Library·Mahābhārata (critical edition)·5·5.124
वैशंपायन उवाच धृतराष्ट्रवचः श्रुत्वा भीष्मद्रोणौ समर्थ्य तौ दुर्योधनम् इदं वाक्यम् ऊचतुः शासनातिगम्
vaiśaṃpāyana uvāca dhṛtarāṣṭravacaḥ śrutvā bhīṣmadroṇau samarthya tau duryodhanam idaṃ vākyam ūcatuḥ śāsanātigam
Sanskrit only: no published translation is held for this verse.
यावत् कृष्णाव् असंनद्धौ यावत् तिष्ठति गाण्डिवम् यावद् धौम्यो न सेनाग्नौ जुहोतीह द्विषद्बलम्
yāvat kṛṣṇāv asaṃnaddhau yāvat tiṣṭhati gāṇḍivam yāvad dhaumyo na senāgnau juhotīha dviṣadbalam
Sanskrit only: no published translation is held for this verse.
यावन् न प्रेक्षते क्रुद्धः सेनां तव युधिष्ठिरः ह्रीनिषेधो महेष्वासस् तावच् छाम्यतु वैशसम्
yāvan na prekṣate kruddhaḥ senāṃ tava yudhiṣṭhiraḥ hrīniṣedho maheṣvāsas tāvac chāmyatu vaiśasam
Sanskrit only: no published translation is held for this verse.
यावन् न दृष्यते पार्थः स्वेष्व् अनीकेष्व् अवस्थितः भीमसेनो महेष्वासस् तावच् छाम्यतु वैशसम्
yāvan na dṛṣyate pārthaḥ sveṣv anīkeṣv avasthitaḥ bhīmaseno maheṣvāsas tāvac chāmyatu vaiśasam
Sanskrit only: no published translation is held for this verse.
यावन् न चरते मार्गान् पृतनाम् अभिहर्षयन् यावन् न शातयत्य् आजौ शिरांसि गजयोधिनाम्
yāvan na carate mārgān pṛtanām abhiharṣayan yāvan na śātayaty ājau śirāṃsi gajayodhinām
Sanskrit only: no published translation is held for this verse.
गदया वीरघातिन्या फलानीव वनस्पतेः कालेन परिपक्वानि तावच् छाम्यतु वैशसम्
gadayā vīraghātinyā phalānīva vanaspateḥ kālena paripakvāni tāvac chāmyatu vaiśasam
Sanskrit only: no published translation is held for this verse.
नकुलः सहदेवश् च धृष्टद्युम्नश् च पार्षतः विराटश् च शिखण्डी च शैशुपालिश् च दंशिताः
nakulaḥ sahadevaś ca dhṛṣṭadyumnaś ca pārṣataḥ virāṭaś ca śikhaṇḍī ca śaiśupāliś ca daṃśitāḥ
Sanskrit only: no published translation is held for this verse.
यावन् न प्रविशन्त्य् एते नक्रा इव महार्णवम् कृतास्त्राः क्षिप्रम् अस्यन्तस् तावच् छाम्यतु वैशसम्
yāvan na praviśanty ete nakrā iva mahārṇavam kṛtāstrāḥ kṣipram asyantas tāvac chāmyatu vaiśasam
Sanskrit only: no published translation is held for this verse.
यावन् न सुकुमारेषु शरीरेषु महीक्षिताम् गार्ध्रपत्राः पतन्त्य् उग्रास् तावच् छाम्यतु वैशसम्
yāvan na sukumāreṣu śarīreṣu mahīkṣitām gārdhrapatrāḥ patanty ugrās tāvac chāmyatu vaiśasam
Sanskrit only: no published translation is held for this verse.
चन्दनागरुदिग्धेषु हारनिष्कधरेषु च नोरःसु यावद् योधानां महेष्वासैर् महेषवः
candanāgarudigdheṣu hāraniṣkadhareṣu ca noraḥsu yāvad yodhānāṃ maheṣvāsair maheṣavaḥ
Sanskrit only: no published translation is held for this verse.
कृतास्त्रैः क्षिप्रम् अस्यद्भिर् दूरपातिभिर् आयसाः अभिलक्ष्यैर् निपात्यन्ते तावच् छाम्यतु वैशसम्
kṛtāstraiḥ kṣipram asyadbhir dūrapātibhir āyasāḥ abhilakṣyair nipātyante tāvac chāmyatu vaiśasam
Sanskrit only: no published translation is held for this verse.
अभिवादयमानं त्वां शिरसा राजकुञ्जरः पाणिभ्यां प्रतिगृह्णातु धर्मराजो युधिष्ठिरः
abhivādayamānaṃ tvāṃ śirasā rājakuñjaraḥ pāṇibhyāṃ pratigṛhṇātu dharmarājo yudhiṣṭhiraḥ
Sanskrit only: no published translation is held for this verse.
ध्वजाङ्कुशपताकाङ्कं दक्षिणं ते सुदक्षिणः स्कन्धे निक्षिपतां बाहुं शान्तये भरतर्षभ
dhvajāṅkuśapatākāṅkaṃ dakṣiṇaṃ te sudakṣiṇaḥ skandhe nikṣipatāṃ bāhuṃ śāntaye bharatarṣabha
Sanskrit only: no published translation is held for this verse.
रत्नौषधिसमेतेन रत्नाङ्गुलितलेन च उपविष्टस्य पृष्ठं ते पाणिना परिमार्जतु
ratnauṣadhisametena ratnāṅgulitalena ca upaviṣṭasya pṛṣṭhaṃ te pāṇinā parimārjatu
Sanskrit only: no published translation is held for this verse.
शालस्कन्धो महाबाहुस् त्वां स्वजानो वृकोदरः साम्नाभिवदतां चापि शान्तये भरतर्षभ
śālaskandho mahābāhus tvāṃ svajāno vṛkodaraḥ sāmnābhivadatāṃ cāpi śāntaye bharatarṣabha
Sanskrit only: no published translation is held for this verse.
अर्जुनेन यमाभ्यां च त्रिभिस् तैर् अभिवादितः मूर्ध्नि तान् समुपाघ्राय प्रेम्णाभिवद पार्थिव
arjunena yamābhyāṃ ca tribhis tair abhivāditaḥ mūrdhni tān samupāghrāya premṇābhivada pārthiva
Sanskrit only: no published translation is held for this verse.
दृष्ट्वा त्वां पाण्डवैर् वीरैर् भ्रातृभिः सह संगतम् यावद् आनन्दजाश्रूणि प्रमुञ्चन्तु नराधिपाः
dṛṣṭvā tvāṃ pāṇḍavair vīrair bhrātṛbhiḥ saha saṃgatam yāvad ānandajāśrūṇi pramuñcantu narādhipāḥ
Sanskrit only: no published translation is held for this verse.
घुष्यतां राजधानीषु सर्वसंपन् महीक्षिताम् पृथिवी भ्रातृभावेन भुज्यतां विज्वरो भव
ghuṣyatāṃ rājadhānīṣu sarvasaṃpan mahīkṣitām pṛthivī bhrātṛbhāvena bhujyatāṃ vijvaro bhava
Sanskrit only: no published translation is held for this verse.