यमाना महारणे
te vibhinnaśirodehāḥ pracyavante divaukasaḥ na nātham adhyagacchanta vadhyamānā mahāraṇe
Sanskrit only: no published translation is held for this verse.
अथ तद् विद्रुतं सैन्यं दृष्ट्वा देवः पुरंदरः आश्वासयन्न् उवाचेदं बलवद् दानवार्दितम्
atha tad vidrutaṃ sainyaṃ dṛṣṭvā devaḥ puraṃdaraḥ āśvāsayann uvācedaṃ balavad dānavārditam
Sanskrit only: no published translation is held for this verse.
भयं त्यजत भद्रं वः शूराः शस्त्राणि गृह्णत कुरुध्वं विक्रमे बुद्धिं मा वः का चिद् व्यथा भवेत्
bhayaṃ tyajata bhadraṃ vaḥ śūrāḥ śastrāṇi gṛhṇata kurudhvaṃ vikrame buddhiṃ mā vaḥ kā cid vyathā bhavet
Sanskrit only: no published translation is held for this verse.
जयतैनान् सुदुर्वृत्तान् दानवान् घोरदर्शनान् अभिद्रवत भद्रं वो मया सह महासुरान्
jayatainān sudurvṛttān dānavān ghoradarśanān abhidravata bhadraṃ vo mayā saha mahāsurān
Sanskrit only: no published translation is held for this verse.
शक्रस्य वचनं श्रुत्वा समाश्वस्ता दिवौकसः दानवान् प्रत्ययुध्यन्त शक्रं कृत्वा व्यपाश्रयम्
śakrasya vacanaṃ śrutvā samāśvastā divaukasaḥ dānavān pratyayudhyanta śakraṃ kṛtvā vyapāśrayam
Sanskrit only: no published translation is held for this verse.
ततस् ते त्रिदशाः सर्वे मरुतश् च महाबलाः प्रत्युद्ययुर् महावेगाः साध्याश् च वसुभिः सह
tatas te tridaśāḥ sarve marutaś ca mahābalāḥ pratyudyayur mahāvegāḥ sādhyāś ca vasubhiḥ saha
Sanskrit only: no published translation is held for this verse.
तैर् विसृष्टान्य् अनीकेषु क्रुद्धैः शस्त्राणि संयुगे शराश् च दैत्यकायेषु पिबन्ति स्मासृगुल्बणम्
tair visṛṣṭāny anīkeṣu kruddhaiḥ śastrāṇi saṃyuge śarāś ca daityakāyeṣu pibanti smāsṛgulbaṇam
Sanskrit only: no published translation is held for this verse.
तेषां देहान् विनिर्भिद्य शरास् ते निशितास् तदा निष्पतन्तो अदृश्यन्त नगेभ्य इव पन्नगाः
teṣāṃ dehān vinirbhidya śarās te niśitās tadā niṣpatanto adṛśyanta nagebhya iva pannagāḥ
Sanskrit only: no published translation is held for this verse.
तानि दैत्यशरीराणि निर्भिन्नानि स्म सायकैः अपतन् भूतले राजंश् छिन्नाभ्राणीव सर्वशः
tāni daityaśarīrāṇi nirbhinnāni sma sāyakaiḥ apatan bhūtale rājaṃś chinnābhrāṇīva sarvaśaḥ
Sanskrit only: no published translation is held for this verse.
ततस् तद् दानवं सैन्यं सर्वैर् देवगणैर् युधि त्रासितं विविधैर् बाणैः कृतं चैव पराङ्मुखम्
tatas tad dānavaṃ sainyaṃ sarvair devagaṇair yudhi trāsitaṃ vividhair bāṇaiḥ kṛtaṃ caiva parāṅmukham
Sanskrit only: no published translation is held for this verse.
अथोत्क्रुष्टं तदा हृष्टैः सर्वैर् देवैर् उदायुधैः संहतानि च तूर्याणि तदा सर्वाण्य् अनेकशः
athotkruṣṭaṃ tadā hṛṣṭaiḥ sarvair devair udāyudhaiḥ saṃhatāni ca tūryāṇi tadā sarvāṇy anekaśaḥ
Sanskrit only: no published translation is held for this verse.
एवम् अन्योन्यसंयुक्तं युद्धम् आसीत् सुदारुणम् देवानां दानवानां च मांसशोणितकर्दमम्
evam anyonyasaṃyuktaṃ yuddham āsīt sudāruṇam devānāṃ dānavānāṃ ca māṃsaśoṇitakardamam
Sanskrit only: no published translation is held for this verse.
अनयो देवलोकस्य सहसैव व्यदृश्यत तथा हि दानवा घोरा विनिघ्नन्ति दिवौकसः
anayo devalokasya sahasaiva vyadṛśyata tathā hi dānavā ghorā vinighnanti divaukasaḥ
Sanskrit only: no published translation is held for this verse.
ततस् तूर्यप्रणादाश् च भेरीणां च महास्वनाः बभूवुर् दानवेन्द्राणां सिंहनादाश् च दारुणाः
tatas tūryapraṇādāś ca bherīṇāṃ ca mahāsvanāḥ babhūvur dānavendrāṇāṃ siṃhanādāś ca dāruṇāḥ
Sanskrit only: no published translation is held for this verse.
अथ दैत्यबलाद् घोरान् निष्पपात महाबलः दानवो महिषो नाम प्रगृह्य विपुलं गिरिम्
atha daityabalād ghorān niṣpapāta mahābalaḥ dānavo mahiṣo nāma pragṛhya vipulaṃ girim
Sanskrit only: no published translation is held for this verse.
ते तं घनैर् इवादित्यं दृष्ट्वा संपरिवारितम् समुद्यतगिरिं राजन् व्यद्रवन्त दिवौकसः
te taṃ ghanair ivādityaṃ dṛṣṭvā saṃparivāritam samudyatagiriṃ rājan vyadravanta divaukasaḥ
Sanskrit only: no published translation is held for this verse.
अथाभिद्रुत्य महिषो देवांश् चिक्षेप तं गिरिम् पतता तेन गिरिणा देवसैन्यस्य पार्थिव भीमरूपेण निहतम् अयुतं प्रापतद् भुवि
athābhidrutya mahiṣo devāṃś cikṣepa taṃ girim patatā tena giriṇā devasainyasya pārthiva bhīmarūpeṇa nihatam ayutaṃ prāpatad bhuvi
Sanskrit only: no published translation is held for this verse.
अथ तैर् दानवैः सार्धं महिषस् त्रासयन् सुरान् अभ्यद्रवद् रणे तूर्णं सिंहः क्षुद्रमृगान् इव
atha tair dānavaiḥ sārdhaṃ mahiṣas trāsayan surān abhyadravad raṇe tūrṇaṃ siṃhaḥ kṣudramṛgān iva
Sanskrit only: no published translation is held for this verse.
तम् आपतन्तं महिषं दृष्ट्वा सेन्द्रा दिवौकसः व्यद्रवन्त रणे भीता विशीर्णायुधकेतनाः
tam āpatantaṃ mahiṣaṃ dṛṣṭvā sendrā divaukasaḥ vyadravanta raṇe bhītā viśīrṇāyudhaketanāḥ
Sanskrit only: no published translation is held for this verse.
ततः स महिषः क्रुद्धस् तूर्णं रुद्ररथं ययौ अभिद्रुत्य च जग्राह रुद्रस्य रथकूबरम्
tataḥ sa mahiṣaḥ kruddhas tūrṇaṃ rudrarathaṃ yayau abhidrutya ca jagrāha rudrasya rathakūbaram
Sanskrit only: no published translation is held for this verse.
यदा रुद्ररथं क्रुद्धो महिषः सहसा गतः रेसतू रोदसी गाढं मुमुहुश् च महर्षयः
yadā rudrarathaṃ kruddho mahiṣaḥ sahasā gataḥ resatū rodasī gāḍhaṃ mumuhuś ca maharṣayaḥ
Sanskrit only: no published translation is held for this verse.
व्यनदंश् च महाकाया दैत्या जलधरोपमाः आसीच् च निश्चितं तेषां जितम् अस्माभिर् इत्य् उत
vyanadaṃś ca mahākāyā daityā jaladharopamāḥ āsīc ca niścitaṃ teṣāṃ jitam asmābhir ity uta
Sanskrit only: no published translation is held for this verse.
तथाभूते तु भगवान् नावधीन् महिषं रणे सस्मार च तदा स्कन्दं मृत्युं तस्य दुरात्मनः
tathābhūte tu bhagavān nāvadhīn mahiṣaṃ raṇe sasmāra ca tadā skandaṃ mṛtyuṃ tasya durātmanaḥ
Sanskrit only: no published translation is held for this verse.
महिषो ऽपि रथं दृष्ट्वा रौद्रं रुद्रस्य नानदत् देवान् संत्रासयंश् चापि दैत्यांश् चापि प्रहर्षयन्
mahiṣo 'pi rathaṃ dṛṣṭvā raudraṃ rudrasya nānadat devān saṃtrāsayaṃś cāpi daityāṃś cāpi praharṣayan
Sanskrit only: no published translation is held for this verse.
ततस् तस्मिन् भये घोरे देवानां समुपस्थिते आजगाम महासेनः क्रोधात् सूर्य इव ज्वलन्
tatas tasmin bhaye ghore devānāṃ samupasthite ājagāma mahāsenaḥ krodhāt sūrya iva jvalan
Sanskrit only: no published translation is held for this verse.
लोहिताम्बरसंवीतो लोहितस्रग्विभूषणः लोहितास्यो महाबाहुर् हिरण्यकवचः प्रभुः
lohitāmbarasaṃvīto lohitasragvibhūṣaṇaḥ lohitāsyo mahābāhur hiraṇyakavacaḥ prabhuḥ
Sanskrit only: no published translation is held for this verse.
रथम् आदित्यसंकाशम् आस्थितः कनकप्रभम् तं दृष्ट्वा दैत्यसेना सा व्यद्रवत् सहसा रणे
ratham ādityasaṃkāśam āsthitaḥ kanakaprabham taṃ dṛṣṭvā daityasenā sā vyadravat sahasā raṇe
Sanskrit only: no published translation is held for this verse.
स चापि तां प्रज्वलितां महिषस्य विदारिणीम् मुमोच शक्तिं राजेन्द्र महासेनो महाबलः
sa cāpi tāṃ prajvalitāṃ mahiṣasya vidāriṇīm mumoca śaktiṃ rājendra mahāseno mahābalaḥ
Sanskrit only: no published translation is held for this verse.
सा मुक्ताभ्यहनच् छक्तिर् महिषस्य शिरो महत् पपात भिन्ने शिरसि महिषस् त्यक्तजीवितः
sā muktābhyahanac chaktir mahiṣasya śiro mahat papāta bhinne śirasi mahiṣas tyaktajīvitaḥ
Sanskrit only: no published translation is held for this verse.
क्षिप्ताक्षिप्ता तु सा शक्तिर् हत्वा शत्रून् सहस्रशः स्कन्दहस्तम् अनुप्राप्ता दृश्यते देवदानवैः
kṣiptākṣiptā tu sā śaktir hatvā śatrūn sahasraśaḥ skandahastam anuprāptā dṛśyate devadānavaiḥ
Sanskrit only: no published translation is held for this verse.
प्रायः शरैर् विनिहता महासेनेन धीमता शेषा दैत्यगणा घोरा भीतास् त्रस्ता दुरासदैः स्कन्दस्य पार्षदैर् हत्वा भक्षिताः शतसंघशः
prāyaḥ śarair vinihatā mahāsenena dhīmatā śeṣā daityagaṇā ghorā bhītās trastā durāsadaiḥ skandasya pārṣadair hatvā bhakṣitāḥ śatasaṃghaśaḥ
Sanskrit only: no published translation is held for this verse.
दानवान् भक्षयन्तस् ते प्रपिबन्तश् च शोणितम् क्षणान् निर्दानवं सर्वम् अकार्षुर् भृशहर्षिताः
dānavān bhakṣayantas te prapibantaś ca śoṇitam kṣaṇān nirdānavaṃ sarvam akārṣur bhṛśaharṣitāḥ
Sanskrit only: no published translation is held for this verse.
तमांसीव यथा सूर्यो वृक्षान् अग्निर् घनान् खगः तथा स्कन्दो ऽजयच् छत्रून् स्वेन वीर्येण कीर्तिमान्
tamāṃsīva yathā sūryo vṛkṣān agnir ghanān khagaḥ tathā skando 'jayac chatrūn svena vīryeṇa kīrtimān
Sanskrit only: no published translation is held for this verse.
संपूज्यमानस् त्रिदशैर् अभिवाद्य महेश्वरम् शुशुभे कृत्तिकापुत्रः प्रकीर्णांशुर् इवांशुमान्
saṃpūjyamānas tridaśair abhivādya maheśvaram śuśubhe kṛttikāputraḥ prakīrṇāṃśur ivāṃśumān
Sanskrit only: no published translation is held for this verse.
नष्टशत्रुर् यदा स्कन्दः प्रयातश् च महेश्वरम् अथाब्रवीन् महासेनं परिष्वज्य पुरंदरः
naṣṭaśatrur yadā skandaḥ prayātaś ca maheśvaram athābravīn mahāsenaṃ pariṣvajya puraṃdaraḥ
Sanskrit only: no published translation is held for this verse.
ब्रह्मदत्तवरः स्कन्द त्वयायं महिषो हतः देवास् तृणमया यस्य बभूवुर् जयतां वर सो ऽयं त्वया महाबाहो शमितो देवकण्टकः
brahmadattavaraḥ skanda tvayāyaṃ mahiṣo hataḥ devās tṛṇamayā yasya babhūvur jayatāṃ vara so 'yaṃ tvayā mahābāho śamito devakaṇṭakaḥ
Sanskrit only: no published translation is held for this verse.
शतं महिषतुल्यानां दानवानां त्वया रणे निहतं देवशत्रूणां यैर् वयं पूर्वतापिताः
śataṃ mahiṣatulyānāṃ dānavānāṃ tvayā raṇe nihataṃ devaśatrūṇāṃ yair vayaṃ pūrvatāpitāḥ
Sanskrit only: no published translation is held for this verse.
तावकैर् भक्षिताश् चान्ये दानवाः शतसंघशः अजेयस् त्वं रणे ऽरीणाम् उमापतिर् इव प्रभुः
tāvakair bhakṣitāś cānye dānavāḥ śatasaṃghaśaḥ ajeyas tvaṃ raṇe 'rīṇām umāpatir iva prabhuḥ
Sanskrit only: no published translation is held for this verse.
एतत् ते प्रथमं देव ख्यातं कर्म भविष्यति त्रिषु लोकेषु कीर्तिश् च तवाक्षय्या भविष्यति वशगाश् च भविष्यन्ति सुरास् तव सुरात्मज
etat te prathamaṃ deva khyātaṃ karma bhaviṣyati triṣu lokeṣu kīrtiś ca tavākṣayyā bhaviṣyati vaśagāś ca bhaviṣyanti surās tava surātmaja
Sanskrit only: no published translation is held for this verse.
महासेनेत्य् एवम् उक्त्वा निवृत्तः सह दैवतैः अनुज्ञातो भगवता त्र्यम्बकेन शचीपतिः
mahāsenety evam uktvā nivṛttaḥ saha daivataiḥ anujñāto bhagavatā tryambakena śacīpatiḥ
Sanskrit only: no published translation is held for this verse.
गतो भद्रवटं रुद्रो निवृत्ताश् च दिवौकसः उक्ताश् च देवा रुद्रेण स्कन्दं पश्यत माम् इव
gato bhadravaṭaṃ rudro nivṛttāś ca divaukasaḥ uktāś ca devā rudreṇa skandaṃ paśyata mām iva
Sanskrit only: no published translation is held for this verse.
स हत्वा दानवगणान् पूज्यमानो महर्षिभिः एकाह्नैवाजयत् सर्वं त्रैलोक्यं वह्निनन्दनः
sa hatvā dānavagaṇān pūjyamāno maharṣibhiḥ ekāhnaivājayat sarvaṃ trailokyaṃ vahninandanaḥ
Sanskrit only: no published translation is held for this verse.
स्कन्दस्य य इदं जन्म पठते सुसमाहितः स पुष्टिम् इह संप्राप्य स्कन्दसालोक्यताम् इयात्
skandasya ya idaṃ janma paṭhate susamāhitaḥ sa puṣṭim iha saṃprāpya skandasālokyatām iyāt
Sanskrit only: no published translation is held for this verse.