Library·Mahābhārata (critical edition)·6·6.55
ततः शरौघैर् निशितैः किरीटिना; नृदेहशस्त्रक्षतलोहितोदा नदी सुघोरा नरदेहफेना; प्रवर्तिता तत्र रणाजिरे वै
tataḥ śaraughair niśitaiḥ kirīṭinā; nṛdehaśastrakṣatalohitodā nadī sughorā naradehaphenā; pravartitā tatra raṇājire vai
Sanskrit only: no published translation is held for this verse.
वेगेन सातीव पृथुप्रवाहा; प्रसुस्रुता भैरवारावरूपा परेतनागाश्वशरीररोधा; नरान्त्रमज्जाभृतमांसपङ्का
vegena sātīva pṛthupravāhā; prasusrutā bhairavārāvarūpā paretanāgāśvaśarīrarodhā; narāntramajjābhṛtamāṃsapaṅkā
Sanskrit only: no published translation is held for this verse.
प्रभूतरक्षोगणभूतसेविता; शिरःकपालाकुलकेशशाद्वला शरीरसंघातसहस्रवाहिनी; विशीर्णनानाकवचोर्मिसंकुला
prabhūtarakṣogaṇabhūtasevitā; śiraḥkapālākulakeśaśādvalā śarīrasaṃghātasahasravāhinī; viśīrṇanānākavacormisaṃkulā
Sanskrit only: no published translation is held for this verse.
नराश्वनागास्थिनिकृत्तशर्करा; विनाशपातालवती भयावहा तां कङ्कमालावृतगृध्रकह्वैः; क्रव्यादसंघैश् च तरक्षुभिश् च
narāśvanāgāsthinikṛttaśarkarā; vināśapātālavatī bhayāvahā tāṃ kaṅkamālāvṛtagṛdhrakahvaiḥ; kravyādasaṃghaiś ca tarakṣubhiś ca
Sanskrit only: no published translation is held for this verse.
उपेतकूलां ददृशुः समन्तात्; क्रूरां महावैतरणीप्रकाशाम् प्रवर्तिताम् अर्जुनबाणसंघैर्; मेदोवसासृक्प्रवहां सुभीमाम्
upetakūlāṃ dadṛśuḥ samantāt; krūrāṃ mahāvaitaraṇīprakāśām pravartitām arjunabāṇasaṃghair; medovasāsṛkpravahāṃ subhīmām
Sanskrit only: no published translation is held for this verse.
ते चेदिपाञ्चालकरूषमत्स्याः; पार्थाश् च सर्वे सहिताः प्रणेदुः वित्रास्य सेनां ध्वजिनीपतीनां; सिंहो मृगाणाम् इव यूथसंघान् विनेदतुस् ताव् अतिहर्षयुक्तौ; गाण्डीवधन्वा च जनार्दनश् च
te cedipāñcālakarūṣamatsyāḥ; pārthāś ca sarve sahitāḥ praṇeduḥ vitrāsya senāṃ dhvajinīpatīnāṃ; siṃho mṛgāṇām iva yūthasaṃghān vinedatus tāv atiharṣayuktau; gāṇḍīvadhanvā ca janārdanaś ca
Sanskrit only: no published translation is held for this verse.
ततो रविं संहृतरश्मिजालं; दृष्ट्वा भृशं शस्त्रपरिक्षताङ्गाः तद् ऐन्द्रम् अस्त्रं विततं सुघोरम्; असह्यम् उद्वीक्ष्य युगान्तकल्पम्
tato raviṃ saṃhṛtaraśmijālaṃ; dṛṣṭvā bhṛśaṃ śastraparikṣatāṅgāḥ tad aindram astraṃ vitataṃ sughoram; asahyam udvīkṣya yugāntakalpam
Sanskrit only: no published translation is held for this verse.
अथापयानं कुरवः सभीष्माः; सद्रोणदुर्योधनबाह्लिकाश् च चक्रुर् निशां संधिगतां समीक्ष्य; विभावसोर् लोहितराजियुक्ताम्
athāpayānaṃ kuravaḥ sabhīṣmāḥ; sadroṇaduryodhanabāhlikāś ca cakrur niśāṃ saṃdhigatāṃ samīkṣya; vibhāvasor lohitarājiyuktām
Sanskrit only: no published translation is held for this verse.
अवाप्य कीर्तिं च यशश् च लोके; विजित्य शत्रूंश् च धनंजयो ऽपि ययौ नरेन्द्रैः सह सोदरैश् च; समाप्तकर्मा शिबिरं निशायाम् ततः प्रजज्ञे तुमुलः कुरूणां; निशामुखे घोरतरः प्रणादः
avāpya kīrtiṃ ca yaśaś ca loke; vijitya śatrūṃś ca dhanaṃjayo 'pi yayau narendraiḥ saha sodaraiś ca; samāptakarmā śibiraṃ niśāyām tataḥ prajajñe tumulaḥ kurūṇāṃ; niśāmukhe ghorataraḥ praṇādaḥ
Sanskrit only: no published translation is held for this verse.
रणे रथानाम् अयुतं निहत्य; हता गजाः सप्तशतार्जुनेन प्राच्याश् च सौवीरगणाश् च सर्वे; निपातिताः क्षुद्रकमालवाश् च महत् कृतं कर्म धनंजयेन; कर्तुं यथा नार्हति कश् चिद् अन्यः
raṇe rathānām ayutaṃ nihatya; hatā gajāḥ saptaśatārjunena prācyāś ca sauvīragaṇāś ca sarve; nipātitāḥ kṣudrakamālavāś ca mahat kṛtaṃ karma dhanaṃjayena; kartuṃ yathā nārhati kaś cid anyaḥ
Sanskrit only: no published translation is held for this verse.
श्रुतायुर् अम्बष्ठपतिश् च राजा; तथैव दुर्मर्षणचित्रसेनौ द्रोणः कृपः सैन्धवबाह्लिकौ च; भूरिश्रवाः शल्यशलौ च राजन् स्वबाहुवीर्येण जिताः सभीष्माः; किरीटिना लोकमहारथेन
śrutāyur ambaṣṭhapatiś ca rājā; tathaiva durmarṣaṇacitrasenau droṇaḥ kṛpaḥ saindhavabāhlikau ca; bhūriśravāḥ śalyaśalau ca rājan svabāhuvīryeṇa jitāḥ sabhīṣmāḥ; kirīṭinā lokamahārathena
Sanskrit only: no published translation is held for this verse.
इति ब्रुवन्तः शिबिराणि जग्मुः; सर्वे गणा भारत ये त्वदीयाः उल्कासहस्रैश् च सुसंप्रदीप्तैर्; विभ्राजमानैश् च तथा प्रदीपैः किरीटिवित्रासितसर्वयोधा; चक्रे निवेशं ध्वजिनी कुरूणाम्
iti bruvantaḥ śibirāṇi jagmuḥ; sarve gaṇā bhārata ye tvadīyāḥ ulkāsahasraiś ca susaṃpradīptair; vibhrājamānaiś ca tathā pradīpaiḥ kirīṭivitrāsitasarvayodhā; cakre niveśaṃ dhvajinī kurūṇām
Sanskrit only: no published translation is held for this verse.