Library·Mahābhārata (critical edition)·5·5.83
वैशंपायन उवाच तथा दूतैः समाज्ञाय आयान्तं मधुसूदनम् धृतराष्ट्रो ऽब्रवीद् भीष्मम् अर्चयित्वा महाभुजम्
vaiśaṃpāyana uvāca tathā dūtaiḥ samājñāya āyāntaṃ madhusūdanam dhṛtarāṣṭro 'bravīd bhīṣmam arcayitvā mahābhujam
Sanskrit only: no published translation is held for this verse.
द्रोणं च संजयं चैव विदुरं च महामतिम् दुर्योधनं च सामात्यं हृष्टरोमाब्रवीद् इदम्
droṇaṃ ca saṃjayaṃ caiva viduraṃ ca mahāmatim duryodhanaṃ ca sāmātyaṃ hṛṣṭaromābravīd idam
Sanskrit only: no published translation is held for this verse.
अद्भुतं महद् आश्चर्यं श्रूयते कुरुनन्दन स्त्रियो बालाश् च वृद्धाश् च कथयन्ति गृहे गृहे
adbhutaṃ mahad āścaryaṃ śrūyate kurunandana striyo bālāś ca vṛddhāś ca kathayanti gṛhe gṛhe
Sanskrit only: no published translation is held for this verse.
सत्कृत्याचक्षते चान्ये तथैवान्ये समागताः पृथग्वादाश् च वर्तन्ते चत्वरेषु सभासु च
satkṛtyācakṣate cānye tathaivānye samāgatāḥ pṛthagvādāś ca vartante catvareṣu sabhāsu ca
Sanskrit only: no published translation is held for this verse.
उपयास्यति दाशार्हः पाण्डवार्थे पराक्रमी स नो मान्यश् च पूज्यश् च सर्वथा मधुसूदनः
upayāsyati dāśārhaḥ pāṇḍavārthe parākramī sa no mānyaś ca pūjyaś ca sarvathā madhusūdanaḥ
Sanskrit only: no published translation is held for this verse.
तस्मिन् हि यात्रा लोकस्य भूतानाम् ईश्वरो हि सः तस्मिन् धृतिश् च वीर्यं च प्रज्ञा चौजश् च माधवे
tasmin hi yātrā lokasya bhūtānām īśvaro hi saḥ tasmin dhṛtiś ca vīryaṃ ca prajñā caujaś ca mādhave
Sanskrit only: no published translation is held for this verse.
स मान्यतां नरश्रेष्ठः स हि धर्मः सनातनः पूजितो हि सुखाय स्याद् असुखः स्याद् अपूजितः
sa mānyatāṃ naraśreṣṭhaḥ sa hi dharmaḥ sanātanaḥ pūjito hi sukhāya syād asukhaḥ syād apūjitaḥ
Sanskrit only: no published translation is held for this verse.
स चेत् तुष्यति दाशार्ह उपचारैर् अरिंदमः कृत्स्नान् सर्वान् अभिप्रायान् प्राप्स्यामः सर्वराजसु
sa cet tuṣyati dāśārha upacārair ariṃdamaḥ kṛtsnān sarvān abhiprāyān prāpsyāmaḥ sarvarājasu
Sanskrit only: no published translation is held for this verse.
तस्य पूजार्थम् अद्यैव संविधत्स्व परंतप सभाः पथि विधीयन्तां सर्वकामसमाहिताः
tasya pūjārtham adyaiva saṃvidhatsva paraṃtapa sabhāḥ pathi vidhīyantāṃ sarvakāmasamāhitāḥ
Sanskrit only: no published translation is held for this verse.
यथा प्रीतिर् महाबाहो त्वयि जायेत तस्य वै तथा कुरुष्व गान्धारे कथं वा भीष्म मन्यसे
yathā prītir mahābāho tvayi jāyeta tasya vai tathā kuruṣva gāndhāre kathaṃ vā bhīṣma manyase
Sanskrit only: no published translation is held for this verse.
ततो भीष्मादयः सर्वे धृतराष्ट्रं जनाधिपम् ऊचुः परमम् इत्य् एवं पूजयन्तो ऽस्य तद् वचः
tato bhīṣmādayaḥ sarve dhṛtarāṣṭraṃ janādhipam ūcuḥ paramam ity evaṃ pūjayanto 'sya tad vacaḥ
Sanskrit only: no published translation is held for this verse.
तेषाम् अनुमतं ज्ञात्वा राजा दुर्योधनस् तदा सभावास्तूनि रम्याणि प्रदेष्टुम् उपचक्रमे
teṣām anumataṃ jñātvā rājā duryodhanas tadā sabhāvāstūni ramyāṇi pradeṣṭum upacakrame
Sanskrit only: no published translation is held for this verse.
ततो देशेषु देशेषु रमणीयेषु भागशः सर्वरत्नसमाकीर्णाः सभाश् चक्रुर् अनेकशः
tato deśeṣu deśeṣu ramaṇīyeṣu bhāgaśaḥ sarvaratnasamākīrṇāḥ sabhāś cakrur anekaśaḥ
Sanskrit only: no published translation is held for this verse.
आसनानि विचित्राणि युक्तानि विविधैर् गुणैः स्त्रियो गन्धान् अलंकारान् सूक्ष्माणि वसनानि च
āsanāni vicitrāṇi yuktāni vividhair guṇaiḥ striyo gandhān alaṃkārān sūkṣmāṇi vasanāni ca
Sanskrit only: no published translation is held for this verse.
गुणवन्त्य् अन्नपानानि भोज्यानि विविधानि च माल्यानि च सुगन्धीनि तानि राजा ददौ ततः
guṇavanty annapānāni bhojyāni vividhāni ca mālyāni ca sugandhīni tāni rājā dadau tataḥ
Sanskrit only: no published translation is held for this verse.
विशेषतश् च वासार्थं सभां ग्रामे वृकस्थले विदधे कौरवो राजा बहुरत्नां मनोरमाम्
viśeṣataś ca vāsārthaṃ sabhāṃ grāme vṛkasthale vidadhe kauravo rājā bahuratnāṃ manoramām
Sanskrit only: no published translation is held for this verse.
एतद् विधाय वै सर्वं देवार्हम् अतिमानुषम् आचख्यौ धृतराष्ट्राय राजा दुर्योधनस् तदा
etad vidhāya vai sarvaṃ devārham atimānuṣam ācakhyau dhṛtarāṣṭrāya rājā duryodhanas tadā
Sanskrit only: no published translation is held for this verse.
ताः सभाः केशवः सर्वा रत्नानि विविधानि च असमीक्ष्यैव दाशार्ह उपायात् कुरुसद्म तत्
tāḥ sabhāḥ keśavaḥ sarvā ratnāni vividhāni ca asamīkṣyaiva dāśārha upāyāt kurusadma tat
Sanskrit only: no published translation is held for this verse.