Library·Mahābhārata (critical edition)·5·5.195
वैशंपायन उवाच एतच् छ्रुत्वा तु कौन्तेयः सर्वान् भ्रातॄन् उपह्वरे आहूय भरतश्रेष्ठ इदं वचनम् अब्रवीत्
vaiśaṃpāyana uvāca etac chrutvā tu kaunteyaḥ sarvān bhrātṝn upahvare āhūya bharataśreṣṭha idaṃ vacanam abravīt
Sanskrit only: no published translation is held for this verse.
धार्तराष्ट्रस्य सैन्येषु ये चारपुरुषा मम ते प्रवृत्तिं प्रयच्छन्ति ममेमां व्युषितां निशाम्
dhārtarāṣṭrasya sainyeṣu ye cārapuruṣā mama te pravṛttiṃ prayacchanti mamemāṃ vyuṣitāṃ niśām
Sanskrit only: no published translation is held for this verse.
दुर्योधनः किलापृच्छद् आपगेयं महाव्रतम् केन कालेन पाण्डूनां हन्याः सैन्यम् इति प्रभो
duryodhanaḥ kilāpṛcchad āpageyaṃ mahāvratam kena kālena pāṇḍūnāṃ hanyāḥ sainyam iti prabho
Sanskrit only: no published translation is held for this verse.
मासेनेति च तेनोक्तो धार्तराष्ट्रः सुदुर्मतिः तावता चापि कालेन द्रोणो ऽपि प्रत्यजानत
māseneti ca tenokto dhārtarāṣṭraḥ sudurmatiḥ tāvatā cāpi kālena droṇo 'pi pratyajānata
Sanskrit only: no published translation is held for this verse.
गौतमो द्विगुणं कालम् उक्तवान् इति नः श्रुतम् द्रौणिस् तु दशरात्रेण प्रतिजज्ञे महास्त्रवित्
gautamo dviguṇaṃ kālam uktavān iti naḥ śrutam drauṇis tu daśarātreṇa pratijajñe mahāstravit
Sanskrit only: no published translation is held for this verse.
तथा दिव्यास्त्रवित् कर्णः संपृष्टः कुरुसंसदि पञ्चभिर् दिवसैर् हन्तुं स सैन्यं प्रतिजज्ञिवान्
tathā divyāstravit karṇaḥ saṃpṛṣṭaḥ kurusaṃsadi pañcabhir divasair hantuṃ sa sainyaṃ pratijajñivān
Sanskrit only: no published translation is held for this verse.
तस्माद् अहम् अपीच्छामि श्रोतुम् अर्जुन ते वचः कालेन कियता शत्रून् क्षपयेर् इति संयुगे
tasmād aham apīcchāmi śrotum arjuna te vacaḥ kālena kiyatā śatrūn kṣapayer iti saṃyuge
Sanskrit only: no published translation is held for this verse.
एवम् उक्तो गुडाकेशः पार्थिवेन धनंजयः वासुदेवम् अवेक्ष्येदं वचनं प्रत्यभाषत
evam ukto guḍākeśaḥ pārthivena dhanaṃjayaḥ vāsudevam avekṣyedaṃ vacanaṃ pratyabhāṣata
Sanskrit only: no published translation is held for this verse.
सर्व एते महात्मानः कृतास्त्राश् चित्रयोधिनः असंशयं महाराज हन्युर् एव बलं तव
sarva ete mahātmānaḥ kṛtāstrāś citrayodhinaḥ asaṃśayaṃ mahārāja hanyur eva balaṃ tava
Sanskrit only: no published translation is held for this verse.
अपैतु ते मनस्तापो यथासत्यं ब्रवीम्य् अहम् हन्याम् एकरथेनाहं वासुदेवसहायवान्
apaitu te manastāpo yathāsatyaṃ bravīmy aham hanyām ekarathenāhaṃ vāsudevasahāyavān
Sanskrit only: no published translation is held for this verse.
सामरान् अपि लोकांस् त्रीन् सहस्थावरजङ्गमान् भूतं भव्यं भविष्यच् च निमेषाद् इति मे मतिः
sāmarān api lokāṃs trīn sahasthāvarajaṅgamān bhūtaṃ bhavyaṃ bhaviṣyac ca nimeṣād iti me matiḥ
Sanskrit only: no published translation is held for this verse.
यत् तद् घोरं पशुपतिः प्रादाद् अस्त्रं महन् मम कैराते द्वन्द्वयुद्धे वै तद् इदं मयि वर्तते
yat tad ghoraṃ paśupatiḥ prādād astraṃ mahan mama kairāte dvandvayuddhe vai tad idaṃ mayi vartate
Sanskrit only: no published translation is held for this verse.
यद् युगान्ते पशुपतिः सर्वभूतानि संहरन् प्रयुङ्क्ते पुरुषव्याघ्र तद् इदं मयि वर्तते
yad yugānte paśupatiḥ sarvabhūtāni saṃharan prayuṅkte puruṣavyāghra tad idaṃ mayi vartate
Sanskrit only: no published translation is held for this verse.
तन् न जानाति गाङ्गेयो न द्रोणो न च गौतमः न च द्रोणसुतो राजन् कुत एव तु सूतजः
tan na jānāti gāṅgeyo na droṇo na ca gautamaḥ na ca droṇasuto rājan kuta eva tu sūtajaḥ
Sanskrit only: no published translation is held for this verse.
न तु युक्तं रणे हन्तुं दिव्यैर् अस्त्रैः पृथग्जनम् आर्जवेनैव युद्धेन विजेष्यामो वयं परान्
na tu yuktaṃ raṇe hantuṃ divyair astraiḥ pṛthagjanam ārjavenaiva yuddhena vijeṣyāmo vayaṃ parān
Sanskrit only: no published translation is held for this verse.
तथेमे पुरुषव्याघ्राः सहायास् तव पार्थिव सर्वे दिव्यास्त्रविदुषः सर्वे युद्धाभिनन्दिनः
tatheme puruṣavyāghrāḥ sahāyās tava pārthiva sarve divyāstraviduṣaḥ sarve yuddhābhinandinaḥ
Sanskrit only: no published translation is held for this verse.
वेदान्तावभृथस्नाताः सर्व एते ऽपराजिताः निहन्युः समरे सेनां देवानाम् अपि पाण्डव
vedāntāvabhṛthasnātāḥ sarva ete 'parājitāḥ nihanyuḥ samare senāṃ devānām api pāṇḍava
Sanskrit only: no published translation is held for this verse.
शिखण्डी युयुधानश् च धृष्टद्युम्नश् च पार्षतः भीमसेनो यमौ चोभौ युधामन्यूत्तमौजसौ
śikhaṇḍī yuyudhānaś ca dhṛṣṭadyumnaś ca pārṣataḥ bhīmaseno yamau cobhau yudhāmanyūttamaujasau
Sanskrit only: no published translation is held for this verse.
विराटद्रुपदौ चोभौ भीष्मद्रोणसमौ युधि स्वयं चापि समर्थो ऽसि त्रैलोक्योत्सादने अपि
virāṭadrupadau cobhau bhīṣmadroṇasamau yudhi svayaṃ cāpi samartho 'si trailokyotsādane api
Sanskrit only: no published translation is held for this verse.
क्रोधाद् यं पुरुषं पश्येस् त्वं वासवसमद्युते क्षिप्रं न स भवेद् व्यक्तम् इति त्वां वेद्मि कौरव
krodhād yaṃ puruṣaṃ paśyes tvaṃ vāsavasamadyute kṣipraṃ na sa bhaved vyaktam iti tvāṃ vedmi kaurava
Sanskrit only: no published translation is held for this verse.