Mahābhārata (critical edition) 4.28

वैशंपायन उवाच ततः शारद्वतो वाक्यम् इत्य् उवाच कृपस् तदा युक्तं प्राप्तं च वृद्धेन पाण्डवान् प्रति भाषितम्

vaiśaṃpāyana uvāca tataḥ śāradvato vākyam ity uvāca kṛpas tadā yuktaṃ prāptaṃ ca vṛddhena pāṇḍavān prati bhāṣitam

Sanskrit only: no published translation is held for this verse.

धर्मार्थसहितं श्लक्ष्णं तत्त्वतश् च सहेतुमत् तत्रानुरूपं भीष्मेण ममाप्य् अत्र गिरं शृणु

dharmārthasahitaṃ ślakṣṇaṃ tattvataś ca sahetumat tatrānurūpaṃ bhīṣmeṇa mamāpy atra giraṃ śṛṇu

Sanskrit only: no published translation is held for this verse.

तेषां चैव गतिस् तीर्थैर् वासश् चैषां प्रचिन्त्यताम् नीतिर् विधीयतां चापि सांप्रतं या हिता भवेत्

teṣāṃ caiva gatis tīrthair vāsaś caiṣāṃ pracintyatām nītir vidhīyatāṃ cāpi sāṃprataṃ yā hitā bhavet

Sanskrit only: no published translation is held for this verse.

नावज्ञेयो रिपुस् तात प्राकृतो ऽपि बुभूषता किं पुनः पाण्डवास् तात सर्वास्त्रकुशला रणे

nāvajñeyo ripus tāta prākṛto 'pi bubhūṣatā kiṃ punaḥ pāṇḍavās tāta sarvāstrakuśalā raṇe

Sanskrit only: no published translation is held for this verse.

तस्मात् सत्रं प्रविष्टेषु पाण्डवेषु महात्मसु गूढभावेषु छन्नेषु काले चोदयम् आगते

tasmāt satraṃ praviṣṭeṣu pāṇḍaveṣu mahātmasu gūḍhabhāveṣu channeṣu kāle codayam āgate

Sanskrit only: no published translation is held for this verse.

स्वराष्ट्रपरराष्ट्रेषु ज्ञातव्यं बलम् आत्मनः उदये पाण्डवानां च प्राप्ते काले न संशयः

svarāṣṭrapararāṣṭreṣu jñātavyaṃ balam ātmanaḥ udaye pāṇḍavānāṃ ca prāpte kāle na saṃśayaḥ

Sanskrit only: no published translation is held for this verse.

निवृत्तसमयाः पार्था महात्मानो महाबलाः महोत्साहा भविष्यन्ति पाण्डवा ह्य् अतितेजसः

nivṛttasamayāḥ pārthā mahātmāno mahābalāḥ mahotsāhā bhaviṣyanti pāṇḍavā hy atitejasaḥ

Sanskrit only: no published translation is held for this verse.

तस्माद् बलं च कोशं च नीतिश् चापि विधीयताम् यथा कालोदये प्राप्ते सम्यक् तैः संदधामहे

tasmād balaṃ ca kośaṃ ca nītiś cāpi vidhīyatām yathā kālodaye prāpte samyak taiḥ saṃdadhāmahe

Sanskrit only: no published translation is held for this verse.

तात मन्यामि तत् सर्वं बुध्यस्व बलम् आत्मनः नियतं सर्वमित्रेषु बलवत्स्व् अबलेषु च

tāta manyāmi tat sarvaṃ budhyasva balam ātmanaḥ niyataṃ sarvamitreṣu balavatsv abaleṣu ca

Sanskrit only: no published translation is held for this verse.

उच्चावचं बलं ज्ञात्वा मध्यस्थं चापि भारत प्रहृष्टम् अप्रहृष्टं च संदधाम तथा परैः

uccāvacaṃ balaṃ jñātvā madhyasthaṃ cāpi bhārata prahṛṣṭam aprahṛṣṭaṃ ca saṃdadhāma tathā paraiḥ

Sanskrit only: no published translation is held for this verse.

साम्ना भेदेन दानेन दण्डेन बलिकर्मणा न्यायेनानम्य च परान् बलाच् चानम्य दुर्बलान्

sāmnā bhedena dānena daṇḍena balikarmaṇā nyāyenānamya ca parān balāc cānamya durbalān

Sanskrit only: no published translation is held for this verse.

सान्त्वयित्वा च मित्राणि बलं चाभाष्यतां सुखम् सकोशबलसंवृद्धः सम्यक् सिद्धिम् अवाप्स्यसि

sāntvayitvā ca mitrāṇi balaṃ cābhāṣyatāṃ sukham sakośabalasaṃvṛddhaḥ samyak siddhim avāpsyasi

Sanskrit only: no published translation is held for this verse.

योत्स्यसे चापि बलिभिर् अरिभिः प्रत्युपस्थितैः अन्यैस् त्वं पाण्डवैर् वापि हीनस्वबलवाहनैः

yotsyase cāpi balibhir aribhiḥ pratyupasthitaiḥ anyais tvaṃ pāṇḍavair vāpi hīnasvabalavāhanaiḥ

Sanskrit only: no published translation is held for this verse.

एवं सर्वं विनिश्चित्य व्यवसायं स्वधर्मतः यथाकालं मनुष्येन्द्र चिरं सुखम् अवाप्स्यसि

evaṃ sarvaṃ viniścitya vyavasāyaṃ svadharmataḥ yathākālaṃ manuṣyendra ciraṃ sukham avāpsyasi

Sanskrit only: no published translation is held for this verse.