Library·Mahābhārata (critical edition)·3·3.258
मार्कण्डेय उवाच प्राप्तम् अप्रतिमं दुःखं रामेण भरतर्षभ रक्षसा जानकी तस्य हृता भार्या बलीयसा
mārkaṇḍeya uvāca prāptam apratimaṃ duḥkhaṃ rāmeṇa bharatarṣabha rakṣasā jānakī tasya hṛtā bhāryā balīyasā
Sanskrit only: no published translation is held for this verse.
आश्रमाद् राक्षसेन्द्रेण रावणेन विहायसा मायाम् आस्थाय तरसा हत्वा गृध्रं जटायुषम्
āśramād rākṣasendreṇa rāvaṇena vihāyasā māyām āsthāya tarasā hatvā gṛdhraṃ jaṭāyuṣam
Sanskrit only: no published translation is held for this verse.
प्रत्याजहार तां रामः सुग्रीवबलम् आश्रितः बद्ध्वा सेतुं समुद्रस्य दग्ध्वा लङ्कां शितैः शरैः
pratyājahāra tāṃ rāmaḥ sugrīvabalam āśritaḥ baddhvā setuṃ samudrasya dagdhvā laṅkāṃ śitaiḥ śaraiḥ
Sanskrit only: no published translation is held for this verse.
युधिष्ठिर उवाच कस्मिन् रामः कुले जातः किंवीर्यः किंपराक्रमः रावणः कस्य वा पुत्रः किं वैरं तस्य तेन ह
yudhiṣṭhira uvāca kasmin rāmaḥ kule jātaḥ kiṃvīryaḥ kiṃparākramaḥ rāvaṇaḥ kasya vā putraḥ kiṃ vairaṃ tasya tena ha
Sanskrit only: no published translation is held for this verse.
एतन् मे भगवन् सर्वं सम्यग् आख्यातुम् अर्हसि श्रोतुम् इच्छामि चरितं रामस्याक्लिष्टकर्मणः
etan me bhagavan sarvaṃ samyag ākhyātum arhasi śrotum icchāmi caritaṃ rāmasyākliṣṭakarmaṇaḥ
Sanskrit only: no published translation is held for this verse.
मार्कण्डेय उवाच अजो नामाभवद् राजा महान् इक्ष्वाकुवंशजः तस्य पुत्रो दशरथः शश्वत् स्वाध्यायवाञ् शुचिः
mārkaṇḍeya uvāca ajo nāmābhavad rājā mahān ikṣvākuvaṃśajaḥ tasya putro daśarathaḥ śaśvat svādhyāyavāñ śuciḥ
Sanskrit only: no published translation is held for this verse.
अभवंस् तस्य चत्वारः पुत्रा धर्मार्थकोविदाः रामलक्ष्मणशत्रुघ्ना भरतश् च महाबलः
abhavaṃs tasya catvāraḥ putrā dharmārthakovidāḥ rāmalakṣmaṇaśatrughnā bharataś ca mahābalaḥ
Sanskrit only: no published translation is held for this verse.
रामस्य माता कौसल्या कैकेयी भरतस्य तु सुतौ लक्ष्मणशत्रुघ्नौ सुमित्रायाः परंतपौ
rāmasya mātā kausalyā kaikeyī bharatasya tu sutau lakṣmaṇaśatrughnau sumitrāyāḥ paraṃtapau
Sanskrit only: no published translation is held for this verse.
विदेहराजो जनकः सीता तस्यात्मजा विभो यां चकार स्वयं त्वष्टा रामस्य महिषीं प्रियाम्
videharājo janakaḥ sītā tasyātmajā vibho yāṃ cakāra svayaṃ tvaṣṭā rāmasya mahiṣīṃ priyām
Sanskrit only: no published translation is held for this verse.
एतद् रामस्य ते जन्म सीतायाश् च प्रकीर्तितम् रावणस्यापि ते जन्म व्याख्यास्यामि जनेश्वर
etad rāmasya te janma sītāyāś ca prakīrtitam rāvaṇasyāpi te janma vyākhyāsyāmi janeśvara
Sanskrit only: no published translation is held for this verse.
पितामहो रावणस्य साक्षाद् देवः प्रजापतिः स्वयंभूः सर्वलोकानां प्रभुः स्रष्टा महातपाः
pitāmaho rāvaṇasya sākṣād devaḥ prajāpatiḥ svayaṃbhūḥ sarvalokānāṃ prabhuḥ sraṣṭā mahātapāḥ
Sanskrit only: no published translation is held for this verse.
पुलस्त्यो नाम तस्यासीन् मानसो दयितः सुतः तस्य वैश्रवणो नाम गवि पुत्रो ऽभवत् प्रभुः
pulastyo nāma tasyāsīn mānaso dayitaḥ sutaḥ tasya vaiśravaṇo nāma gavi putro 'bhavat prabhuḥ
Sanskrit only: no published translation is held for this verse.
पितरं स समुत्सृज्य पितामहम् उपस्थितः तस्य कोपात् पिता राजन् ससर्जात्मानम् आत्मना
pitaraṃ sa samutsṛjya pitāmaham upasthitaḥ tasya kopāt pitā rājan sasarjātmānam ātmanā
Sanskrit only: no published translation is held for this verse.
स जज्ञे विश्रवा नाम तस्यात्मार्धेन वै द्विजः प्रतीकाराय सक्रोधस् ततो वैश्रवणस्य वै
sa jajñe viśravā nāma tasyātmārdhena vai dvijaḥ pratīkārāya sakrodhas tato vaiśravaṇasya vai
Sanskrit only: no published translation is held for this verse.
पितामहस् तु प्रीतात्मा ददौ वैश्रवणस्य ह अमरत्वं धनेशत्वं लोकपालत्वम् एव च
pitāmahas tu prītātmā dadau vaiśravaṇasya ha amaratvaṃ dhaneśatvaṃ lokapālatvam eva ca
Sanskrit only: no published translation is held for this verse.
ईशानेन तथा सख्यं पुत्रं च नलकूबरम् राजधानीनिवेशं च लङ्कां रक्षोगणान्विताम्
īśānena tathā sakhyaṃ putraṃ ca nalakūbaram rājadhānīniveśaṃ ca laṅkāṃ rakṣogaṇānvitām
Sanskrit only: no published translation is held for this verse.