Library·Mahābhārata (critical edition)·3·3.269
मार्कण्डेय उवाच ततो निविशमानांस् तान् सैनिकान् रावणानुगाः अभिजग्मुर् गणान् एके पिशाचक्षुद्ररक्षसाम्
mārkaṇḍeya uvāca tato niviśamānāṃs tān sainikān rāvaṇānugāḥ abhijagmur gaṇān eke piśācakṣudrarakṣasām
Sanskrit only: no published translation is held for this verse.
पर्वणः पूतनो जम्भः खरः क्रोधवशो हरिः प्ररुजश् चारुजश् चैव प्रघसश् चैवम् आदयः
parvaṇaḥ pūtano jambhaḥ kharaḥ krodhavaśo hariḥ prarujaś cārujaś caiva praghasaś caivam ādayaḥ
Sanskrit only: no published translation is held for this verse.
ततो ऽभिपततां तेषाम् अदृश्यानां दुरात्मनाम् अन्तर्धानवधं तज्ज्ञश् चकार स विभीषणः
tato 'bhipatatāṃ teṣām adṛśyānāṃ durātmanām antardhānavadhaṃ tajjñaś cakāra sa vibhīṣaṇaḥ
Sanskrit only: no published translation is held for this verse.
ते दृश्यमाना हरिभिर् बलिभिर् दूरपातिभिः निहताः सर्वशो राजन् महीं जग्मुर् गतासवः
te dṛśyamānā haribhir balibhir dūrapātibhiḥ nihatāḥ sarvaśo rājan mahīṃ jagmur gatāsavaḥ
Sanskrit only: no published translation is held for this verse.
अमृष्यमाणः सबलो रावणो निर्ययाव् अथ व्यूह्य चौशनसं व्यूहं हरीन् सर्वान् अहारयत्
amṛṣyamāṇaḥ sabalo rāvaṇo niryayāv atha vyūhya cauśanasaṃ vyūhaṃ harīn sarvān ahārayat
Sanskrit only: no published translation is held for this verse.
राघवस् त्व् अभिनिर्याय व्यूढानीकं दशाननम् बार्हस्पत्यं विधिं कृत्वा प्रत्यव्यूहन् निशाचरम्
rāghavas tv abhiniryāya vyūḍhānīkaṃ daśānanam bārhaspatyaṃ vidhiṃ kṛtvā pratyavyūhan niśācaram
Sanskrit only: no published translation is held for this verse.
समेत्य युयुधे तत्र ततो रामेण रावणः युयुधे लक्ष्मणश् चैव तथैवेन्द्रजिता सह
sametya yuyudhe tatra tato rāmeṇa rāvaṇaḥ yuyudhe lakṣmaṇaś caiva tathaivendrajitā saha
Sanskrit only: no published translation is held for this verse.
विरूपाक्षेण सुग्रीवस् तारेण च निखर्वटः तुण्डेन च नलस् तत्र पटुशः पनसेन च
virūpākṣeṇa sugrīvas tāreṇa ca nikharvaṭaḥ tuṇḍena ca nalas tatra paṭuśaḥ panasena ca
Sanskrit only: no published translation is held for this verse.
विषह्यं यं हि यो मेने स स तेन समेयिवान् युयुधे युद्धवेलायां स्वबाहुबलम् आश्रितः
viṣahyaṃ yaṃ hi yo mene sa sa tena sameyivān yuyudhe yuddhavelāyāṃ svabāhubalam āśritaḥ
Sanskrit only: no published translation is held for this verse.
स संप्रहारो ववृधे भीरूणां भयवर्धनः लोमसंहर्षणो घोरः पुरा देवासुरे यथा
sa saṃprahāro vavṛdhe bhīrūṇāṃ bhayavardhanaḥ lomasaṃharṣaṇo ghoraḥ purā devāsure yathā
Sanskrit only: no published translation is held for this verse.
रावणो रामम् आनर्छच् छक्तिशूलासिवृष्टिभिः निशितैर् आयसैस् तीक्ष्णै रावणं चापि राघवः
rāvaṇo rāmam ānarchac chaktiśūlāsivṛṣṭibhiḥ niśitair āyasais tīkṣṇai rāvaṇaṃ cāpi rāghavaḥ
Sanskrit only: no published translation is held for this verse.
तथैवेन्द्रजितं यत्तं लक्ष्मणो मर्मभेदिभिः इन्द्रजिच् चापि सौमित्रिं बिभेद बहुभिः शरैः
tathaivendrajitaṃ yattaṃ lakṣmaṇo marmabhedibhiḥ indrajic cāpi saumitriṃ bibheda bahubhiḥ śaraiḥ
Sanskrit only: no published translation is held for this verse.
विभीषणः प्रहस्तं च प्रहस्तश् च विभीषणम् खगपत्रैः शरैस् तीक्ष्णैर् अभ्यवर्षद् गतव्यथः
vibhīṣaṇaḥ prahastaṃ ca prahastaś ca vibhīṣaṇam khagapatraiḥ śarais tīkṣṇair abhyavarṣad gatavyathaḥ
Sanskrit only: no published translation is held for this verse.
तेषां बलवताम् आसीन् महास्त्राणां समागमः विव्यथुः सकला येन त्रयो लोकाश् चराचराः
teṣāṃ balavatām āsīn mahāstrāṇāṃ samāgamaḥ vivyathuḥ sakalā yena trayo lokāś carācarāḥ
Sanskrit only: no published translation is held for this verse.