Mahābhārata (critical edition) 5.2

बलदेव उवाच श्रुतं भवद्भिर् गदपूर्वजस्य; वाक्यं यथा धर्मवद् अर्थवच् च अजातशत्रोश् च हितं हितं च; दुर्योधनस्यापि तथैव राज्ञः

baladeva uvāca śrutaṃ bhavadbhir gadapūrvajasya; vākyaṃ yathā dharmavad arthavac ca ajātaśatroś ca hitaṃ hitaṃ ca; duryodhanasyāpi tathaiva rājñaḥ

Sanskrit only: no published translation is held for this verse.

अर्धं हि राज्यस्य विसृज्य वीराः; कुन्तीसुतास् तस्य कृते यतन्ते प्रदाय चार्धं धृतराष्ट्रपुत्रः; सुखी सहास्माभिर् अतीव मोदेत्

ardhaṃ hi rājyasya visṛjya vīrāḥ; kuntīsutās tasya kṛte yatante pradāya cārdhaṃ dhṛtarāṣṭraputraḥ; sukhī sahāsmābhir atīva modet

Sanskrit only: no published translation is held for this verse.

लब्ध्वा हि राज्यं पुरुषप्रवीराः; सम्यक् प्रवृत्तेषु परेषु चैव ध्रुवं प्रशान्ताः सुखम् आविशेयुस्; तेषां प्रशान्तिश् च हितं प्रजानाम्

labdhvā hi rājyaṃ puruṣapravīrāḥ; samyak pravṛtteṣu pareṣu caiva dhruvaṃ praśāntāḥ sukham āviśeyus; teṣāṃ praśāntiś ca hitaṃ prajānām

Sanskrit only: no published translation is held for this verse.

दुर्योधनस्यापि मतं च वेत्तुं; वक्तुं च वाक्यानि युधिष्ठिरस्य प्रियं मम स्याद् यदि तत्र कश् चिद्; व्रजेच् छमार्थं कुरुपाण्डवानाम्

duryodhanasyāpi mataṃ ca vettuṃ; vaktuṃ ca vākyāni yudhiṣṭhirasya priyaṃ mama syād yadi tatra kaś cid; vrajec chamārthaṃ kurupāṇḍavānām

Sanskrit only: no published translation is held for this verse.

स भीष्मम् आमन्त्र्य कुरुप्रवीरं; वैचित्रवीर्यं च महानुभावम् द्रोणं सपुत्रं विदुरं कृपं च; गान्धारराजं च ससूतपुत्रम्

sa bhīṣmam āmantrya kurupravīraṃ; vaicitravīryaṃ ca mahānubhāvam droṇaṃ saputraṃ viduraṃ kṛpaṃ ca; gāndhārarājaṃ ca sasūtaputram

Sanskrit only: no published translation is held for this verse.

सर्वे च ये ऽन्ये धृतराष्ट्रपुत्रा; बलप्रधाना निगमप्रधानाः स्थिताश् च धर्मेषु यथा स्वकेषु; लोकप्रवीराः श्रुतकालवृद्धाः

sarve ca ye 'nye dhṛtarāṣṭraputrā; balapradhānā nigamapradhānāḥ sthitāś ca dharmeṣu yathā svakeṣu; lokapravīrāḥ śrutakālavṛddhāḥ

Sanskrit only: no published translation is held for this verse.

एतेषु सर्वेषु समागतेषु; पौरेषु वृद्धेषु च संगतेषु ब्रवीतु वाक्यं प्रणिपातयुक्तं; कुन्तीसुतस्यार्थकरं यथा स्यात्

eteṣu sarveṣu samāgateṣu; paureṣu vṛddheṣu ca saṃgateṣu bravītu vākyaṃ praṇipātayuktaṃ; kuntīsutasyārthakaraṃ yathā syāt

Sanskrit only: no published translation is held for this verse.

सर्वास्व् अवस्थासु च ते न कौट्याद्; ग्रस्तो हि सो ऽर्थो बलम् आश्रितैस् तैः प्रियाभ्युपेतस्य युधिष्ठिरस्य; द्यूते प्रमत्तस्य हृतं च राज्यम्

sarvāsv avasthāsu ca te na kauṭyād; grasto hi so 'rtho balam āśritais taiḥ priyābhyupetasya yudhiṣṭhirasya; dyūte pramattasya hṛtaṃ ca rājyam

Sanskrit only: no published translation is held for this verse.

निवार्यमाणश् च कुरुप्रवीरैः; सर्वैः सुहृद्भिर् ह्य् अयम् अप्य् अतज्ज्ञः गान्धारराजस्य सुतं मताक्षं; समाह्वयेद् देवितुम् आजमीढः

nivāryamāṇaś ca kurupravīraiḥ; sarvaiḥ suhṛdbhir hy ayam apy atajjñaḥ gāndhārarājasya sutaṃ matākṣaṃ; samāhvayed devitum ājamīḍhaḥ

Sanskrit only: no published translation is held for this verse.

दुरोदरास् तत्र सहस्रशो ऽन्ये; युधिष्ठिरो यान् विषहेत जेतुम् उत्सृज्य तान् सौबलम् एव चायं; समाह्वयत् तेन जितो ऽक्षवत्याम्

durodarās tatra sahasraśo 'nye; yudhiṣṭhiro yān viṣaheta jetum utsṛjya tān saubalam eva cāyaṃ; samāhvayat tena jito 'kṣavatyām

Sanskrit only: no published translation is held for this verse.

स दीव्यमानः प्रतिदेवनेन; अक्षेषु नित्यं सुपराङ्मुखेषु संरम्भमाणो विजितः प्रसह्य; तत्रापराधः शकुनेर् न कश् चित्

sa dīvyamānaḥ pratidevanena; akṣeṣu nityaṃ suparāṅmukheṣu saṃrambhamāṇo vijitaḥ prasahya; tatrāparādhaḥ śakuner na kaś cit

Sanskrit only: no published translation is held for this verse.

तस्मात् प्रणम्यैव वचो ब्रवीतु; वैचित्रवीर्यं बहुसामयुक्तम् तथा हि शक्यो धृतराष्ट्रपुत्रः; स्वार्थे नियोक्तुं पुरुषेण तेन

tasmāt praṇamyaiva vaco bravītu; vaicitravīryaṃ bahusāmayuktam tathā hi śakyo dhṛtarāṣṭraputraḥ; svārthe niyoktuṃ puruṣeṇa tena

Sanskrit only: no published translation is held for this verse.

वैशंपायन उवाच एवं ब्रुवत्य् एव मधुप्रवीरे; शिनिप्रवीरः सहसोत्पपात तच् चापि वाक्यं परिनिन्द्य तस्य; समाददे वाक्यम् इदं समन्युः

vaiśaṃpāyana uvāca evaṃ bruvaty eva madhupravīre; śinipravīraḥ sahasotpapāta tac cāpi vākyaṃ parinindya tasya; samādade vākyam idaṃ samanyuḥ

Sanskrit only: no published translation is held for this verse.