Library·Mahābhārata (critical edition)·5·5.69

Mahābhārata (critical edition) 5.69

MBh 5.69.1

धृतराष्ट्र उवाच चक्षुष्मतां वै स्पृहयामि संजय; द्रक्ष्यन्ति ये वासुदेवं समीपे विभ्राजमानं वपुषा परेण; प्रकाशयन्तं प्रदिशो दिशश् च

dhṛtarāṣṭra uvāca cakṣuṣmatāṃ vai spṛhayāmi saṃjaya; drakṣyanti ye vāsudevaṃ samīpe vibhrājamānaṃ vapuṣā pareṇa; prakāśayantaṃ pradiśo diśaś ca

Sanskrit only: no published translation is held for this verse.

MBh 5.69.2

ईरयन्तं भारतीं भारतानाम्; अभ्यर्चनीयां शंकरीं सृञ्जयानाम् बुभूषद्भिर् ग्रहणीयाम् अनिन्द्यां; परासूनाम् अग्रहणीयरूपाम्

īrayantaṃ bhāratīṃ bhāratānām; abhyarcanīyāṃ śaṃkarīṃ sṛñjayānām bubhūṣadbhir grahaṇīyām anindyāṃ; parāsūnām agrahaṇīyarūpām

Sanskrit only: no published translation is held for this verse.

MBh 5.69.3

समुद्यन्तं सात्वतम् एकवीरं; प्रणेतारम् ऋषभं यादवानाम् निहन्तारं क्षोभणं शात्रवाणां; मुष्णन्तं च द्विषतां वै यशांसि

samudyantaṃ sātvatam ekavīraṃ; praṇetāram ṛṣabhaṃ yādavānām nihantāraṃ kṣobhaṇaṃ śātravāṇāṃ; muṣṇantaṃ ca dviṣatāṃ vai yaśāṃsi

Sanskrit only: no published translation is held for this verse.

MBh 5.69.4

द्रष्टारो हि कुरवस् तं समेता; महात्मानं शत्रुहणं वरेण्यम् ब्रुवन्तं वाचम् अनृशंसरूपां; वृष्णिश्रेष्ठं मोहयन्तं मदीयान्

draṣṭāro hi kuravas taṃ sametā; mahātmānaṃ śatruhaṇaṃ vareṇyam bruvantaṃ vācam anṛśaṃsarūpāṃ; vṛṣṇiśreṣṭhaṃ mohayantaṃ madīyān

Sanskrit only: no published translation is held for this verse.

MBh 5.69.5

ऋषिं सनातनतमं विपश्चितं; वाचः समुद्रं कलशं यतीनाम् अरिष्टनेमिं गरुडं सुपर्णं; पतिं प्रजानां भुवनस्य धाम

ṛṣiṃ sanātanatamaṃ vipaścitaṃ; vācaḥ samudraṃ kalaśaṃ yatīnām ariṣṭanemiṃ garuḍaṃ suparṇaṃ; patiṃ prajānāṃ bhuvanasya dhāma

Sanskrit only: no published translation is held for this verse.

MBh 5.69.6

सहस्रशीर्षं पुरुषं पुराणम्; अनादिमध्यान्तम् अनन्तकीर्तिम् शुक्रस्य धातारम् अजं जनित्रं; परं परेभ्यः शरणं प्रपद्ये

sahasraśīrṣaṃ puruṣaṃ purāṇam; anādimadhyāntam anantakīrtim śukrasya dhātāram ajaṃ janitraṃ; paraṃ parebhyaḥ śaraṇaṃ prapadye

Sanskrit only: no published translation is held for this verse.

MBh 5.69.7

त्रैलोक्यनिर्माणकरं जनित्रं; देवासुराणाम् अथ नागरक्षसाम् नराधिपानां विदुषां प्रधानम्; इन्द्रानुजं तं शरणं प्रपद्ये

trailokyanirmāṇakaraṃ janitraṃ; devāsurāṇām atha nāgarakṣasām narādhipānāṃ viduṣāṃ pradhānam; indrānujaṃ taṃ śaraṇaṃ prapadye

Sanskrit only: no published translation is held for this verse.