Library·Mahābhārata (critical edition)·3·3.232
युधिष्ठिर उवाच अस्मान् अभिगतांस् तात भयार्ताञ् शरणैषिणः कौरवान् विषमप्राप्तान् कथं ब्रूयास् त्वम् ईदृशम्
yudhiṣṭhira uvāca asmān abhigatāṃs tāta bhayārtāñ śaraṇaiṣiṇaḥ kauravān viṣamaprāptān kathaṃ brūyās tvam īdṛśam
Sanskrit only: no published translation is held for this verse.
भवन्ति भेदा ज्ञातीनां कलहाश् च वृकोदर प्रसक्तानि च वैराणि ज्ञातिधर्मो न नश्यति
bhavanti bhedā jñātīnāṃ kalahāś ca vṛkodara prasaktāni ca vairāṇi jñātidharmo na naśyati
Sanskrit only: no published translation is held for this verse.
यदा तु कश् चिज् ज्ञातीनां बाह्यः प्रार्थयते कुलम् न मर्षयन्ति तत् सन्तो बाह्येनाभिप्रमर्षणम्
yadā tu kaś cij jñātīnāṃ bāhyaḥ prārthayate kulam na marṣayanti tat santo bāhyenābhipramarṣaṇam
Sanskrit only: no published translation is held for this verse.
जानाति ह्य् एष दुर्बुद्धिर् अस्मान् इह चिरोषितान् स एष परिभूयास्मान् अकार्षीद् इदम् अप्रियम्
jānāti hy eṣa durbuddhir asmān iha ciroṣitān sa eṣa paribhūyāsmān akārṣīd idam apriyam
Sanskrit only: no published translation is held for this verse.
दुर्योधनस्य ग्रहणाद् गन्धर्वेण बलाद् रणे स्त्रीणां बाह्याभिमर्शाच् च हतं भवति नः कुलम्
duryodhanasya grahaṇād gandharveṇa balād raṇe strīṇāṃ bāhyābhimarśāc ca hataṃ bhavati naḥ kulam
Sanskrit only: no published translation is held for this verse.
शरणं च प्रपन्नानां त्राणार्थं च कुलस्य नः उत्तिष्ठध्वं नरव्याघ्राः सज्जीभवत माचिरम्
śaraṇaṃ ca prapannānāṃ trāṇārthaṃ ca kulasya naḥ uttiṣṭhadhvaṃ naravyāghrāḥ sajjībhavata māciram
Sanskrit only: no published translation is held for this verse.
अर्जुनश् च यमौ चैव त्वं च भीमापराजितः मोक्षयध्वं धार्तराष्ट्रं ह्रियमाणं सुयोधनम्
arjunaś ca yamau caiva tvaṃ ca bhīmāparājitaḥ mokṣayadhvaṃ dhārtarāṣṭraṃ hriyamāṇaṃ suyodhanam
Sanskrit only: no published translation is held for this verse.
एते रथा नरव्याघ्राः सर्वशस्त्रसमन्विताः इन्द्रसेनादिभिः सूतैः संयताः कनकध्वजाः
ete rathā naravyāghrāḥ sarvaśastrasamanvitāḥ indrasenādibhiḥ sūtaiḥ saṃyatāḥ kanakadhvajāḥ
Sanskrit only: no published translation is held for this verse.
एतान् आस्थाय वै तात गन्धर्वान् योद्धुम् आहवे सुयोधनस्य मोक्षाय प्रयतध्वम् अतन्द्रिताः
etān āsthāya vai tāta gandharvān yoddhum āhave suyodhanasya mokṣāya prayatadhvam atandritāḥ
Sanskrit only: no published translation is held for this verse.
य एव कश् चिद् राजन्यः शरणार्थम् इहागतम् परं शक्त्याभिरक्षेत किं पुनस् त्वं वृकोदर
ya eva kaś cid rājanyaḥ śaraṇārtham ihāgatam paraṃ śaktyābhirakṣeta kiṃ punas tvaṃ vṛkodara
Sanskrit only: no published translation is held for this verse.
क इहान्यो भवेत् त्राणम् अभिधावेति चोदितः प्राञ्जलिं शरणापन्नं दृष्ट्वा शत्रुम् अपि ध्रुवम्
ka ihānyo bhavet trāṇam abhidhāveti coditaḥ prāñjaliṃ śaraṇāpannaṃ dṛṣṭvā śatrum api dhruvam
Sanskrit only: no published translation is held for this verse.
वरप्रदानं राज्यं च पुत्रजन्म च पाण्डव शत्रोश् च मोक्षणं क्लेशात् त्रीणि चैकं च तत् समम्
varapradānaṃ rājyaṃ ca putrajanma ca pāṇḍava śatroś ca mokṣaṇaṃ kleśāt trīṇi caikaṃ ca tat samam
Sanskrit only: no published translation is held for this verse.
किं ह्य् अभ्यधिकम् एतस्माद् यद् आपन्नः सुयोधनः त्वद्बाहुबलम् आश्रित्य जीवितं परिमार्गति
kiṃ hy abhyadhikam etasmād yad āpannaḥ suyodhanaḥ tvadbāhubalam āśritya jīvitaṃ parimārgati
Sanskrit only: no published translation is held for this verse.
स्वयम् एव प्रधावेयं यदि न स्याद् वृकोदर विततो ऽयं क्रतुर् वीर न हि मे ऽत्र विचारणा
svayam eva pradhāveyaṃ yadi na syād vṛkodara vitato 'yaṃ kratur vīra na hi me 'tra vicāraṇā
Sanskrit only: no published translation is held for this verse.
साम्नैव तु यथा भीम मोक्षयेथाः सुयोधनम् तथा सर्वैर् उपायैस् त्वं यतेथाः कुरुनन्दन
sāmnaiva tu yathā bhīma mokṣayethāḥ suyodhanam tathā sarvair upāyais tvaṃ yatethāḥ kurunandana
Sanskrit only: no published translation is held for this verse.
न साम्ना प्रतिपद्येत यदि गन्धर्वराड् असौ पराक्रमेण मृदुना मोक्षयेथाः सुयोधनम्
na sāmnā pratipadyeta yadi gandharvarāḍ asau parākrameṇa mṛdunā mokṣayethāḥ suyodhanam
Sanskrit only: no published translation is held for this verse.
अथासौ मृदुयुद्धेन न मुञ्चेद् भीम कौरवान् सर्वोपायैर् विमोच्यास् ते निगृह्य परिपन्थिनः
athāsau mṛduyuddhena na muñced bhīma kauravān sarvopāyair vimocyās te nigṛhya paripanthinaḥ
Sanskrit only: no published translation is held for this verse.
एतावद् धि मया शक्यं संदेष्टुं वै वृकोदर वैताने कर्मणि तते वर्तमाने च भारत
etāvad dhi mayā śakyaṃ saṃdeṣṭuṃ vai vṛkodara vaitāne karmaṇi tate vartamāne ca bhārata
Sanskrit only: no published translation is held for this verse.
वैशंपायन उवाच अजातशत्रोर् वचनं तच् छ्रुत्वा तु धनंजयः प्रतिजज्ञे गुरोर् वाक्यं कौरवाणां विमोक्षणम्
vaiśaṃpāyana uvāca ajātaśatror vacanaṃ tac chrutvā tu dhanaṃjayaḥ pratijajñe guror vākyaṃ kauravāṇāṃ vimokṣaṇam
Sanskrit only: no published translation is held for this verse.
अर्जुन उवाच यदि साम्ना न मोक्ष्यन्ति गन्धर्वा धृतराष्ट्रजान् अद्य गन्धर्वराजस्य भूमिः पास्यति शोणितम्
arjuna uvāca yadi sāmnā na mokṣyanti gandharvā dhṛtarāṣṭrajān adya gandharvarājasya bhūmiḥ pāsyati śoṇitam
Sanskrit only: no published translation is held for this verse.
वैशंपायन उवाच अर्जुनस्य तु तां श्रुत्वा प्रतिज्ञां सत्यवादिनः कौरवाणां तदा राजन् पुनः प्रत्यागतं मनः
vaiśaṃpāyana uvāca arjunasya tu tāṃ śrutvā pratijñāṃ satyavādinaḥ kauravāṇāṃ tadā rājan punaḥ pratyāgataṃ manaḥ
Sanskrit only: no published translation is held for this verse.