Mahābhārata (critical edition) 5.25

युधिष्ठिर उवाच समागताः पाण्डवाः सृञ्जयाश् च; जनार्दनो युयुधानो विराटः यत् ते वाक्यं धृतराष्ट्रानुशिष्टं; गावल्गणे ब्रूहि तत् सूतपुत्र

yudhiṣṭhira uvāca samāgatāḥ pāṇḍavāḥ sṛñjayāś ca; janārdano yuyudhāno virāṭaḥ yat te vākyaṃ dhṛtarāṣṭrānuśiṣṭaṃ; gāvalgaṇe brūhi tat sūtaputra

Sanskrit only: no published translation is held for this verse.

संजय उवाच अजातशत्रुं च वृकोदरं च; धनंजयं माद्रवतीसुतौ च आमन्त्रये वासुदेवं च शौरिं; युयुधानं चेकितानं विराटम्

saṃjaya uvāca ajātaśatruṃ ca vṛkodaraṃ ca; dhanaṃjayaṃ mādravatīsutau ca āmantraye vāsudevaṃ ca śauriṃ; yuyudhānaṃ cekitānaṃ virāṭam

Sanskrit only: no published translation is held for this verse.

पाञ्चालानाम् अधिपं चैव वृद्धं; धृष्टद्युम्नं पार्षतं याज्ञसेनिम् सर्वे वाचं शृणुतेमां मदीयां; वक्ष्यामि यां भूतिम् इच्छन् कुरूणाम्

pāñcālānām adhipaṃ caiva vṛddhaṃ; dhṛṣṭadyumnaṃ pārṣataṃ yājñasenim sarve vācaṃ śṛṇutemāṃ madīyāṃ; vakṣyāmi yāṃ bhūtim icchan kurūṇām

Sanskrit only: no published translation is held for this verse.

शमं राजा धृतराष्ट्रो ऽभिनन्दन्न्; अयोजयत् त्वरमाणो रथं मे सभ्रातृपुत्रस्वजनस्य राज्ञस्; तद् रोचतां पाण्डवानां शमो ऽस्तु

śamaṃ rājā dhṛtarāṣṭro 'bhinandann; ayojayat tvaramāṇo rathaṃ me sabhrātṛputrasvajanasya rājñas; tad rocatāṃ pāṇḍavānāṃ śamo 'stu

Sanskrit only: no published translation is held for this verse.

सर्वैर् धर्मैः समुपेताः स्थ पार्थाः; प्रस्थानेन मार्दवेनार्जवेन जाताः कुले अनृशंसा वदान्या; ह्रीनिषेधाः कर्मणां निश्चयज्ञाः

sarvair dharmaiḥ samupetāḥ stha pārthāḥ; prasthānena mārdavenārjavena jātāḥ kule anṛśaṃsā vadānyā; hrīniṣedhāḥ karmaṇāṃ niścayajñāḥ

Sanskrit only: no published translation is held for this verse.

न युज्यते कर्म युष्मासु हीनं; सत्त्वं हि वस् तादृशं भीमसेनाः उद्भासते ह्य् अञ्जनबिन्दुवत् तच्; छुक्ले वस्त्रे यद् भवेत् किल्बिषं वः

na yujyate karma yuṣmāsu hīnaṃ; sattvaṃ hi vas tādṛśaṃ bhīmasenāḥ udbhāsate hy añjanabinduvat tac; chukle vastre yad bhavet kilbiṣaṃ vaḥ

Sanskrit only: no published translation is held for this verse.

सर्वक्षयो दृश्यते यत्र कृत्स्नः; पापोदयो निरयो ऽभावसंस्थः कस् तत् कुर्याज् जातु कर्म प्रजानन्; पराजयो यत्र समो जयश् च

sarvakṣayo dṛśyate yatra kṛtsnaḥ; pāpodayo nirayo 'bhāvasaṃsthaḥ kas tat kuryāj jātu karma prajānan; parājayo yatra samo jayaś ca

Sanskrit only: no published translation is held for this verse.

ते वै धन्या यैः कृतं ज्ञातिकार्यं; ये वः पुत्राः सुहृदो बान्धवाश् च उपक्रुष्टं जीवितं संत्यजेयुस्; ततः कुरूणां नियतो वै भवः स्यात्

te vai dhanyā yaiḥ kṛtaṃ jñātikāryaṃ; ye vaḥ putrāḥ suhṛdo bāndhavāś ca upakruṣṭaṃ jīvitaṃ saṃtyajeyus; tataḥ kurūṇāṃ niyato vai bhavaḥ syāt

Sanskrit only: no published translation is held for this verse.

ते चेत् कुरून् अनुशास्य स्थ पार्था; निनीय सर्वान् द्विषतो निगृह्य समं वस् तज् जीवितं मृत्युना स्याद्; यज् जीवध्वं ज्ञातिवधे न साधु

te cet kurūn anuśāsya stha pārthā; ninīya sarvān dviṣato nigṛhya samaṃ vas taj jīvitaṃ mṛtyunā syād; yaj jīvadhvaṃ jñātivadhe na sādhu

Sanskrit only: no published translation is held for this verse.

को ह्य् एव युष्मान् सह केशवेन; सचेकितानान् पार्षतबाहुगुप्तान् ससात्यकीन् विषहेत प्रजेतुं; लब्ध्वापि देवान् सचिवान् सहेन्द्रान्

ko hy eva yuṣmān saha keśavena; sacekitānān pārṣatabāhuguptān sasātyakīn viṣaheta prajetuṃ; labdhvāpi devān sacivān sahendrān

Sanskrit only: no published translation is held for this verse.

को वा कुरून् द्रोणभीष्माभिगुप्तान्; अश्वत्थाम्ना शल्यकृपादिभिश् च रणे प्रसोढुं विषहेत राजन्; राधेयगुप्तान् सह भूमिपालैः

ko vā kurūn droṇabhīṣmābhiguptān; aśvatthāmnā śalyakṛpādibhiś ca raṇe prasoḍhuṃ viṣaheta rājan; rādheyaguptān saha bhūmipālaiḥ

Sanskrit only: no published translation is held for this verse.

महद् बलं धार्तराष्ट्रस्य राज्ञः; को वै शक्तो हन्तुम् अक्षीयमाणः सो ऽहं जये चैव पराजये च; निःश्रेयसं नाधिगच्छामि किं चित्

mahad balaṃ dhārtarāṣṭrasya rājñaḥ; ko vai śakto hantum akṣīyamāṇaḥ so 'haṃ jaye caiva parājaye ca; niḥśreyasaṃ nādhigacchāmi kiṃ cit

Sanskrit only: no published translation is held for this verse.

कथं हि नीचा इव दौष्कुलेया; निर्धर्मार्थं कर्म कुर्युश् च पार्थाः सो ऽहं प्रसाद्य प्रणतो वासुदेवं; पाञ्चालानाम् अधिपं चैव वृद्धम्

kathaṃ hi nīcā iva dauṣkuleyā; nirdharmārthaṃ karma kuryuś ca pārthāḥ so 'haṃ prasādya praṇato vāsudevaṃ; pāñcālānām adhipaṃ caiva vṛddham

Sanskrit only: no published translation is held for this verse.

कृताञ्जलिः शरणं वः प्रपद्ये; कथं स्वस्ति स्यात् कुरुसृञ्जयानाम् न ह्य् एव ते वचनं वासुदेवो; धनंजयो वा जातु किं चिन् न कुर्यात्

kṛtāñjaliḥ śaraṇaṃ vaḥ prapadye; kathaṃ svasti syāt kurusṛñjayānām na hy eva te vacanaṃ vāsudevo; dhanaṃjayo vā jātu kiṃ cin na kuryāt

Sanskrit only: no published translation is held for this verse.

प्राणान् आदौ याच्यमानः कुतो ऽन्यद्; एतद् विद्वन् साधनार्थं ब्रवीमि एतद् राज्ञो भीष्मपुरोगमस्य; मतं यद् वः शान्तिर् इहोत्तमा स्यात्

prāṇān ādau yācyamānaḥ kuto 'nyad; etad vidvan sādhanārthaṃ bravīmi etad rājño bhīṣmapurogamasya; mataṃ yad vaḥ śāntir ihottamā syāt

Sanskrit only: no published translation is held for this verse.