Mahābhārata (critical edition) 3.87

धौम्य उवाच अवन्तिषु प्रतीच्यां वै कीर्तयिष्यामि ते दिशि यानि तत्र पवित्राणि पुण्यान्य् आयतनानि च

dhaumya uvāca avantiṣu pratīcyāṃ vai kīrtayiṣyāmi te diśi yāni tatra pavitrāṇi puṇyāny āyatanāni ca

Sanskrit only: no published translation is held for this verse.

प्रियङ्ग्वाम्रवनोपेता वानीरवनमालिनी प्रत्यक्स्रोता नदी पुण्या नर्मदा तत्र भारत

priyaṅgvāmravanopetā vānīravanamālinī pratyaksrotā nadī puṇyā narmadā tatra bhārata

Sanskrit only: no published translation is held for this verse.

निकेतः ख्यायते पुण्यो यत्र विश्रवसो मुनेः जज्ञे धनपतिर् यत्र कुबेरो नरवाहनः

niketaḥ khyāyate puṇyo yatra viśravaso muneḥ jajñe dhanapatir yatra kubero naravāhanaḥ

Sanskrit only: no published translation is held for this verse.

वैडूर्यशिखरो नाम पुण्यो गिरिवरः शुभः दिव्यपुष्पफलास् तत्र पादपा हरितच्छदाः

vaiḍūryaśikharo nāma puṇyo girivaraḥ śubhaḥ divyapuṣpaphalās tatra pādapā haritacchadāḥ

Sanskrit only: no published translation is held for this verse.

तस्य शैलस्य शिखरे सरस् तत्र च धीमतः प्रफुल्लनलिनं राजन् देवगन्धर्वसेवितम्

tasya śailasya śikhare saras tatra ca dhīmataḥ praphullanalinaṃ rājan devagandharvasevitam

Sanskrit only: no published translation is held for this verse.

बह्वाश्चर्यं महाराज दृश्यते तत्र पर्वते पुण्ये स्वर्गोपमे दिव्ये नित्यं देवर्षिसेविते

bahvāścaryaṃ mahārāja dṛśyate tatra parvate puṇye svargopame divye nityaṃ devarṣisevite

Sanskrit only: no published translation is held for this verse.

ह्रदिनी पुण्यतीर्था च राजर्षेस् तत्र वै सरित् विश्वामित्रनदी पारा पुण्या परपुरंजय

hradinī puṇyatīrthā ca rājarṣes tatra vai sarit viśvāmitranadī pārā puṇyā parapuraṃjaya

Sanskrit only: no published translation is held for this verse.

यस्यास् तीरे सतां मध्ये ययातिर् नहुषात्मजः पपात स पुनर् लोकांल् लेभे धर्मान् सनातनान्

yasyās tīre satāṃ madhye yayātir nahuṣātmajaḥ papāta sa punar lokāṃl lebhe dharmān sanātanān

Sanskrit only: no published translation is held for this verse.

तत्र पुण्यह्रदस् तात मैनाकश् चैव पर्वतः बहुमूलफलो वीर असितो नाम पर्वतः

tatra puṇyahradas tāta mainākaś caiva parvataḥ bahumūlaphalo vīra asito nāma parvataḥ

Sanskrit only: no published translation is held for this verse.

आश्रमः कक्षसेनस्य पुण्यस् तत्र युधिष्ठिर च्यवनस्याश्रमश् चैव ख्यातः सर्वत्र पाण्डव तत्राल्पेनैव सिध्यन्ति मानवास् तपसा विभो

āśramaḥ kakṣasenasya puṇyas tatra yudhiṣṭhira cyavanasyāśramaś caiva khyātaḥ sarvatra pāṇḍava tatrālpenaiva sidhyanti mānavās tapasā vibho

Sanskrit only: no published translation is held for this verse.

जम्बूमार्गो महाराज ऋषीणां भावितात्मनाम् आश्रमः शाम्यतां श्रेष्ठ मृगद्विजगणायुतः

jambūmārgo mahārāja ṛṣīṇāṃ bhāvitātmanām āśramaḥ śāmyatāṃ śreṣṭha mṛgadvijagaṇāyutaḥ

Sanskrit only: no published translation is held for this verse.

ततः पुण्यतमा राजन् सततं तापसायुता केतुमाला च मेध्या च गङ्गारण्यं च भूमिप ख्यातं च सैन्धवारण्यं पुण्यं द्विजनिषेवितम्

tataḥ puṇyatamā rājan satataṃ tāpasāyutā ketumālā ca medhyā ca gaṅgāraṇyaṃ ca bhūmipa khyātaṃ ca saindhavāraṇyaṃ puṇyaṃ dvijaniṣevitam

Sanskrit only: no published translation is held for this verse.

पितामहसरः पुण्यं पुष्करं नाम भारत वैखानसानां सिद्धानाम् ऋषीणाम् आश्रमः प्रियः

pitāmahasaraḥ puṇyaṃ puṣkaraṃ nāma bhārata vaikhānasānāṃ siddhānām ṛṣīṇām āśramaḥ priyaḥ

Sanskrit only: no published translation is held for this verse.

अप्य् अत्र संस्तवार्थाय प्रजापतिर् अथो जगौ पुष्करेषु कुरुश्रेष्ठ गाथां सुकृतिनां वर

apy atra saṃstavārthāya prajāpatir atho jagau puṣkareṣu kuruśreṣṭha gāthāṃ sukṛtināṃ vara

Sanskrit only: no published translation is held for this verse.

मनसाप्य् अभिकामस्य पुष्कराणि मनस्विनः पापाणि विप्रणश्यन्ति नाकपृष्ठे च मोदते

manasāpy abhikāmasya puṣkarāṇi manasvinaḥ pāpāṇi vipraṇaśyanti nākapṛṣṭhe ca modate

Sanskrit only: no published translation is held for this verse.