Mahābhārata (critical edition) 4.10

वैशंपायन उवाच अथापरो ऽदृश्यत रूपसंपदा; स्त्रीणाम् अलंकारधरो बृहत् पुमान् प्राकारवप्रे प्रतिमुच्य कुण्डले; दीर्घे च कम्बू परिहाटके शुभे

vaiśaṃpāyana uvāca athāparo 'dṛśyata rūpasaṃpadā; strīṇām alaṃkāradharo bṛhat pumān prākāravapre pratimucya kuṇḍale; dīrghe ca kambū parihāṭake śubhe

Sanskrit only: no published translation is held for this verse.

बहूंश् च दीर्घांश् च विकीर्य मूर्धजान्; महाभुजो वारणमत्तविक्रमः गतेन भूमिम् अभिकम्पयंस् तदा; विराटम् आसाद्य सभासमीपतः

bahūṃś ca dīrghāṃś ca vikīrya mūrdhajān; mahābhujo vāraṇamattavikramaḥ gatena bhūmim abhikampayaṃs tadā; virāṭam āsādya sabhāsamīpataḥ

Sanskrit only: no published translation is held for this verse.

तं प्रेक्ष्य राजोपगतं सभातले; सत्रप्रतिच्छन्नम् अरिप्रमाथिनम् विराजमानं परमेण वर्चसा; सुतं महेन्द्रस्य गजेन्द्रविक्रमम्

taṃ prekṣya rājopagataṃ sabhātale; satrapraticchannam aripramāthinam virājamānaṃ parameṇa varcasā; sutaṃ mahendrasya gajendravikramam

Sanskrit only: no published translation is held for this verse.

सर्वान् अपृच्छच् च समीपचारिणः; कुतो ऽयम् आयाति न मे पुरा श्रुतः न चैनम् ऊचुर् विदितं तदा नराः; सविस्मितं वाक्यम् इदं नृपो ऽब्रवीत्

sarvān apṛcchac ca samīpacāriṇaḥ; kuto 'yam āyāti na me purā śrutaḥ na cainam ūcur viditaṃ tadā narāḥ; savismitaṃ vākyam idaṃ nṛpo 'bravīt

Sanskrit only: no published translation is held for this verse.

सर्वोपपन्नः पुरुषो मनोरमः; श्यामो युवा वारणयूथपोपमः विमुच्य कम्बू परिहाटके शुभे; विमुच्य वेणीम् अपिनह्य कुण्डले

sarvopapannaḥ puruṣo manoramaḥ; śyāmo yuvā vāraṇayūthapopamaḥ vimucya kambū parihāṭake śubhe; vimucya veṇīm apinahya kuṇḍale

Sanskrit only: no published translation is held for this verse.

शिखी सुकेशः परिधाय चान्यथा; भवस्व धन्वी कवची शरी तथा आरुह्य यानं परिधावतां भवान्; सुतैः समो मे भव वा मया समः

śikhī sukeśaḥ paridhāya cānyathā; bhavasva dhanvī kavacī śarī tathā āruhya yānaṃ paridhāvatāṃ bhavān; sutaiḥ samo me bhava vā mayā samaḥ

Sanskrit only: no published translation is held for this verse.

वृद्धो ह्य् अहं वै परिहारकामः; सर्वान् मत्स्यांस् तरसा पालयस्व नैवंविधाः क्लीबरूपा भवन्ति; कथं चनेति प्रतिभाति मे मनः

vṛddho hy ahaṃ vai parihārakāmaḥ; sarvān matsyāṃs tarasā pālayasva naivaṃvidhāḥ klībarūpā bhavanti; kathaṃ caneti pratibhāti me manaḥ

Sanskrit only: no published translation is held for this verse.

अर्जुन उवाच गायामि नृत्याम्य् अथ वादयामि; भद्रो ऽस्मि नृत्ते कुशलो ऽस्मि गीते त्वम् उत्तरायाः परिदत्स्व मां स्वयं; भवामि देव्या नरदेव नर्तकः

arjuna uvāca gāyāmi nṛtyāmy atha vādayāmi; bhadro 'smi nṛtte kuśalo 'smi gīte tvam uttarāyāḥ paridatsva māṃ svayaṃ; bhavāmi devyā naradeva nartakaḥ

Sanskrit only: no published translation is held for this verse.

इदं तु रूपं मम येन किं नु तत्; प्रकीर्तयित्वा भृशशोकवर्धनम् बृहन्नडां वै नरदेव विद्धि मां; सुतं सुतां वा पितृमातृवर्जिताम्

idaṃ tu rūpaṃ mama yena kiṃ nu tat; prakīrtayitvā bhṛśaśokavardhanam bṛhannaḍāṃ vai naradeva viddhi māṃ; sutaṃ sutāṃ vā pitṛmātṛvarjitām

Sanskrit only: no published translation is held for this verse.

विराट उवाच ददामि ते हन्त वरं बृहन्नडे; सुतां च मे नर्तय याश् च तादृशीः इदं तु ते कर्म समं न मे मतं; समुद्रनेमिं पृथिवीं त्वम् अर्हसि

virāṭa uvāca dadāmi te hanta varaṃ bṛhannaḍe; sutāṃ ca me nartaya yāś ca tādṛśīḥ idaṃ tu te karma samaṃ na me mataṃ; samudranemiṃ pṛthivīṃ tvam arhasi

Sanskrit only: no published translation is held for this verse.

वैशंपायन उवाच बृहन्नडां ताम् अभिवीक्ष्य मत्स्यराट्; कलासु नृत्ते च तथैव वादिते अपुंस्त्वम् अप्य् अस्य निशम्य च स्थिरं; ततः कुमारीपुरम् उत्ससर्ज तम्

vaiśaṃpāyana uvāca bṛhannaḍāṃ tām abhivīkṣya matsyarāṭ; kalāsu nṛtte ca tathaiva vādite apuṃstvam apy asya niśamya ca sthiraṃ; tataḥ kumārīpuram utsasarja tam

Sanskrit only: no published translation is held for this verse.

स शिक्षयाम् आस च गीतवादितं; सुतां विराटस्य धनंजयः प्रभुः सखीश् च तस्याः परिचारिकास् तथा; प्रियश् च तासां स बभूव पाण्डवः

sa śikṣayām āsa ca gītavāditaṃ; sutāṃ virāṭasya dhanaṃjayaḥ prabhuḥ sakhīś ca tasyāḥ paricārikās tathā; priyaś ca tāsāṃ sa babhūva pāṇḍavaḥ

Sanskrit only: no published translation is held for this verse.

तथा स सत्रेण धनंजयो ऽवसत्; प्रियाणि कुर्वन् सह ताभिर् आत्मवान् तथागतं तत्र न जज्ञिरे जना; बहिश्चरा वाप्य् अथवान्तरेचराः

tathā sa satreṇa dhanaṃjayo 'vasat; priyāṇi kurvan saha tābhir ātmavān tathāgataṃ tatra na jajñire janā; bahiścarā vāpy athavāntarecarāḥ

Sanskrit only: no published translation is held for this verse.