Library·Mahābhārata (critical edition)·4·4.35
वैशंपायन उवाच स तां दृष्ट्वा विशालाक्षीं राजपुत्रीं सखीं सखा प्रहसन्न् अब्रवीद् राजन् कुत्रागमनम् इत्य् उत
vaiśaṃpāyana uvāca sa tāṃ dṛṣṭvā viśālākṣīṃ rājaputrīṃ sakhīṃ sakhā prahasann abravīd rājan kutrāgamanam ity uta
Sanskrit only: no published translation is held for this verse.
तम् अब्रवीद् राजपुत्री समुपेत्य नरर्षभम् प्रणयं भावयन्ती स्म सखीमध्य इदं वचः
tam abravīd rājaputrī samupetya nararṣabham praṇayaṃ bhāvayantī sma sakhīmadhya idaṃ vacaḥ
Sanskrit only: no published translation is held for this verse.
गावो राष्ट्रस्य कुरुभिः काल्यन्ते नो बृहन्नडे तान् विजेतुं मम भ्राता प्रयास्यति धनुर्धरः
gāvo rāṣṭrasya kurubhiḥ kālyante no bṛhannaḍe tān vijetuṃ mama bhrātā prayāsyati dhanurdharaḥ
Sanskrit only: no published translation is held for this verse.
नचिरं च हतस् तस्य संग्रामे रथसारथिः तेन नास्ति समः सूतो यो ऽस्य सारथ्यम् आचरेत्
naciraṃ ca hatas tasya saṃgrāme rathasārathiḥ tena nāsti samaḥ sūto yo 'sya sārathyam ācaret
Sanskrit only: no published translation is held for this verse.
तस्मै प्रयतमानाय सारथ्यर्थं बृहन्नडे आचचक्षे हयज्ञाने सैरन्ध्री कौशलं तव
tasmai prayatamānāya sārathyarthaṃ bṛhannaḍe ācacakṣe hayajñāne sairandhrī kauśalaṃ tava
Sanskrit only: no published translation is held for this verse.
सा सारथ्यं मम भ्रातुः कुरु साधु बृहन्नडे पुरा दूरतरं गावो ह्रियन्ते कुरुभिर् हि नः
sā sārathyaṃ mama bhrātuḥ kuru sādhu bṛhannaḍe purā dūrataraṃ gāvo hriyante kurubhir hi naḥ
Sanskrit only: no published translation is held for this verse.
अथैतद् वचनं मे ऽद्य नियुक्ता न करिष्यसि प्रणयाद् उच्यमाना त्वं परित्यक्ष्यामि जीवितम्
athaitad vacanaṃ me 'dya niyuktā na kariṣyasi praṇayād ucyamānā tvaṃ parityakṣyāmi jīvitam
Sanskrit only: no published translation is held for this verse.
एवम् उक्तस् तु सुश्रोण्या तया सख्या परंतपः जगाम राजपुत्रस्य सकाशम् अमितौजसः
evam uktas tu suśroṇyā tayā sakhyā paraṃtapaḥ jagāma rājaputrasya sakāśam amitaujasaḥ
Sanskrit only: no published translation is held for this verse.
तं सा व्रजन्तं त्वरितं प्रभिन्नम् इव कुञ्जरम् अन्वगच्छद् विशालाक्षी शिशुर् गजवधूर् इव
taṃ sā vrajantaṃ tvaritaṃ prabhinnam iva kuñjaram anvagacchad viśālākṣī śiśur gajavadhūr iva
Sanskrit only: no published translation is held for this verse.
दूराद् एव तु तं प्रेक्ष्य राजपुत्रो ऽभ्यभाषत त्वया सारथिना पार्थः खाण्डवे ऽग्निम् अतर्पयत्
dūrād eva tu taṃ prekṣya rājaputro 'bhyabhāṣata tvayā sārathinā pārthaḥ khāṇḍave 'gnim atarpayat
Sanskrit only: no published translation is held for this verse.
पृथिवीम् अजयत् कृत्स्नां कुन्तीपुत्रो धनंजयः सैरन्ध्री त्वां समाचष्ट सा हि जानाति पाण्डवान्
pṛthivīm ajayat kṛtsnāṃ kuntīputro dhanaṃjayaḥ sairandhrī tvāṃ samācaṣṭa sā hi jānāti pāṇḍavān
Sanskrit only: no published translation is held for this verse.
संयच्छ मामकान् अश्वांस् तथैव त्वं बृहन्नडे कुरुभिर् योत्स्यमानस्य गोधनानि परीप्सतः
saṃyaccha māmakān aśvāṃs tathaiva tvaṃ bṛhannaḍe kurubhir yotsyamānasya godhanāni parīpsataḥ
Sanskrit only: no published translation is held for this verse.
अर्जुनस्य किलासीस् त्वं सारथिर् दयितः पुरा त्वयाजयत् सहायेन पृथिवीं पाण्डवर्षभः
arjunasya kilāsīs tvaṃ sārathir dayitaḥ purā tvayājayat sahāyena pṛthivīṃ pāṇḍavarṣabhaḥ
Sanskrit only: no published translation is held for this verse.
एवम् उक्ता प्रत्युवाच राजपुत्रं बृहन्नडा का शक्तिर् मम सारथ्यं कर्तुं संग्राममूर्धनि
evam uktā pratyuvāca rājaputraṃ bṛhannaḍā kā śaktir mama sārathyaṃ kartuṃ saṃgrāmamūrdhani
Sanskrit only: no published translation is held for this verse.
गीतं वा यदि वा नृत्तं वादित्रं वा पृथग्विधम् तत् करिष्यामि भद्रं ते सारथ्यं तु कुतो मयि
gītaṃ vā yadi vā nṛttaṃ vāditraṃ vā pṛthagvidham tat kariṣyāmi bhadraṃ te sārathyaṃ tu kuto mayi
Sanskrit only: no published translation is held for this verse.
उत्तर उवाच बृहन्नडे गायनो वा नर्तनो वा पुनर् भव क्षिप्रं मे रथम् आस्थाय निगृह्णीष्व हयोत्तमान्
uttara uvāca bṛhannaḍe gāyano vā nartano vā punar bhava kṣipraṃ me ratham āsthāya nigṛhṇīṣva hayottamān
Sanskrit only: no published translation is held for this verse.
वैशंपायन उवाच स तत्र नर्मसंयुक्तम् अकरोत् पाण्डवो बहु उत्तरायाः प्रमुखतः सर्वं जानन्न् अरिंदम
vaiśaṃpāyana uvāca sa tatra narmasaṃyuktam akarot pāṇḍavo bahu uttarāyāḥ pramukhataḥ sarvaṃ jānann ariṃdama
Sanskrit only: no published translation is held for this verse.
ऊर्ध्वम् उत्क्षिप्य कवचं शरीरे प्रत्यमुञ्चत कुमार्यस् तत्र तं दृष्ट्वा प्राहसन् पृथुलोचनाः
ūrdhvam utkṣipya kavacaṃ śarīre pratyamuñcata kumāryas tatra taṃ dṛṣṭvā prāhasan pṛthulocanāḥ
Sanskrit only: no published translation is held for this verse.
स तु दृष्ट्वा विमुह्यन्तं स्वयम् एवोत्तरस् ततः कवचेन महार्हेण समनह्यद् बृहन्नडाम्
sa tu dṛṣṭvā vimuhyantaṃ svayam evottaras tataḥ kavacena mahārheṇa samanahyad bṛhannaḍām
Sanskrit only: no published translation is held for this verse.
स बिभ्रत् कवचं चाग्र्यं स्वयम् अप्य् अंशुमत्प्रभम् ध्वजं च सिंहम् उच्छ्रित्य सारथ्ये समकल्पयत्
sa bibhrat kavacaṃ cāgryaṃ svayam apy aṃśumatprabham dhvajaṃ ca siṃham ucchritya sārathye samakalpayat
Sanskrit only: no published translation is held for this verse.
धनूंषि च महार्हाणि बाणांश् च रुचिरान् बहून् आदाय प्रययौ वीरः स बृहन्नडसारथिः
dhanūṃṣi ca mahārhāṇi bāṇāṃś ca rucirān bahūn ādāya prayayau vīraḥ sa bṛhannaḍasārathiḥ
Sanskrit only: no published translation is held for this verse.
अथोत्तरा च कन्याश् च सख्यस् ताम् अब्रुवंस् तदा बृहन्नडे आनयेथा वासांसि रुचिराणि नः
athottarā ca kanyāś ca sakhyas tām abruvaṃs tadā bṛhannaḍe ānayethā vāsāṃsi rucirāṇi naḥ
Sanskrit only: no published translation is held for this verse.
पाञ्चालिकार्थं सूक्ष्माणि चित्राणि विविधानि च विजित्य संग्रामगतान् भीष्मद्रोणमुखान् कुरून्
pāñcālikārthaṃ sūkṣmāṇi citrāṇi vividhāni ca vijitya saṃgrāmagatān bhīṣmadroṇamukhān kurūn
Sanskrit only: no published translation is held for this verse.
अथ ता ब्रुवतीः कन्याः सहिताः पाण्डुनन्दनः प्रत्युवाच हसन् पार्थो मेघदुन्दुभिनिःस्वनः
atha tā bruvatīḥ kanyāḥ sahitāḥ pāṇḍunandanaḥ pratyuvāca hasan pārtho meghadundubhiniḥsvanaḥ
Sanskrit only: no published translation is held for this verse.
यद्य् उत्तरो ऽयं संग्रामे विजेष्यति महारथान् अथाहरिष्ये वासांसि दिव्यानि रुचिराणि च
yady uttaro 'yaṃ saṃgrāme vijeṣyati mahārathān athāhariṣye vāsāṃsi divyāni rucirāṇi ca
Sanskrit only: no published translation is held for this verse.
एवम् उक्त्वा तु बीभत्सुस् ततः प्राचोदयद् धयान् कुरून् अभिमुखाञ् शूरो नानाध्वजपताकिनः
evam uktvā tu bībhatsus tataḥ prācodayad dhayān kurūn abhimukhāñ śūro nānādhvajapatākinaḥ
Sanskrit only: no published translation is held for this verse.