Mahābhārata (critical edition) 5.115

गालव उवाच महावीर्यो महीपालः काशीनाम् ईश्वरः प्रभुः दिवोदास इति ख्यातो भैमसेनिर् नराधिपः

gālava uvāca mahāvīryo mahīpālaḥ kāśīnām īśvaraḥ prabhuḥ divodāsa iti khyāto bhaimasenir narādhipaḥ

Sanskrit only: no published translation is held for this verse.

तत्र गच्छावहे भद्रे शनैर् आगच्छ मा शुचः धार्मिकः संयमे युक्तः सत्यश् चैव जनेश्वरः

tatra gacchāvahe bhadre śanair āgaccha mā śucaḥ dhārmikaḥ saṃyame yuktaḥ satyaś caiva janeśvaraḥ

Sanskrit only: no published translation is held for this verse.

नारद उवाच तम् उपागम्य स मुनिर् न्यायतस् तेन सत्कृतः गालवः प्रसवस्यार्थे तं नृपं प्रत्यचोदयत्

nārada uvāca tam upāgamya sa munir nyāyatas tena satkṛtaḥ gālavaḥ prasavasyārthe taṃ nṛpaṃ pratyacodayat

Sanskrit only: no published translation is held for this verse.

दिवोदास उवाच श्रुतम् एतन् मया पूर्वं किम् उक्त्वा विस्तरं द्विज काङ्क्षितो हि मयैषो ऽर्थः श्रुत्वैतद् द्विजसत्तम

divodāsa uvāca śrutam etan mayā pūrvaṃ kim uktvā vistaraṃ dvija kāṅkṣito hi mayaiṣo 'rthaḥ śrutvaitad dvijasattama

Sanskrit only: no published translation is held for this verse.

एतच् च मे बहुमतं यद् उत्सृज्य नराधिपान् माम् एवम् उपयातो ऽसि भावि चैतद् असंशयम्

etac ca me bahumataṃ yad utsṛjya narādhipān mām evam upayāto 'si bhāvi caitad asaṃśayam

Sanskrit only: no published translation is held for this verse.

स एव विभवो ऽस्माकम् अश्वानाम् अपि गालव अहम् अप्य् एकम् एवास्यां जनयिष्यामि पार्थिवम्

sa eva vibhavo 'smākam aśvānām api gālava aham apy ekam evāsyāṃ janayiṣyāmi pārthivam

Sanskrit only: no published translation is held for this verse.

नारद उवाच तथेत्य् उक्त्वा द्विजश्रेष्ठः प्रादात् कन्यां महीपतेः विधिपूर्वं च तां राजा कन्यां प्रतिगृहीतवान्

nārada uvāca tathety uktvā dvijaśreṣṭhaḥ prādāt kanyāṃ mahīpateḥ vidhipūrvaṃ ca tāṃ rājā kanyāṃ pratigṛhītavān

Sanskrit only: no published translation is held for this verse.

रेमे स तस्यां राजर्षिः प्रभावत्यां यथा रविः स्वाहायां च यथा वह्निर् यथा शच्यां स वासवः

reme sa tasyāṃ rājarṣiḥ prabhāvatyāṃ yathā raviḥ svāhāyāṃ ca yathā vahnir yathā śacyāṃ sa vāsavaḥ

Sanskrit only: no published translation is held for this verse.

यथा चन्द्रश् च रोहिण्यां यथा धूमोर्णया यमः वरुणश् च यथा गौर्यां यथा चर्द्ध्यां धनेश्वरः

yathā candraś ca rohiṇyāṃ yathā dhūmorṇayā yamaḥ varuṇaś ca yathā gauryāṃ yathā carddhyāṃ dhaneśvaraḥ

Sanskrit only: no published translation is held for this verse.

यथा नारायणो लक्ष्म्यां जाह्नव्यां च यथोदधिः यथा रुद्रश् च रुद्राण्यां यथा वेद्यां पितामहः

yathā nārāyaṇo lakṣmyāṃ jāhnavyāṃ ca yathodadhiḥ yathā rudraś ca rudrāṇyāṃ yathā vedyāṃ pitāmahaḥ

Sanskrit only: no published translation is held for this verse.

अदृश्यन्त्यां च वासिष्ठो वसिष्ठश् चाक्षमालया च्यवनश् च सुकन्यायां पुलस्त्यः संध्यया यथा

adṛśyantyāṃ ca vāsiṣṭho vasiṣṭhaś cākṣamālayā cyavanaś ca sukanyāyāṃ pulastyaḥ saṃdhyayā yathā

Sanskrit only: no published translation is held for this verse.

अगस्त्यश् चापि वैदर्भ्यां सावित्र्यां सत्यवान् यथा यथा भृगुः पुलोमायाम् अदित्यां कश्यपो यथा

agastyaś cāpi vaidarbhyāṃ sāvitryāṃ satyavān yathā yathā bhṛguḥ pulomāyām adityāṃ kaśyapo yathā

Sanskrit only: no published translation is held for this verse.

रेणुकायां यथार्चीको हैमवत्यां च कौशिकः बृहस्पतिश् च तारायां शुक्रश् च शतपर्वया

reṇukāyāṃ yathārcīko haimavatyāṃ ca kauśikaḥ bṛhaspatiś ca tārāyāṃ śukraś ca śataparvayā

Sanskrit only: no published translation is held for this verse.

यथा भूम्यां भूमिपतिर् उर्वश्यां च पुरूरवाः ऋचीकः सत्यवत्यां च सरस्वत्यां यथा मनुः

yathā bhūmyāṃ bhūmipatir urvaśyāṃ ca purūravāḥ ṛcīkaḥ satyavatyāṃ ca sarasvatyāṃ yathā manuḥ

Sanskrit only: no published translation is held for this verse.

तथा तु रममाणस्य दिवोदासस्य भूपतेः माधवी जनयाम् आस पुत्रम् एकं प्रतर्दनम्

tathā tu ramamāṇasya divodāsasya bhūpateḥ mādhavī janayām āsa putram ekaṃ pratardanam

Sanskrit only: no published translation is held for this verse.

अथाजगाम भगवान् दिवोदासं स गालवः समये समनुप्राप्ते वचनं चेदम् अब्रवीत्

athājagāma bhagavān divodāsaṃ sa gālavaḥ samaye samanuprāpte vacanaṃ cedam abravīt

Sanskrit only: no published translation is held for this verse.

निर्यातयतु मे कन्यां भवांस् तिष्ठन्तु वाजिनः यावद् अन्यत्र गच्छामि शुल्कार्थं पृथिवीपते

niryātayatu me kanyāṃ bhavāṃs tiṣṭhantu vājinaḥ yāvad anyatra gacchāmi śulkārthaṃ pṛthivīpate

Sanskrit only: no published translation is held for this verse.

दिवोदासो ऽथ धर्मात्मा समये गालवस्य ताम् कन्यां निर्यातयाम् आस स्थितः सत्ये महीपतिः

divodāso 'tha dharmātmā samaye gālavasya tām kanyāṃ niryātayām āsa sthitaḥ satye mahīpatiḥ

Sanskrit only: no published translation is held for this verse.