Mahābhārata (critical edition) 4.62

वैशंपायन उवाच ततो विजित्य संग्रामे कुरून् गोवृषभेक्षणः समानयाम् आस तदा विराटस्य धनं महत्

vaiśaṃpāyana uvāca tato vijitya saṃgrāme kurūn govṛṣabhekṣaṇaḥ samānayām āsa tadā virāṭasya dhanaṃ mahat

Sanskrit only: no published translation is held for this verse.

गतेषु च प्रभग्नेषु धार्तराष्ट्रेषु सर्वशः वनान् निष्क्रम्य गहनाद् बहवः कुरुसैनिकाः

gateṣu ca prabhagneṣu dhārtarāṣṭreṣu sarvaśaḥ vanān niṣkramya gahanād bahavaḥ kurusainikāḥ

Sanskrit only: no published translation is held for this verse.

भयात् संत्रस्तमनसः समाजग्मुस् ततस् ततः मुक्तकेशा व्यदृश्यन्त स्थिताः प्राञ्जलयस् तदा

bhayāt saṃtrastamanasaḥ samājagmus tatas tataḥ muktakeśā vyadṛśyanta sthitāḥ prāñjalayas tadā

Sanskrit only: no published translation is held for this verse.

क्षुत्पिपासापरिश्रान्ता विदेशस्था विचेतसः ऊचुः प्रणम्य संभ्रान्ताः पार्थ किं करवाम ते

kṣutpipāsāpariśrāntā videśasthā vicetasaḥ ūcuḥ praṇamya saṃbhrāntāḥ pārtha kiṃ karavāma te

Sanskrit only: no published translation is held for this verse.

अर्जुन उवाच स्वस्ति व्रजत भद्रं वो न भेतव्यं कथं चन नाहम् आर्ताञ् जिघांसामि भृशम् आश्वासयामि वः

arjuna uvāca svasti vrajata bhadraṃ vo na bhetavyaṃ kathaṃ cana nāham ārtāñ jighāṃsāmi bhṛśam āśvāsayāmi vaḥ

Sanskrit only: no published translation is held for this verse.

वैशंपायन उवाच तस्य ताम् अभयां वाचं श्रुत्वा योधाः समागताः आयुःकीर्तियशोदाभिस् तम् आशिर्भिर् अनन्दयन्

vaiśaṃpāyana uvāca tasya tām abhayāṃ vācaṃ śrutvā yodhāḥ samāgatāḥ āyuḥkīrtiyaśodābhis tam āśirbhir anandayan

Sanskrit only: no published translation is held for this verse.

ततो निवृत्ताः कुरवः प्रभग्ना वशम् आस्थिताः पन्थानम् उपसंगम्य फल्गुनो वाक्यम् अब्रवीत्

tato nivṛttāḥ kuravaḥ prabhagnā vaśam āsthitāḥ panthānam upasaṃgamya phalguno vākyam abravīt

Sanskrit only: no published translation is held for this verse.

राजपुत्र प्रत्यवेक्ष समानीतानि सर्वशः गोकुलानि महाबाहो वीर गोपालकैः सह

rājaputra pratyavekṣa samānītāni sarvaśaḥ gokulāni mahābāho vīra gopālakaiḥ saha

Sanskrit only: no published translation is held for this verse.

ततो ऽपराह्णे यास्यामो विराटनगरं प्रति आश्वास्य पाययित्वा च परिप्लाव्य च वाजिनः

tato 'parāhṇe yāsyāmo virāṭanagaraṃ prati āśvāsya pāyayitvā ca pariplāvya ca vājinaḥ

Sanskrit only: no published translation is held for this verse.

गच्छन्तु त्वरिताश् चैव गोपालाः प्रेषितास् त्वया नगरे प्रियम् आख्यातुं घोषयन्तु च ते जयम्

gacchantu tvaritāś caiva gopālāḥ preṣitās tvayā nagare priyam ākhyātuṃ ghoṣayantu ca te jayam

Sanskrit only: no published translation is held for this verse.

वैशंपायन उवाच उत्तरस् त्वरमाणो ऽथ दूतान् आज्ञापयत् ततः वचनाद् अर्जुनस्यैव आचक्षध्वं जयं मम

vaiśaṃpāyana uvāca uttaras tvaramāṇo 'tha dūtān ājñāpayat tataḥ vacanād arjunasyaiva ācakṣadhvaṃ jayaṃ mama

Sanskrit only: no published translation is held for this verse.