Mahābhārata (critical edition) 7.127

संजय उवाच ततो दुर्योधनो राजा द्रोणेनैवं प्रचोदितः अमर्षवशम् आपन्नो युद्धायैव मनो दधे

saṃjaya uvāca tato duryodhano rājā droṇenaivaṃ pracoditaḥ amarṣavaśam āpanno yuddhāyaiva mano dadhe

Sanskrit only: no published translation is held for this verse.

अब्रवीच् च तदा कर्णं पुत्रो दुर्योधनस् तव पश्य कृष्णसहायेन पाण्डवेन किरीटिना आचार्यविहितं व्यूहं भिन्नं देवैः सुदुर्भिदम्

abravīc ca tadā karṇaṃ putro duryodhanas tava paśya kṛṣṇasahāyena pāṇḍavena kirīṭinā ācāryavihitaṃ vyūhaṃ bhinnaṃ devaiḥ sudurbhidam

Sanskrit only: no published translation is held for this verse.

तव व्यायच्छमानस्य द्रोणस्य च महात्मनः मिषतां योधमुख्यानां सैन्धवो विनिपातितः

tava vyāyacchamānasya droṇasya ca mahātmanaḥ miṣatāṃ yodhamukhyānāṃ saindhavo vinipātitaḥ

Sanskrit only: no published translation is held for this verse.

पश्य राधेय राजानः पृथिव्यां प्रवरा युधि पार्थेनैकेन निहताः सिंहेनेवेतरा मृगाः

paśya rādheya rājānaḥ pṛthivyāṃ pravarā yudhi pārthenaikena nihatāḥ siṃhenevetarā mṛgāḥ

Sanskrit only: no published translation is held for this verse.

मम व्यायच्छमानस्य समरे शत्रुसूदन अल्पावशेषं सैन्यं मे कृतं शक्रात्मजेन ह

mama vyāyacchamānasya samare śatrusūdana alpāvaśeṣaṃ sainyaṃ me kṛtaṃ śakrātmajena ha

Sanskrit only: no published translation is held for this verse.

कथं ह्य् अनिच्छमानस्य द्रोणस्य युधि फल्गुनः भिन्द्यात् सुदुर्भिदं व्यूहं यतमानो ऽपि संयुगे

kathaṃ hy anicchamānasya droṇasya yudhi phalgunaḥ bhindyāt sudurbhidaṃ vyūhaṃ yatamāno 'pi saṃyuge

Sanskrit only: no published translation is held for this verse.

प्रियो हि फल्गुनो नित्यम् आचार्यस्य महात्मनः ततो ऽस्य दत्तवान् द्वारं नयुद्धेनारिमर्दन

priyo hi phalguno nityam ācāryasya mahātmanaḥ tato 'sya dattavān dvāraṃ nayuddhenārimardana

Sanskrit only: no published translation is held for this verse.

अभयं सैन्धवस्याजौ दत्त्वा द्रोणः परंतपः प्रादात् किरीटिने द्वारं पश्य निर्गुणतां मम

abhayaṃ saindhavasyājau dattvā droṇaḥ paraṃtapaḥ prādāt kirīṭine dvāraṃ paśya nirguṇatāṃ mama

Sanskrit only: no published translation is held for this verse.

यद्य् अदास्यम् अनुज्ञां वै पूर्वम् एव गृहान् प्रति सिन्धुराजस्य समरे नाभविष्यज् जनक्षयः

yady adāsyam anujñāṃ vai pūrvam eva gṛhān prati sindhurājasya samare nābhaviṣyaj janakṣayaḥ

Sanskrit only: no published translation is held for this verse.

जयद्रथो जीवितार्थी गच्छमानो गृहान् प्रति मयानार्येण संरुद्धो द्रोणात् प्राप्याभयं रणे

jayadratho jīvitārthī gacchamāno gṛhān prati mayānāryeṇa saṃruddho droṇāt prāpyābhayaṃ raṇe

Sanskrit only: no published translation is held for this verse.

अद्य मे भ्रातरः क्षीणाश् चित्रसेनादयो युधि भीमसेनं समासाद्य पश्यतां नो दुरात्मनाम्

adya me bhrātaraḥ kṣīṇāś citrasenādayo yudhi bhīmasenaṃ samāsādya paśyatāṃ no durātmanām

Sanskrit only: no published translation is held for this verse.

कर्ण उवाच आचार्यं मा विगर्हस्व शक्त्या युध्यत्य् असौ द्विजः अजय्यान् पाण्डवान् मन्ये द्रोणेनास्त्रविदा मृधे

karṇa uvāca ācāryaṃ mā vigarhasva śaktyā yudhyaty asau dvijaḥ ajayyān pāṇḍavān manye droṇenāstravidā mṛdhe

Sanskrit only: no published translation is held for this verse.

तथा ह्य् एनम् अतिक्रम्य प्रविष्टः श्वेतवाहनः दैवदृष्टो ऽन्यथाभावो न मन्ये विद्यते क्व चित्

tathā hy enam atikramya praviṣṭaḥ śvetavāhanaḥ daivadṛṣṭo 'nyathābhāvo na manye vidyate kva cit

Sanskrit only: no published translation is held for this verse.

ततो नो युध्यमानानां परं शक्त्या सुयोधन सैन्धवो निहतो राजन् दैवम् अत्र परं स्मृतम्

tato no yudhyamānānāṃ paraṃ śaktyā suyodhana saindhavo nihato rājan daivam atra paraṃ smṛtam

Sanskrit only: no published translation is held for this verse.

परं यत्नं कुर्वतां च त्वया सार्धं रणाजिरे हत्वास्माकं पौरुषं हि दैवं पश्चात् करोति नः सततं चेष्टमानानां निकृत्या विक्रमेण च

paraṃ yatnaṃ kurvatāṃ ca tvayā sārdhaṃ raṇājire hatvāsmākaṃ pauruṣaṃ hi daivaṃ paścāt karoti naḥ satataṃ ceṣṭamānānāṃ nikṛtyā vikrameṇa ca

Sanskrit only: no published translation is held for this verse.

दैवोपसृष्टः पुरुषो यत् कर्म कुरुते क्व चित् कृतं कृतं स्म तत् तस्य दैवेन विनिहन्यते

daivopasṛṣṭaḥ puruṣo yat karma kurute kva cit kṛtaṃ kṛtaṃ sma tat tasya daivena vinihanyate

Sanskrit only: no published translation is held for this verse.

यत् कर्तव्यं मनुष्येण व्यवसायवता सता तत् कार्यम् अविशङ्केन सिद्धिर् दैवे प्रतिष्ठिता

yat kartavyaṃ manuṣyeṇa vyavasāyavatā satā tat kāryam aviśaṅkena siddhir daive pratiṣṭhitā

Sanskrit only: no published translation is held for this verse.

निकृत्या निकृताः पार्था विषयोगैश् च भारत दग्धा जतुगृहे चापि द्यूतेन च पराजिताः

nikṛtyā nikṛtāḥ pārthā viṣayogaiś ca bhārata dagdhā jatugṛhe cāpi dyūtena ca parājitāḥ

Sanskrit only: no published translation is held for this verse.

राजनीतिं व्यपाश्रित्य प्रहिताश् चैव काननम् यत्नेन च कृतं यत् ते दैवेन विनिपातितम्

rājanītiṃ vyapāśritya prahitāś caiva kānanam yatnena ca kṛtaṃ yat te daivena vinipātitam

Sanskrit only: no published translation is held for this verse.

युध्यस्व यत्नम् आस्थाय मृत्युं कृत्वा निवर्तनम् यततस् तव तेषां च दैवं मार्गेण यास्यति

yudhyasva yatnam āsthāya mṛtyuṃ kṛtvā nivartanam yatatas tava teṣāṃ ca daivaṃ mārgeṇa yāsyati

Sanskrit only: no published translation is held for this verse.

न तेषां मतिपूर्वं हि सुकृतं दृश्यते क्व चित् दुष्कृतं तव वा वीर बुद्ध्या हीनं कुरूद्वह

na teṣāṃ matipūrvaṃ hi sukṛtaṃ dṛśyate kva cit duṣkṛtaṃ tava vā vīra buddhyā hīnaṃ kurūdvaha

Sanskrit only: no published translation is held for this verse.

दैवं प्रमाणं सर्वस्य सुकृतस्येतरस्य वा अनन्यकर्म दैवं हि जागर्ति स्वपताम् अपि

daivaṃ pramāṇaṃ sarvasya sukṛtasyetarasya vā ananyakarma daivaṃ hi jāgarti svapatām api

Sanskrit only: no published translation is held for this verse.

बहूनि तव सैन्यानि योधाश् च बहवस् तथा न तथा पाण्डुपुत्राणाम् एवं युद्धम् अवर्तत

bahūni tava sainyāni yodhāś ca bahavas tathā na tathā pāṇḍuputrāṇām evaṃ yuddham avartata

Sanskrit only: no published translation is held for this verse.

तैर् अल्पैर् बहवो यूयं क्षयं नीताः प्रहारिणः शङ्के दैवस्य तत् कर्म पौरुषं येन नाशितम्

tair alpair bahavo yūyaṃ kṣayaṃ nītāḥ prahāriṇaḥ śaṅke daivasya tat karma pauruṣaṃ yena nāśitam

Sanskrit only: no published translation is held for this verse.

संजय उवाच एवं संभाषमाणानां बहु तत् तज् जनाधिप पाण्डवानाम् अनीकानि समदृश्यन्त संयुगे

saṃjaya uvāca evaṃ saṃbhāṣamāṇānāṃ bahu tat taj janādhipa pāṇḍavānām anīkāni samadṛśyanta saṃyuge

Sanskrit only: no published translation is held for this verse.

ततः प्रववृते युद्धं व्यतिषक्तरथद्विपम् तावकानां परैः सार्धं राजन् दुर्मन्त्रिते तव

tataḥ pravavṛte yuddhaṃ vyatiṣaktarathadvipam tāvakānāṃ paraiḥ sārdhaṃ rājan durmantrite tava

Sanskrit only: no published translation is held for this verse.