Mahābhārata (critical edition) 3.250

वैशंपायन उवाच अथाब्रवीद् द्रौपदी राजपुत्री; पृष्टा शिबीनां प्रवरेण तेन अवेक्ष्य मन्दं प्रविमुच्य शाखां; संगृह्णती कौशिकम् उत्तरीयम्

vaiśaṃpāyana uvāca athābravīd draupadī rājaputrī; pṛṣṭā śibīnāṃ pravareṇa tena avekṣya mandaṃ pravimucya śākhāṃ; saṃgṛhṇatī kauśikam uttarīyam

Sanskrit only: no published translation is held for this verse.

बुद्ध्याभिजानामि नरेन्द्रपुत्र; न मादृशी त्वाम् अभिभाष्टुम् अर्हा न त्वेह वक्तास्ति तवेह वाक्यम्; अन्यो नरो वाप्य् अथ वापि नारी

buddhyābhijānāmi narendraputra; na mādṛśī tvām abhibhāṣṭum arhā na tveha vaktāsti taveha vākyam; anyo naro vāpy atha vāpi nārī

Sanskrit only: no published translation is held for this verse.

एका ह्य् अहं संप्रति तेन वाचं; ददानि वै भद्र निबोध चेदम् अहं ह्य् अरण्ये कथम् एकम् एका; त्वाम् आलपेयं निरता स्वधर्मे

ekā hy ahaṃ saṃprati tena vācaṃ; dadāni vai bhadra nibodha cedam ahaṃ hy araṇye katham ekam ekā; tvām ālapeyaṃ niratā svadharme

Sanskrit only: no published translation is held for this verse.

जानामि च त्वां सुरथस्य पुत्रं; यं कोटिकाश्येति विदुर् मनुष्याः तस्माद् अहं शैब्य तथैव तुभ्यम्; आख्यामि बन्धून् प्रति तन् निबोध

jānāmi ca tvāṃ surathasya putraṃ; yaṃ koṭikāśyeti vidur manuṣyāḥ tasmād ahaṃ śaibya tathaiva tubhyam; ākhyāmi bandhūn prati tan nibodha

Sanskrit only: no published translation is held for this verse.

अपत्यम् अस्मि द्रुपदस्य राज्ञः; कृष्णेति मां शैब्य विदुर् मनुष्याः साहं वृणे पञ्च जनान् पतित्वे; ये खाण्डवप्रस्थगताः श्रुतास् ते

apatyam asmi drupadasya rājñaḥ; kṛṣṇeti māṃ śaibya vidur manuṣyāḥ sāhaṃ vṛṇe pañca janān patitve; ye khāṇḍavaprasthagatāḥ śrutās te

Sanskrit only: no published translation is held for this verse.

युधिष्ठिरो भीमसेनार्जुनौ च; माद्र्याश् च पुत्रौ पुरुषप्रवीरौ ते मां निवेश्येह दिशश् चतस्रो; विभज्य पार्था मृगयां प्रयाताः

yudhiṣṭhiro bhīmasenārjunau ca; mādryāś ca putrau puruṣapravīrau te māṃ niveśyeha diśaś catasro; vibhajya pārthā mṛgayāṃ prayātāḥ

Sanskrit only: no published translation is held for this verse.

प्राचीं राजा दक्षिणां भीमसेनो; जयः प्रतीचीं यमजाव् उदीचीम् मन्ये तु तेषां रथसत्तमानां; कालो ऽभितः प्राप्त इहोपयातुम्

prācīṃ rājā dakṣiṇāṃ bhīmaseno; jayaḥ pratīcīṃ yamajāv udīcīm manye tu teṣāṃ rathasattamānāṃ; kālo 'bhitaḥ prāpta ihopayātum

Sanskrit only: no published translation is held for this verse.

संमानिता यास्यथ तैर् यथेष्टं; विमुच्य वाहान् अवगाहयध्वम् प्रियातिथिर् धर्मसुतो महात्मा; प्रीतो भविष्यत्य् अभिवीक्ष्य युष्मान्

saṃmānitā yāsyatha tair yatheṣṭaṃ; vimucya vāhān avagāhayadhvam priyātithir dharmasuto mahātmā; prīto bhaviṣyaty abhivīkṣya yuṣmān

Sanskrit only: no published translation is held for this verse.

एतावद् उक्त्वा द्रुपदात्मजा सा; शैब्यात्मजं चन्द्रमुखी प्रतीता विवेश तां पर्णकुटीं प्रशस्तां; संचिन्त्य तेषाम् अतिथिस्वधर्मम्

etāvad uktvā drupadātmajā sā; śaibyātmajaṃ candramukhī pratītā viveśa tāṃ parṇakuṭīṃ praśastāṃ; saṃcintya teṣām atithisvadharmam

Sanskrit only: no published translation is held for this verse.