Mahābhārata (critical edition) 4.65

वैशंपायन उवाच ततस् तृतीये दिवसे भ्रातरः पञ्च पाण्डवाः स्नाताः शुक्लाम्बरधराः समये चरितव्रताः

vaiśaṃpāyana uvāca tatas tṛtīye divase bhrātaraḥ pañca pāṇḍavāḥ snātāḥ śuklāmbaradharāḥ samaye caritavratāḥ

Sanskrit only: no published translation is held for this verse.

युधिष्ठिरं पुरस्कृत्य सर्वाभरणभूषिताः अभिपद्मा यथा नागा भ्राजमाना महारथाः

yudhiṣṭhiraṃ puraskṛtya sarvābharaṇabhūṣitāḥ abhipadmā yathā nāgā bhrājamānā mahārathāḥ

Sanskrit only: no published translation is held for this verse.

विराटस्य सभां गत्वा भूमिपालासनेष्व् अथ निषेदुः पावकप्रख्याः सर्वे धिष्ण्येष्व् इवाग्नयः

virāṭasya sabhāṃ gatvā bhūmipālāsaneṣv atha niṣeduḥ pāvakaprakhyāḥ sarve dhiṣṇyeṣv ivāgnayaḥ

Sanskrit only: no published translation is held for this verse.

तेषु तत्रोपविष्टेषु विराटः पृथिवीपतिः आजगाम सभां कर्तुं राजकार्याणि सर्वशः

teṣu tatropaviṣṭeṣu virāṭaḥ pṛthivīpatiḥ ājagāma sabhāṃ kartuṃ rājakāryāṇi sarvaśaḥ

Sanskrit only: no published translation is held for this verse.

श्रीमतः पाण्डवान् दृष्ट्वा ज्वलतः पावकान् इव अथ मत्स्यो ऽब्रवीत् कङ्कं देवरूपम् अवस्थितम् मरुद्गणैर् उपासीनं त्रिदशानाम् इवेश्वरम्

śrīmataḥ pāṇḍavān dṛṣṭvā jvalataḥ pāvakān iva atha matsyo 'bravīt kaṅkaṃ devarūpam avasthitam marudgaṇair upāsīnaṃ tridaśānām iveśvaram

Sanskrit only: no published translation is held for this verse.

स किलाक्षातिवापस् त्वं सभास्तारो मया कृतः अथ राजासने कस्माद् उपविष्टो ऽस्य् अलंकृतः

sa kilākṣātivāpas tvaṃ sabhāstāro mayā kṛtaḥ atha rājāsane kasmād upaviṣṭo 'sy alaṃkṛtaḥ

Sanskrit only: no published translation is held for this verse.

परिहासेप्सया वाक्यं विराटस्य निशम्य तत् स्मयमानो ऽर्जुनो राजन्न् इदं वचनम् अब्रवीत्

parihāsepsayā vākyaṃ virāṭasya niśamya tat smayamāno 'rjuno rājann idaṃ vacanam abravīt

Sanskrit only: no published translation is held for this verse.

इन्द्रस्याप्य् आसनं राजन्न् अयम् आरोढुम् अर्हति ब्रह्मण्यः श्रुतवांस् त्यागी यज्ञशीलो दृढव्रतः

indrasyāpy āsanaṃ rājann ayam āroḍhum arhati brahmaṇyaḥ śrutavāṃs tyāgī yajñaśīlo dṛḍhavrataḥ

Sanskrit only: no published translation is held for this verse.

अयं कुरूणाम् ऋषभः कुन्तीपुत्रो युधिष्ठिरः अस्य कीर्तिः स्थिता लोके सूर्यस्येवोद्यतः प्रभा

ayaṃ kurūṇām ṛṣabhaḥ kuntīputro yudhiṣṭhiraḥ asya kīrtiḥ sthitā loke sūryasyevodyataḥ prabhā

Sanskrit only: no published translation is held for this verse.

संसरन्ति दिशः सर्वा यशसो ऽस्य गभस्तयः उदितस्येव सूर्यस्य तेजसो ऽनु गभस्तयः

saṃsaranti diśaḥ sarvā yaśaso 'sya gabhastayaḥ uditasyeva sūryasya tejaso 'nu gabhastayaḥ

Sanskrit only: no published translation is held for this verse.

एनं दश सहस्राणि कुञ्जराणां तरस्विनाम् अन्वयुः पृष्ठतो राजन् यावद् अध्यावसत् कुरून्

enaṃ daśa sahasrāṇi kuñjarāṇāṃ tarasvinām anvayuḥ pṛṣṭhato rājan yāvad adhyāvasat kurūn

Sanskrit only: no published translation is held for this verse.

त्रिंशद् एनं सहस्राणि रथाः काञ्चनमालिनः सदश्वैर् उपसंपन्नाः पृष्ठतो ऽनुययुः सदा

triṃśad enaṃ sahasrāṇi rathāḥ kāñcanamālinaḥ sadaśvair upasaṃpannāḥ pṛṣṭhato 'nuyayuḥ sadā

Sanskrit only: no published translation is held for this verse.

एनम् अष्टशताः सूताः सुमृष्टमणिकुण्डलाः अस्तुवन् मागधैः सार्धं पुरा शक्रम् इवर्षयः

enam aṣṭaśatāḥ sūtāḥ sumṛṣṭamaṇikuṇḍalāḥ astuvan māgadhaiḥ sārdhaṃ purā śakram ivarṣayaḥ

Sanskrit only: no published translation is held for this verse.

एनं नित्यम् उपासन्त कुरवः किंकरा यथा सर्वे च राजन् राजानो धनेश्वरम् इवामराः

enaṃ nityam upāsanta kuravaḥ kiṃkarā yathā sarve ca rājan rājāno dhaneśvaram ivāmarāḥ

Sanskrit only: no published translation is held for this verse.

एष सर्वान् महीपालान् करम् आहारयत् तदा वैश्यान् इव महाराज विवशान् स्ववशान् अपि

eṣa sarvān mahīpālān karam āhārayat tadā vaiśyān iva mahārāja vivaśān svavaśān api

Sanskrit only: no published translation is held for this verse.

अष्टाशीतिसहस्राणि स्नातकानां महात्मनाम् उपजीवन्ति राजानम् एनं सुचरितव्रतम्

aṣṭāśītisahasrāṇi snātakānāṃ mahātmanām upajīvanti rājānam enaṃ sucaritavratam

Sanskrit only: no published translation is held for this verse.

एष वृद्धान् अनाथांश् च व्यङ्गान् पङ्गूंश् च मानवान् पुत्रवत् पालयाम् आस प्रजा धर्मेण चाभिभो

eṣa vṛddhān anāthāṃś ca vyaṅgān paṅgūṃś ca mānavān putravat pālayām āsa prajā dharmeṇa cābhibho

Sanskrit only: no published translation is held for this verse.

एष धर्मे दमे चैव क्रोधे चापि यतव्रतः महाप्रसादो ब्रह्मण्यः सत्यवादी च पार्थिवः

eṣa dharme dame caiva krodhe cāpi yatavrataḥ mahāprasādo brahmaṇyaḥ satyavādī ca pārthivaḥ

Sanskrit only: no published translation is held for this verse.

श्रीप्रतापेन चैतस्य तप्यते स सुयोधनः सगणः सह कर्णेन सौबलेनापि वा विभुः

śrīpratāpena caitasya tapyate sa suyodhanaḥ sagaṇaḥ saha karṇena saubalenāpi vā vibhuḥ

Sanskrit only: no published translation is held for this verse.

न शक्यन्ते ह्य् अस्य गुणाः प्रसंख्यातुं नरेश्वर एष धर्मपरो नित्यम् आनृशंस्यश् च पाण्डवः

na śakyante hy asya guṇāḥ prasaṃkhyātuṃ nareśvara eṣa dharmaparo nityam ānṛśaṃsyaś ca pāṇḍavaḥ

Sanskrit only: no published translation is held for this verse.

एवंयुक्तो महाराजः पाण्डवः पार्थिवर्षभः कथं नार्हति राजार्हम् आसनं पृथिवीपतिः

evaṃyukto mahārājaḥ pāṇḍavaḥ pārthivarṣabhaḥ kathaṃ nārhati rājārham āsanaṃ pṛthivīpatiḥ

Sanskrit only: no published translation is held for this verse.