Library·Mahābhārata (critical edition)·4·4.51
वैशंपायन उवाच तान्य् अनीकान्य् अदृश्यन्त कुरूणाम् उग्रधन्विनाम् संसर्पन्तो यथा मेघा घर्मान्ते मन्दमारुताः
vaiśaṃpāyana uvāca tāny anīkāny adṛśyanta kurūṇām ugradhanvinām saṃsarpanto yathā meghā gharmānte mandamārutāḥ
Sanskrit only: no published translation is held for this verse.
अभ्याशे वाजिनस् तस्थुः समारूढाः प्रहारिभिः भीमरूपाश् च मातङ्गास् तोमराङ्कुशचोदिताः
abhyāśe vājinas tasthuḥ samārūḍhāḥ prahāribhiḥ bhīmarūpāś ca mātaṅgās tomarāṅkuśacoditāḥ
Sanskrit only: no published translation is held for this verse.
ततः शक्रः सुरगणैः समारुह्य सुदर्शनम् सहोपायात् तदा राजन् विश्वाश्विमरुतां गणैः
tataḥ śakraḥ suragaṇaiḥ samāruhya sudarśanam sahopāyāt tadā rājan viśvāśvimarutāṃ gaṇaiḥ
Sanskrit only: no published translation is held for this verse.
तद् देवयक्षगन्धर्वमहोरगसमाकुलम् शुशुभे ऽभ्रविनिर्मुक्तं ग्रहैर् इव नभस्तलम्
tad devayakṣagandharvamahoragasamākulam śuśubhe 'bhravinirmuktaṃ grahair iva nabhastalam
Sanskrit only: no published translation is held for this verse.
अस्त्राणां च बलं तेषां मानुषेषु प्रयुज्यताम् तच् च घोरं महद् युद्धं भीष्मार्जुनसमागमे
astrāṇāṃ ca balaṃ teṣāṃ mānuṣeṣu prayujyatām tac ca ghoraṃ mahad yuddhaṃ bhīṣmārjunasamāgame
Sanskrit only: no published translation is held for this verse.
शतं शतसहस्राणां यत्र स्थूणा हिरण्मयाः मणिरत्नमयाश् चान्याः प्रासादम् उपधारयन्
śataṃ śatasahasrāṇāṃ yatra sthūṇā hiraṇmayāḥ maṇiratnamayāś cānyāḥ prāsādam upadhārayan
Sanskrit only: no published translation is held for this verse.
तत्र कामगमं दिव्यं सर्वरत्नविभूषितम् विमानं देवराजस्य शुशुभे खेचरं तदा
tatra kāmagamaṃ divyaṃ sarvaratnavibhūṣitam vimānaṃ devarājasya śuśubhe khecaraṃ tadā
Sanskrit only: no published translation is held for this verse.
तत्र देवास् त्रयस्त्रिंशत् तिष्ठन्ति सहवासवाः गन्धर्वा राक्षसाः सर्पाः पितरश् च महर्षिभिः
tatra devās trayastriṃśat tiṣṭhanti sahavāsavāḥ gandharvā rākṣasāḥ sarpāḥ pitaraś ca maharṣibhiḥ
Sanskrit only: no published translation is held for this verse.
तथा राजा वसुमना बलाक्षः सुप्रतर्दनः अष्टकश् च शिबिश् चैव ययातिर् नहुषो गयः
tathā rājā vasumanā balākṣaḥ supratardanaḥ aṣṭakaś ca śibiś caiva yayātir nahuṣo gayaḥ
Sanskrit only: no published translation is held for this verse.
मनुः क्षुपो रघुर् भानुः कृशाश्वः सगरः शलः विमाने देवराजस्य समदृश्यन्त सुप्रभाः
manuḥ kṣupo raghur bhānuḥ kṛśāśvaḥ sagaraḥ śalaḥ vimāne devarājasya samadṛśyanta suprabhāḥ
Sanskrit only: no published translation is held for this verse.
अग्नेर् ईशस्य सोमस्य वरुणस्य प्रजापतेः तथा धातुर् विधातुश् च कुबेरस्य यमस्य च
agner īśasya somasya varuṇasya prajāpateḥ tathā dhātur vidhātuś ca kuberasya yamasya ca
Sanskrit only: no published translation is held for this verse.
अलम्बुसोग्रसेनस्य गन्धर्वस्य च तुम्बुरोः यथाभागं यथोद्देशं विमानानि चकाशिरे
alambusograsenasya gandharvasya ca tumburoḥ yathābhāgaṃ yathoddeśaṃ vimānāni cakāśire
Sanskrit only: no published translation is held for this verse.
सर्वदेवनिकायाश् च सिद्धाश् च परमर्षयः अर्जुनस्य कुरूणां च द्रष्टुं युद्धम् उपागताः
sarvadevanikāyāś ca siddhāś ca paramarṣayaḥ arjunasya kurūṇāṃ ca draṣṭuṃ yuddham upāgatāḥ
Sanskrit only: no published translation is held for this verse.
दिव्यानां तत्र माल्यानां गन्धः पुण्यो ऽथ सर्वशः प्रससार वसन्ताग्रे वनानाम् इव पुष्पिताम्
divyānāṃ tatra mālyānāṃ gandhaḥ puṇyo 'tha sarvaśaḥ prasasāra vasantāgre vanānām iva puṣpitām
Sanskrit only: no published translation is held for this verse.
रक्तारक्तानि देवानां समदृश्यन्त तिष्ठताम् आतपत्राणि वासांसि स्रजश् च व्यजनानि च
raktāraktāni devānāṃ samadṛśyanta tiṣṭhatām ātapatrāṇi vāsāṃsi srajaś ca vyajanāni ca
Sanskrit only: no published translation is held for this verse.
उपशाम्यद् रजो भौमं सर्वं व्याप्तं मरीचिभिः दिव्यान् गन्धान् उपादाय वायुर् योधान् असेवत
upaśāmyad rajo bhaumaṃ sarvaṃ vyāptaṃ marīcibhiḥ divyān gandhān upādāya vāyur yodhān asevata
Sanskrit only: no published translation is held for this verse.
प्रभासितम् इवाकाशं चित्ररूपम् अलंकृतम् संपतद्भिः स्थितैश् चैव नानारत्नावभासितैः विमानैर् विविधैश् चित्रैर् उपानीतैः सुरोत्तमैः
prabhāsitam ivākāśaṃ citrarūpam alaṃkṛtam saṃpatadbhiḥ sthitaiś caiva nānāratnāvabhāsitaiḥ vimānair vividhaiś citrair upānītaiḥ surottamaiḥ
Sanskrit only: no published translation is held for this verse.