Library·Mahābhārata (critical edition)·5·5.52
धृतराष्ट्र उवाच यथैव पाण्डवाः सर्वे पराक्रान्ता जिगीषवः तथैवाभिसरास् तेषां त्यक्तात्मानो जये धृताः
dhṛtarāṣṭra uvāca yathaiva pāṇḍavāḥ sarve parākrāntā jigīṣavaḥ tathaivābhisarās teṣāṃ tyaktātmāno jaye dhṛtāḥ
Sanskrit only: no published translation is held for this verse.
त्वम् एव हि पराक्रान्तान् आचक्षीथाः परान् मम पाञ्चालान् केकयान् मत्स्यान् मागधान् वत्सभूमिपान्
tvam eva hi parākrāntān ācakṣīthāḥ parān mama pāñcālān kekayān matsyān māgadhān vatsabhūmipān
Sanskrit only: no published translation is held for this verse.
यश् च सेन्द्रान् इमांल् लोकान् इच्छन् कुर्याद् वशे बली स श्रेष्ठो जगतः कृष्णः पाण्डवानां जये धृतः
yaś ca sendrān imāṃl lokān icchan kuryād vaśe balī sa śreṣṭho jagataḥ kṛṣṇaḥ pāṇḍavānāṃ jaye dhṛtaḥ
Sanskrit only: no published translation is held for this verse.
समस्ताम् अर्जुनाद् विद्यां सात्यकिः क्षिप्रम् आप्तवान् शैनेयः समरे स्थाता बीजवत् प्रवपञ् शरान्
samastām arjunād vidyāṃ sātyakiḥ kṣipram āptavān śaineyaḥ samare sthātā bījavat pravapañ śarān
Sanskrit only: no published translation is held for this verse.
धृष्टद्युम्नश् च पाञ्चाल्यः क्रूरकर्मा महारथः मामकेषु रणं कर्ता बलेषु परमास्त्रवित्
dhṛṣṭadyumnaś ca pāñcālyaḥ krūrakarmā mahārathaḥ māmakeṣu raṇaṃ kartā baleṣu paramāstravit
Sanskrit only: no published translation is held for this verse.
युधिष्ठिरस्य च क्रोधाद् अर्जुनस्य च विक्रमात् यमाभ्यां भीमसेनाच् च भयं मे तात जायते
yudhiṣṭhirasya ca krodhād arjunasya ca vikramāt yamābhyāṃ bhīmasenāc ca bhayaṃ me tāta jāyate
Sanskrit only: no published translation is held for this verse.
अमानुषं मनुष्येन्द्रैर् जालं विततम् अन्तरा मम सेनां हनिष्यन्ति ततः क्रोशामि संजय
amānuṣaṃ manuṣyendrair jālaṃ vitatam antarā mama senāṃ haniṣyanti tataḥ krośāmi saṃjaya
Sanskrit only: no published translation is held for this verse.
दर्शनीयो मनस्वी च लक्ष्मीवान् ब्रह्मवर्चसी मेधावी सुकृतप्रज्ञो धर्मात्मा पाण्डुनन्दनः
darśanīyo manasvī ca lakṣmīvān brahmavarcasī medhāvī sukṛtaprajño dharmātmā pāṇḍunandanaḥ
Sanskrit only: no published translation is held for this verse.
मित्रामात्यैः सुसंपन्नः संपन्नो योज्ययोजकैः भ्रातृभिः श्वशुरैः पुत्रैर् उपपन्नो महारथैः
mitrāmātyaiḥ susaṃpannaḥ saṃpanno yojyayojakaiḥ bhrātṛbhiḥ śvaśuraiḥ putrair upapanno mahārathaiḥ
Sanskrit only: no published translation is held for this verse.
धृत्या च पुरुषव्याघ्रो नैभृत्येन च पाण्डवः अनृशंसो वदान्यश् च ह्रीमान् सत्यपराक्रमः
dhṛtyā ca puruṣavyāghro naibhṛtyena ca pāṇḍavaḥ anṛśaṃso vadānyaś ca hrīmān satyaparākramaḥ
Sanskrit only: no published translation is held for this verse.
बहुश्रुतः कृतात्मा च वृद्धसेवी जितेन्द्रियः तं सर्वगुणसंपन्नं समिद्धम् इव पावकम्
bahuśrutaḥ kṛtātmā ca vṛddhasevī jitendriyaḥ taṃ sarvaguṇasaṃpannaṃ samiddham iva pāvakam
Sanskrit only: no published translation is held for this verse.
तपन्तम् इव को मन्दः पतिष्यति पतंगवत् पाण्डवाग्निम् अनावार्यं मुमूर्षुर् मूढचेतनः
tapantam iva ko mandaḥ patiṣyati pataṃgavat pāṇḍavāgnim anāvāryaṃ mumūrṣur mūḍhacetanaḥ
Sanskrit only: no published translation is held for this verse.
तनुर् उच्चः शिखी राजा शुद्धजाम्बूनदप्रभः मन्दानां मम पुत्राणां युद्धेनान्तं करिष्यति
tanur uccaḥ śikhī rājā śuddhajāmbūnadaprabhaḥ mandānāṃ mama putrāṇāṃ yuddhenāntaṃ kariṣyati
Sanskrit only: no published translation is held for this verse.
तैर् अयुद्धं साधु मन्ये कुरवस् तन् निबोधत युद्धे विनाशः कृत्स्नस्य कुलस्य भविता ध्रुवम्
tair ayuddhaṃ sādhu manye kuravas tan nibodhata yuddhe vināśaḥ kṛtsnasya kulasya bhavitā dhruvam
Sanskrit only: no published translation is held for this verse.
एषा मे परमा शान्तिर् यया शाम्यति मे मनः यदि त्व् अयुद्धम् इष्टं वो वयं शान्त्यै यतामहे
eṣā me paramā śāntir yayā śāmyati me manaḥ yadi tv ayuddham iṣṭaṃ vo vayaṃ śāntyai yatāmahe
Sanskrit only: no published translation is held for this verse.
न तु नः शिक्षमाणानाम् उपेक्षेत युधिष्ठिरः जुगुप्सति ह्य् अधर्मेण माम् एवोद्दिश्य कारणम्
na tu naḥ śikṣamāṇānām upekṣeta yudhiṣṭhiraḥ jugupsati hy adharmeṇa mām evoddiśya kāraṇam
Sanskrit only: no published translation is held for this verse.